ORAN le ban-Stiubhartach mhuinntir Strathspeidh, ann an aobhar Thearlaich.

So an tim tha cuir as domh,
Lan tuchain a’s cnatain,
Mo dhiubhail ’s mo chreach cha b’e dh’ fheumainn.
So an tim, &c.

Ach bhi guidhe gu laidir,
Le Righ dligheach na ’n Gaidheal,
Theid a Lunnainn gun daill uainn le ceuta.
Ach bhi, &c.

An t-og teannsgalach gasda,
Prionnsa Tearlach na ’m baiteal,
Theid mearlach Righ Shasunn a gheilleadh.
An t-og, &c.

’S ioma leoghunn deas statail,
Dheth mo chinne mor laidir,
Bhios fo d’ bhrataichean bana ag eiridh.
’S ioma leoghunn, &c.

Na Stiubhartaich ghasda,
Fior chuirteil mu d’ bhrataich,
Bidh Iarla Bhoid ’s fir na h Apunn gu leir leat.
Na Stiubhartaich, &c.

Coirneal Ruagh Chinne-Chaìrdin,
’S clann uasal a brathar,
Thog iad bratach ’s cha ’n fhailing iad gleus lea.
Coirneal Ruagh, &c.

’S gur h-e ’n duine a Maidseir ^{[Gillios Mor Mac Bheathain fear Chinne-choille. ]} ,
Mac oighre a mhathar,
’N Righ ga neartach’ an aird ann an céuta.
’S gur h-e, &c.

’S beag an t-iongnadh an t-ardan,
Dhol ad bhathais cho laidir,
’Sa liuthad sruth ard as ’n do leum thu
’S beag an t-iongnadh, &c.

Dh’ fhuil Righ agus bharan,
Do ’m bu dligheach am fearunn,
Do ’n fhuil phriseil bha fearail ag eiridh.
Dh’ fhnil Righ, &c.

Thaobh eile do mhathar,
Tha thu bhrollach na ’n Granntach,
’N aon teaghlach is fearr tha ’n Strathspeidh dhiu.
Thaobh eile, &c.

Dh’ eireadh sud a’s Iarl’ Anndrum,
Mar ri Tearlach an Teannsgail,
’N Righ ga ’n greasad a nall dhuinn a Erinn.
Dh’ eireadh sud, &c.

Na ’m biodh amhuch Righ Deorsa,
Ann an lamhan Chlann Donuill,
Gheibheadh i togha maith corcaich no stéinne.
Na ’m biodh, &c.

Na ’m biodh lamh an fhir ruaigh ort,
Bha mo raoghainnse ’n uachdar,
Gun aon duin’ bhi mu ’n cuairt duibh le cheile.
Na ’m biodh, &c.

Am blar Chop fhuair thu ’n t-urram,
Bu cheann feadhn’ thair gach duin’ thu,
’S ann a shamlaich iad uil’ thu ri Cléibhir.
Am blar Chop, &c.

’S tu gu ’n cuireadh droch sheol,
Fo champa Righ Deorsa,
’N ceann ’s na casan ’s na botainn gu leir diu.
’S tu gu ’n cuiradh, &c.

Bidh e laidir g’ ar congnadh,
Duntuilm le Chlann Donuill,
Thig Sir Alasdair mor oirnn a Sleibhte.
Bidh e laidir, &c.

Thig Mac Mhic Ailein a Muideart,
Mac Mhic Alasdair Chnòideart,
’S Mac Mhic Raoghnuill cha soradh leis eiridh.
Thig Mac Mhic Ailein, &c.

Agus Tighearna Struthain,
Thig e nuas oirnn o ’n ghiùsaich,
Bidh e fein ’sa chuid cuirte gu leir ann.
Agus Tighearna, &c.

Agus Tighearn og Chluainidh,
Leis an t-srol bhrataich uaine,
’S Clann Mhuirich mu ’n cuairt da gu leir ann.
Agus Tighearn og, &c.

Bidh Clann Donuill na ’n uidheam,
Cuir na ruaig ris a bhruthach,
Le ’n arma’ ’s glan uidheam aig Seurlus.
Bidh Clann Donuill, &c.

Bidh Clann Donuill ’s Clann Chamashroin,
Sud na seoid a tha ainmeil,
Am fior thoiseach na h-armailt ag eiridh.
Bidh Clann, &c.

’S mas a beo mi coig bliadhna,
Chi mi fhathasd droch dhiol,
Air luchd sgathaidh na ’m bian bhar na spréidhe.
’S mas a beo, &c.

Air luchd chasaga’ dearga,
’S Mailisidh Earraghàidheal,
Chi sibh fhathasd droch àird air na beisdean.
Air luchd, &c.

Gar ’m faic mis’ e le m’ shuilean,
Gu ’m bi Dia leibh ’s mo dhurachd,
’S cha dean luaidhe no fudar bonn beud duibh.
Gar ’m faic, &c.

Gar am faic mis’ a choidhch e,
Ma thionndas a chuibhle,
Bidh Sasunnaich ’s Guimhnich na ’n eiginn.
Gar am faic, &c.

Bidh luaidhe ri earbull,
Luchd chasaga’ dearga,
Aig Friseilich ainmeil na ’n geurlann.
Bidh luaidhe, &c.

’S mi air thuras ’sa bhraighe,
Cian fada o m’ chairdean,
Far nach cluinn mi ach rànuil an fheidh ann.
’S mi air, &c.

Tha mi sgith ’s mi lan airtneil,
Naile fhin theid mi dhachaidh,
Gu duthaich an fhasgaidh ’s na geige.
Tha mi sgith, &c.

Gu tir na ’m fear ura,
Luchd sgapaidh an fhudair,
’S nach diùltadh an crun do Righ Seurlus.
Gu tir na, &c.

’Sa Thearlaich oig Stiùbhairt,
Chi sinne an crun ort,
’S bidh tu fhathasd a sgiùrsadh na ’m beisdean.
’Sa Thearlaich, &c.

Tha Seumus og uasal,
Leis an Righ mur bu dual da,
Sar cheannard air sluagh an t-og treubhach.
Tha Seumus, &c.

Agus Uilleam oig Ghart,
Mo dhurachd dhuit thachairt,
An Righ sin ga d’ sheachnadh o bheisdean.
Agus Uilleam, &c.

Sar cheannard an t-saighdeir,
’S cridhe soilleir gun fhoill doibh,
’S gu meal sibh ur ’n oighreachd le cheile.
Sar cheannard, &c.