---

[243]

Cumha fhir Shìormhoin agus a mhic; Le Iain Caimbeul maor.

Fonn.— So deoch slainte Thighearna Chluainidh, Cuir mu ’n cuairt anns a chùp i, &c.

THA mo cheim dol an truimead,
Tha mo mhulad fàs dùbailt,
Bhi cuimhneach’ na ’n armunn,
Chaidh an tamh anns an ùir uainn;
Ged a fhuair sinn ar losgadh,
Mun ghabh ’n toiseach air thus uainn,
’S e ’n sgeul so uile a chraidh sinn,
Bhi ga d’ charadh-sa Dhughaill.

O ’n taice so ’n uiridh,
’S trom am buill’ thug am bàs duinn,

---

[244] Ar n-oighreachean fearuinn,
Gun aon duine dhiu’ làthair;
Far am faighte cuirt ghreadhnach,
’S gu faoileachd fìon Spàinnteach,
’S uisge-beatha na ’m feadan,
Gun easbhui’ gun tràghadh.

Ach Alasdair chliùitich,
’S mor mo dhiùbhail nach beò thu;
Bu tu cridhe na feile,
Lan sheudan do ’n mhòrchuis,
Inntinn sgaoileadh a phailtis,
Lamh a sgapadh an òir thu,
’S bha thu shìol na ’m fear ceutach,
Chur nan ceudan an ordugh.

’S fad o ’n chuala’ mi seanchas,
Gu ’m b’ ainmeil ’s an uair ud,
’Nuair thug Dughall na ’n Allta’,
Adbhans ’s an taobh tuath orr’,
Cìosnach Chatach a’s Ghranntach,
Gun taing ’s Tighearna Rùthain,
Mar sin a’s Diùc Gordan,
Thug e comhail d’a shluagh-san.

Ionmhur-Atha ’s an Triath sin,
Mu ’n iathadh na gaisgich,
Gheibhte sibh anns a chogadh,
Air thoiseach ’n tùs brataich,
Sud na teaghlaichean làidir,
Chaidh mu làr ann an gradaig;
Mar dhaoin’ òg nach do liathadh,
’S caol ur n-iarmud ri fhaicinn.

Tha Sìormhoin na fàsach,
Sgeul ro àirid so chreach sinn,

---

[245] O ’n chuir sinn ar daoine,
Taobh ri taobh fo na leacan;
B’ iad nach féileadh ’sa mhàl sinn,
Ach bheireadh dàil duinn a’s meachuinn,
’S ioma teaghlach ’n d’ theid sgaoileadh,
O ’n ghlaodhadh sibh dhachaidh.

’S ioma rusgadh th’ air t-fhearunn,
O ’n a dh’ fhalaich am fòid thu,
Agus factairean lionar,
Chuir gach cis ann am mòid oirnn;
Ach na ’m biodh tu mairionn,
’S gu mealadh tu chòir ud,
Dh’ aindeoin islean a’s uaislean,
Cha ghluaiste ri m’ bheò mi.

’S trom an sachd so th’air m’ aigne,
Mu mharcaich deas nan each gleusda,
O ’n chuireadh thu ’n tasgaidh,
An cistidh ghlaist’ fo na céudan,
Fear t-euguis cha n’ fhaic mi,
Là clachain no féille,
Bu ghuala threun thu measg mhìltean,
’S thu cho shìobhalt ri maighdinn.

Bu bhlath an ceann tuath’ thu,
Ged bu chruaidh thu ’n tir nàmhaid,
Ach a Dhe gabh truas dinn,
Sinn mar uain bhiodh gun mhathair,
’Nuair a dh’ eireadh tu suas leinn,
Co bhuaileadh le tair sinn,
T-aon leithid cha leir dhomh,
Nis gu léir am measg Ghaidheal.

Ach ’s e sgeula na dunaidh,
Dhuinne ullachd ’sa thriall thu,

---

[246] ’Sa thainig an teachdair,
O Iosa g’a t-iarruidh,
Chaill sinn’ ar cul-taice,
Chumadh ’reachd ruinn a’s riaghailt;
Ach na ’n cinneadh do mhac leinn,
Bha sinn ceart o laimh Dhia leis.

Ad dheigh-sa chunnaic mi ’m bruadar,
Dhuisg le fuathas gun dàil mi,
An còta bh’air m’ uachdar,
Bhi tigh’n a nuas na smàl diom;
Do thigh mor ga shìor sguabadh,
’S craobh ga buain ann ad ghàradh,
Ghrad bhuail sud am inntinn,
Gu ’n do chuimhnich am bàs ort.

Gu ’n do chuimhnich am bàs ort,
A ghraidh do na fearaibh,
’S tha do mhathair mu d’ dheighinn,
Gun leirsinn gun seallamh,
Cha b’ iongnadh dh’ i fein sud,
B’ ùr gleusd thu mur leanabh,
’S dh’ fhag thu uile fo bhròn sinn,
’S cha duisgear ceòl ann ad thalla.

Cha duisgear ceoil ann ad chùirt-sa,
O ’n a rùisgeadh an uaigh dhuit,
’Sa thain’ an teachdaire dàna,
Mar bha ’m bàs a thug buaidh ort,
Sud am propanach aluinn,
Chaidh anns a chàs chrùaidh leis;
’S ó na bitheams’ ri m’ shaoghal!
Ann an teaghlach bu truaighe.

’S lom a chì mi do làrach,
O ’n chaill sinn ar n-uachdrain;

---

[247] Ach a Thi a tha làidir,
Cuir na ’n àite ceann tuatha,
Bhios gu h-iorasal bàidheil,
Cruaidh dàna ’n am cruadail,
Ann an aite nan daoine,
Nach robh ’sa ’n t-saoghal na b’ uaisle.

Tha mo chiabhan air glasadh,
Cha n’ fhaic mi, ’s cha léir dhomh,
O ’n thriall iad na gaisgich,
Fo bhrataich mhic De uainn,
Mhic an Righ ga bheil feartan,
Dean an rathad sin réidh dhomh,
’S gur h e m’ aidhear ’s mo mhiann-sa,
Bhi triall as an deigh-san.