ORAN IX.

MORAG.^{[Chitir anns an eachdraidh mar thainig Mòr mar ainm air a’ Phrionns’. Faic taobh-duilleig 202. ]}

LUINNEAG.

Agus hò Mòrag, na hò-rò,
’S na hò-rè-ghealladh.

A MHÒRAG chiatach a chuil dualaich,
Gur h-e do luaidh a th’air m’aire,
Agus hò Mhòrag, &c.

’S ma dh’imich thu null thar chuan uaine
Gum a luath a thig thu thairis
Agus hò Mhòrag, &c.

’S cùimhnich ’thoir leat pannal ghruagach
’Luaigheas an clò ruadh gu daigheann.
Agus hò Mhòrag, &c.

O cha leiginn thu do’n bhuaile
Ma salaich am buachar t-anart.
Agus hò Mhòrag, &c.

De cha leiginn thu gu cualach
Obair thruaillidh sin nan caileag
Agus hò Mhòrag, &c.

Gur h-ì Mòrag ghrinn mo ghuamag,
Aig am beil an cuailean barr-fhionn.
Agus hò Mhòrag, &c.

’S gaganach, bachlagach, cuachach,
Ciabhag na gruagaiche glaine.
Agus hò Mhòrag, &c.

Do chùl peucach sìos na dhualaibh;
Dhalladh e uaislean le ’lainnir:
Agus hò Mhòrag, &c.

Sìos na fheòirneanaibh mu d’ ghuaillean,
Leadan cuachagach na h-ainnir:
Agus hò Mhòrag, &c.

Do chùl peurlach, òr-bhui, luachach,
Timchioll do chluasan ’na chlannaibh.
Agus hò Mhòrag, &c.

A, Mhòrag! gu’m beil do chuailean
Ormsa na bhuaireadh gun sgainnir.
Agus hò Mhòrag, &c.

’S ge nach iarr mi thu ri d’ phùsadh,
Gu’m b’ e mo rùn a bhi mar ruit.
Agus hò Mhòrag, &c.

’S ma thig thu rìthist am lùbaibh,
’S e ’n t-eug a rùin ni ar sgaradh.
Agus hò Mhòrag, &c.

Leanaidh ma cho dlù ri d’ shàilean,
Sa ni bairneach ri sgeir mhara.
Agus hò Mhòrag, &c.

Shiubhail mi cian leat air m’ eòlas,
Agus spailp do’n stroichd thar m’ ain-eol.
Agus hò Mhòrag, &c.

Gu leanainn thu feadh an t-saoghail,
Ach thusa ghaoil theachd am fharraid.
Agus hò Mhòrag, &c.

Gu’n chuireadh air mhisg le d’ ghaol mi;
’S mear aotrom a ghaoir ta m’ bhallaibh.
Agus hò Mhòrag, &c.

’S a Mhòrag ga’m beil a ghruaidh chiatach;
’S glan a fiaradh thar do mhala.
Agus hò Mhòrag, &c.

Do shùil shuilbhear, shochdrach, mhòdhar,
Mhireagach, chòmhnart, ’s i meallach.
Agus hò Mhòrag, &c.

Deud cailce, shasda, na rìbhinn,
Snaite mar dhìsn’ air a’ ghearradh.
Agus hò Mhòrag, &c.

Maighdean bhòidheach, nam bos caoine,
’S ìad cho maoth ri cloidh na h-eala.
Agus hò Mhòrag, &c.

Cìochan leuganach nan gucag,
’S fàileadh a mhusca d’a h-anail.
Agus hò Mhòrag, &c.

’S ioma òigear a ghabh tlachd dhiot,
Eadar Arcamh agus Manuinn.
Agus hò Mhòrag, &c.

’S ioma leannan a th’ aig Mòraig,
Eidir Mor-thìr agus Aruinn.
Agus hò Mhòrag, &c.

’S ioma gaisgeach de Ghàël,
Nach obadh le m’ ghràdh-sa tarrainn:
Agus hò Mhòrag, &c.

A rachadh le sgiath, ’s le clàidheamh,
Air bheag sgàth gu bial nan cannon:
Agus hò Mhòrag, &c.

Chunnardaicheadh dol ’nan òrdaibh,
Thoirt do chòrach, ’mach a dh’ ain-deoin.
Agus hò Mhòrag, &c.

’S iomadh àrmunn làsdail, treubhach,
Ann an Dunéideann, am barail,
Agus hò Mhòrag, &c.

Na faiceadh iad gnè do dhuais ort,
Dheanadh tarrainn suas ri d’ charraid.
Agus hò Mhòrag, &c.

Mo chinnt’ gun dheanadh leat éridh,
Do Chaiptin fein Mac- ’Ic-Ailein:
Agus hò Mhòrag, &c.

Gu’n theann e roi’ ro chàch riut,
’S ni e fàst e, ach thig thairis:
Agus hò Mhòrag, &c.

Gach duine, tha ’n Uibhist a Mùideart,
’S an Arasaig dhù-ghorm a bharraich;
Agus hò Mhòrag, &c.

An Cana, an Eige, ’s am Moror;
Reiseamaid chorr ud shiol Ailein!
Agus hò Mhòrag, &c.

’N am Alasdair,^{[Alasdair Mac Cholla Chiotaich. ]} is Mhontròis’,
Gu ’m ba bhòchdain iad air Ghallaibh.
Agus hò Mhòrag, &c.

Gun d’ fhairich là Inbher-Lòchai,
Co bu stròicich ann le lannaibh.
Agus hò Mhòrag, &c.

Am Peairt, an Chill-Saoidh, ’s an Allt-éireann,
Dh’ fhag iad reubalaich gun anam,
Agus hò Mhòrag, &c.

Alasdair mor Ghlinne-Comhann,
’S bragaid coimheach Ghlinne-garadh.
Agus hò Mhòrag, &c.

Mar sin is an t-àrmunn Sléibhteach,
Ge d’ a tha e-féin ’na leanamh.
Agus hò Mhòrag, &c.

Dh’éiridh leat a nall o’n Rùdha,
Anntrum lù-chleasach nan seang-each.
Agus hò Mhòrag, &c.

Dhruideadh, na Gàëil gu léir riut,
Ge b’ e dh’éiridh leat no dh’fhanadh.
Agus hò Mhòrag, &c.

Shuath, deich mìle dhiu air clé-dhuibh,
An cogadh Rìgh Séurlas nach maireann.
Agus hò Mhòrag, &c.

’S ioma clò air ’n tug iad caitean,
Eadar Cat-taobh, agus Anuinn.
Agus hò Mhòrag, &c.

Bha càch ’diulta’ teachd a luagh dhuibh,
’S chruinnich iad-san sluagh am pannail,
Agus hò Mhòrag, &c.

A rì! bu mhath ’s an luagh-làmh iad,
’Nuair a thàirneadh iad na lannan!
Agus hò Mhòrag, &c.

H-uile clò a luaigh iad riabh dhuibh,
Dh’fhag iad e gu ciatach daigheann:
Agus hò Mhòrag, &c.

Teann, tiugh, daigheann, fite, luaite,
Daite ruadh, air thuar na fala.
Agus hò Mhòrag, &c.

Greas thairis le d’ mhnathan luaighe,
’S théid na gruagaichean-sa mar riu.