CAIB. XV.

’AN déigh nan nithe sin thàinig focal an Tighearna gu h-Abram ann an taisbeanadh ^{[foillseachadh, sealladh. ]} , ag ràdh, Na biodh eagal ort, Abraim: Is mise do sgiath, agus do dhuais ro-mhòr.

2 Agus thubhairt Abram, A Thighearna Dhé, ciod a bheir thu dhomh, is mi ’g imeachd ^{[siubhal. ]} gun chloinn, agus gur e Elieser so o Dhamascus fear-riaghlaidh ^{[stiùbhard. ]} mo thighe?

3 Agus thubhairt Abram, Feuch, dhomhsa cha d’thug thu sliochd ^{[sìol, gineal. ]} air bith: agus feuch, ’s e neach a rugadh a’m’ thigh a’s oighre orm.

4. Agus feuch, thàinig focal an Tighearna d’a ionnsuidh, ag ràdh, Cha bhi e so ’na oighre ort; ach esan a thig a mach a t’ innibh ^{[a d’ leasraich. ]} féin, bithidh se ’na oighre ort.

5 Agus thug e leis a mach e, agus thubhairt e, Amhairc a nis suas gu neamh, agus àireamh na reulta, ma’s urrainn thu’n àireamh: Agus thubhairt e ris, Mar so bithidh do shliochd.

6 Agus chreid e anns an Tighearna; agus mheas e sin dha mar ionracas ^{[fhìreantachd. ]} .

7 Agus thubhairt e ris, Is mise an Tighearn a thug a mach thusa a h-Ur nan Caldeanach, a thoirt dhuit an fhearainn so, chum a shealbhachadh mar oighre.

8 Agus thubhairt esan, A Thighearna Dhé, cia leis a bhios fios agam gu’n sealbhaich mi e?

9 Agus thubhairt e ris, Gabh dhomhsa agh thri bliadhna dh’aois, agus gabhar ^{[gabhar bhainionn. ]} thri bliadhna dh’aois, agus reithe thri bliadhna dh’aois, agus turtuir, agus columan òg.

10 Agus ghabh e dha féin iad sin uile, agus roinn e iad ’sa’ mheadhon, agus chuir e gach aon do na mìribh fa chomhair a leth-bhreac, ach cha do roinn e na h-eoin.

11 Agus ’nuair a thàinig an eunlaith a nuas air na cairbhibh ^{[closaichibh. ]} , dh’fhuadaich Abram air falbh iad.

12 Agus ’nuair a bha ghrian a’ dol fuidh ^{[dol fodha. ]} , thuit codal trom air Abram; agus feuch, thuit uamhann dorchadais mhòir air.

13 Agus thubhairt e re h-Abram, Biodh fios gu cinnteach agad, gu’m bi do shliochd ’nan coigrich ann an dùthaich nach leo féin; agus ni iad seirbhis doibh, agus buinidh iad gu cruaidh ^{[buinidh iad gu h-olc, sàraichidh, pianaidh. ]} riu ceithir cheud bliadhna.

14 Agus mar an ceudna air a’ chinneach sin d’an dean iad seirbhis, bheir mise breth: agus ’na dhéigh sin thig iad a mach le maoin mhòir.

15 Agus théid thusa dh’ionnsuidh t’aithreachan ’an sìth; adhlaicear ^{[tìodhlaicear. ]} thu ’n deagh shean-aois.

16 Ach anns a’ cheathramh linn thig iad ’an so air an ais, oir cha’n ’eil aingidheachd nan Amorach fathast iomlan ^{[fathast làn, air teachd fathast gu h-àird. ]} .

17 Agus ’nuair a bha ghrian air dol fuidh, bha dorchadas ann; agus feuch, àmhuinn ^{[fuirnis. ]} dheataich agus leus teine ^{[lòchran loisgeach no teinteach. ]} a chaidh eadar na mìribh sin.

18 Air an là sin féin rinn an Tighearna coi’ -cheangal re h-Abram, ag ràdh, Do d’ shliochd-sa thug mi am fearann so, o abhuinn na h-Eiphit, gu nuig an abhuinn mhòr, abhuinn Euphrates:

19 Na Cenich, agus na Cenidsich, agus na Cadmonaich,

20 Agus na Hitich, agus na Peridsich, agus na Rephaimich,

21 Agus na h-Amorich, agus na Canaanich, agus na Girgasaich, agus na Iebusaich.