Oran le Iain Lom, air dha a chluinntinn an dara Righ Tearlach bhi air a chrunadh.

MI ’n so air m’ uilinn,
An ard ghleann munaidh,
’S mor fath mo shulas ri gaire.
Mi ’n so air, &c.

’S ge fad am thosd mi,
Ma ’s e ’s olc leibh,
Thig an sop a m’ braghad.
’S ge fad, &c.

O ’n bha sheanns’ oirnne chluinntinn,
Ged bu teann a bha chuing oirnn;
Gu ’n do thionnaidh a chuibhlemur b’aill leinn.
O ’n bha, &c.

An ceum so air choiseachd,
Le m’ bhata ’s le m’ phoca,
’Sa ’n lamh ga stopadh gu sarmhaith.
An ceum, &c.

Gur h-olc an nith dhuinn,
Bhi stad am priosan,
’N am theachd an Righ g’a aite.
Gur h-olc, &c.

Thug Dia dhuinn furtachd,
As na cliabhan druidte,
’Nuair dh’ iarr sinn iuchair a gharaidh.
Thug Dia dhuinn, &c.

’Sa Thearlaich oig Stiubhairt,
Ma chuaidhe an crun ort,
Dia na fhear sdiuraidh air t-fhardraich.
’Sa Thearlaich, &c.

Ma chuaidh thu ’sa chathair,
Gun aon bhuille claidhe,
’N ainm an athar ’s an ard Righ.
Ma chuaidh, &c.

’S thu thigh’n dhachaidh gu d’ Rioghachd
Mur a b’ oil le d’ luchd mioruin
’N coinne ri mile ciad failte.
’S thu thigh’n, &c.

’S ioma Subseig mhor mhisgeach,
’S measa run duit na mise,
Tha cuir stigh am petisein an drasda,
’S ioma, &c.

Luchd na ’n torra-chaisteal liatha,
Air an stormadh le iarunn,
B’ olc na lorgairean riamh ann do gheard iad.
Luchd na ’n, &c.

Cha b’ fhas an dusgadh an cadal,
Na madadh ruagh chuir a braclaich,
’Nuair a fhuaradh thu lag, ach bhi t-aicheadh.
Cha b’ fhas, &c.

Na mearlaich uile chuaidh dh’ aon-taobh,
Ghearr muineal Mhoir-fhear Hunndaidh,
’S math choisinn le bunntaisd am paigheadh.
Na mearlaich, &c.

Leam is eibhinn mur thachair,
Mur dh’ eirich do n bhraich ud,
Bha gach ceann d’ i na bachlagan bana.
Leam is, &c.

Cha robh uimhir na ’n cairtean,
Nach robh tionnda’ mi-cheart orr’,
Bha mo shuilean ga m faicinn an trath ud.
Cha robh, &c.

’S olc an leasan diciadain,
Mur a furtaich thu Dhia air,
Tha feitheadh air an Iarla neo bhaidheil.
’S olc an leasan, &c.

’N am rusgadh a cholair,
Theid an ceann deth o choluinn,
Gloir agus moladh do ’n ard Righ.
N am, &c.

Le maighdionn scorr shuileach smachdail,
Dh’ fhagas gialan gun mheartuinn,
Dhuineas fiaras a Mharcuis mhio chairdeil
Le maighdionn, &c.

’S ged ’s e thus cha ’n e dheireadh,
Do luchd dhusgadh an teine,
’S mur mo run do ’n chuid eile da chairdean.
’S ged ’s e, &c.

Mur bha Liusifer tamull,
’N deigh air thus bhi na Aingeal,
Chaidh a sgiursadh le h-ainiochd a Pharais.
Mur bha, &c.

Bidh tu nis ann ad dheomhan,
Dol timchioll an domhain,
Bhrigh coltais toirt comh-fhillteachd dhasan.
Bidh tu nis, &c.

’S mor a b’ fhearr dhuit na moran,
No na chruinnich thu storas,
Bhi tional an otraich gu d’ gharadh.
’S mor a b’ fhearr, &c.

Na thu fhein ’s do gheard misgeach,
Bhi ’n ait as nach tig sibh,
Mur sgaile phictuir ’sa ’n sgathan,
Na thu fhein, &c.

Na farabhalaich bhreaca,
Bha tarruing uainn ar cuid beartais,
Chuir an Righ mach a Whitehall dhuinn.
Na farabhalaich, &c.