CAIB. XIII.

AGUS chaidh Abram suas as an Eiphit, e féin, agus a bhean, agus gach ni a bh’aige, agus Lot maille ris, do’n taobh mu dheas.

2 Agus bha Abram ro-shaibhir ^{[ro-shaidhbhir, ro-bheartach. ]} ann an spréidh, ann an airgiod, agus ann an òr.

3 Agus dh’imich e ’na thurusaibh o’n taobh mu dheas eadhon gu Betel, gu nuig an t-àite, anns an robh a bhùth ’an toiseach, eadar Betel agus Hai;

4 Gu àite na h-altarach a rinn e ’n sin air tùs: agus ghairm Abram ann an sin air ainm an Tighearna.

5 Agus bha mar an ceudna aig Lot, a dh’imich maille re h-Abram, caoraich, agus crobh, agus bùthan ^{[bùithean. ]} .

6 Agus cha robh am fearann comasach air an giùlan ^{[an iomchar. ]} gu còmhnuidh a ghabhail cuideachd; oir bha’m maoin mòr, agus cha b’urrainn ^{[ionnas nach b’urradh. ]} iad còmhnuidh ghabhail cuideachd ^{[san aon àite. ]} .

7 Agus bha comh-stri’ eadar buachaillean ^{[aodhairean. ]} spréidh Abraim, agus buachaillean spréidh Lot: Agus bha ’n Canaanach agus am Periseach ’san àm sin a chòmhnuidh ’san tìr.

8 Agus thubhairt Abram re Lot, Na bitheadh, guidheam ort, comh-stri’ eadar mise agus thusa, agus eadar mo bhuachaillean agus do bhuachaillean-sa; oir is bràithre sinn.

9 Nach ’eil an tìr uile romhad? Dealaich, guidheam ort, riumsa: ma ghabhas tu dh’ionnsuidh na làimhe cli, ’an sin théid mise dh’ionnsuidh na làimhe deise; agus ma théid thu dh’ionnsuidh na làimhe deise, ’an sin gabhaidh mise dh’ionnsuidh na làimhe cli.

10 Agus thog Lot suas a shùilean, agus chunnaic e còmhnard

11 Agus thagh Lot dha féin còmhnard Iordain uile; agus ghabh Lot a thurus o’n àird an ear, agus dhealaich na càirdean re chéile ^{[dhealaicheadh iad gach fear o bhràthair. Eabh.]} .

12 Ghabh Abram còmhnuidh ann an tìr Chanaain, agus ghabh Lot còmhnuidh ’am bailtibh a’ chòmhnaird, agus shuidhich e bhùth aig Sodom.

13 Ach bha daoine Shodoim aingidh, agus ’nam peacaich am fianais an Tighearna gu ro-mhòr.

14. Agus thubhairt an Tighearna re h-Abram, ’an déigh do Lot dealachadh ris, Tog a nis suas do shùilean, agus amhairc o’n ait’ anns am bheil thu, gu tuath, agus gu deas, agus gus an aird an ear, agus an iar:

15 Oir am fearann uile a ta thu a’ faicinn, dhuitse bheir mi e, agus do d’ shliochd gu bràth.

16 Agus ni mise do shliochd-sa mar dhuslach na talmhainn; ionnas ma bhios e’n comas do dhuine duslach na talmhainn àireamh, ’an sin gu’n àirmhear do shliochd-sa mar an ceudna.

17 Eirich, imich air feadh an fhearainn ’na fhad agus ’na leud, oir dhuitse bheir mi e.

18 Agus dh’atharaich Abram a bhùth, agus thàinig e, agus ghabh e còmhnuidh ann an còmhnard Mhamre ^{[aig daragaibh Mhamre. Eabh.]} , a tha ann an Hebron; agus thog e’n sin altair do’n Tighearna.