XVI

Carson a bhithinn-sa dligheach
air an roghainn de chòmhradh?
Ciamar idir a thachair
leithid de thabhartas dhòmhsa?
Ciamar idir a fhuair mi
an crath luasgain an t-saoghail
a leithid de fhortan
air fhosgladh rim thaobh-sa?

Dè an spàirn air a’ chuibhle
thug m’ uidhe air uachdar?
Eadhon aon oidhche
dè thoill mi de ’buaidh-se?
Ciamar idir a thàinig
am measg ànradh mo chuairt-sa
gun deach mo mhiann agus m’ eanchainn
gu meanmnach ri luathghair?

A nighean, a nighean,
dè tubaist a’ ghàire
rinn fanaid air t’ aghaidh
ghil fhoinnidh àlainn?
Dè chuir thu rim thaobh-sa
far an do shaoil mi a bha thu?
Dè thug dhomhsa aon oidhche
glòir aoibhneach do ghàire?

A nighean, a nighean,
tha breisleach an tionndaidh,
tha iomairt na cuibhle
air mo ruidhleadh le ionndrainn:
ciamar idir a thàrr mi
air a bàrr-se le iomchar,
ged nach d’ rinn mi ach tuiteam
gu clis is gu h-iomlan?

Bu mhiann leam an aisling
ge b’ e aisling a bh’ ann dith:
bu mhiann an t-aiteal
de aiteas an allacheo:
ach dè idir chuir t’ fhaileas,
a nighean ruadh gheal, ann?
Cha robh agad fiù ’s fathann
air filidhean Albann.