CAIBIDIL IV.

ULLACHADH AN AIRM DHEIRG.

MU’N àm so bha Rìgh Seòras far’ bu chuimhe dha ’bhith, ann a’ Hanobhar tìr dhùchasach a shinnsir féin, agus bha cuid de Shasunnaich a cuir as a leth gu’n robh e n’a bu tlŭsmhoire ris an Rìoghachd sin, na bha e ri Breatuinn. Bha e mar gum biodh e caoin-shuarach ma déibhinn.

Fad rè an t-Sàmhraidh bha fathunn air feadh na Gàëldachd gu’n robh am Prionnsa gu thighinn a nall mu’n tigeadh an t-Sămhainn; ach cha chuala luchd-muinntir an Rìgh an Dunéideann smid dheth gus an dara latha de mhìos dheireannach an t-Sàmhraidh, agus gun sheall Tighearna Chuil-Fhodair litir a fhuair e bho dhuin-uasal Gàëlach do Shir Iain Cope, ceannard an airm-dhéirg.

Mu’n àm so, bha Iain Cope air a mheas na cheann-feachda cho ionnsaichte agus cho misneachail ’sa bha ann am Breatuinn gu léir; agus bha aige fo chomannd ann an Alba’ dà réiseamaid thrùpairean each, dà réiseamaid iomlan de shaighdearan coise, agus cùig cuideachdan diag de chaochladh réiseamaidean eile, a bha sgaoilte feadh bhailtean mòra na h-Alba; bha iad a nis’ air an

Dh-òrduich luchd-comhairl’ an Rìgh do dh-Iain Cope a’ Ghàëldachd a ruidhinn gun stad, a chum na Gàëil a chumail air an ais, mu’m faigheadh iad ùin’ air fàs ni bu liommhoire agus ni bu treise. B’e Tighearna Chuil-Fhodair a h-aon de ’n luchd-comhairle; agus ged do bha e an aghaidh Thearlaich, agus na fhìr charaid do Rìgh Seòras bha mòran dheth a luchd-dàimh a’s eòlais, agus dheth a chairdean féin chean’ air eiridh leis a’ Phrionns’, agus shaoil leis gu ’n deanadh sealladh de dh-Iain Cope agus dheth fheachd “sgapadh nan cearc breac” air na Gàëil, agus gu’n leigeadh iad a chùis ma-làr mas lasadh fraoch cumhachd na Rìoghachd nan agaidh, a thaobh gu ’n robh cinnt aige, nach robh tearnadh air an son, nan cailleadh iad air a’ cheanna ma dheireadh. Rainig an t-òrdugh so Sir Iain Cope ann an Dunéideann, air an naoidheamh latha-diag de mhìos dheireannach an t-Sàmhraidh; a cheart latha anns na thog Tearlach a bhratach ann an Gleann-Fionain. Dh’ falbh Iain Cope air a’ cheart latha sin do Shrùidhleadh gu e-féin a chuir air ceann an àirm.