CAIB. XVI.

A NIS cha d’rug Sarai bean Abraim clann da; agus bha ban-oglach Eiphiteach aice, d’am b’ainm Hagar.

2 Agus thubhairt Sarai re h-Abram, Feuch a nis, chum an Tighearna mi o chlann a bhreith: rach a steach, guidheam ort, a dh’ionnsuidh mo bhan-oglaich; theagamh ^{[feudaidh e bhi. ]} gu’m fuigh mi clann leatha-sa. Agus dh’éisd Abram re guth Sharai.

3 Agus ghabh Sarai bean Abraim, Hagar a’ bhan-Eiphiteach, a ban-oglach féin, ’an déigh do Abram còmhnuidh ghabhail deich bliadhn’ ann an tìr Chanaain, agus thug si i d’a fear Abram, gu bhi aige mar mhnaoi.

4 Agus chaidh esan a steach gu Hagar, agus dh’fhàs i torrach: agus ’nuair a chunnaic i gu’n d’fhàs i torrach, bha a ban-mhaighstir tàireil ’na sùilibh:

5 Agus thubhairt Sarai re h-Abram, Biodh m’ea-coir ortsa: thug mi mo bhan-oglach do d’ uchd ^{[asgail. ]} ; agus ’nuair a chunnaic i gu’n d’fhàs i torrach, bha mise tàireil ’na sùilibh: Gu’n d’ thugadh an Tighearna breth eadar mis’ agus thusa.

6 Ach thubhairt Abram re Sarai, Feuch, a ta do bhan-oglach a’ d’ làimh féin, dean ria mar is àill leat ^{[mar is math leat, mar a chìthear dhuit. ]} . Agus an uair a bhuin Sarai gu cruaidh ria, theich i o gnùis.

7 Agus fhuair aingeal an Tighearn i làimh re tobar uisge ’san fhàsach, làimh ris an tobar ’san t-slighe gu Sur.

8 Agus thubhairt e, A Hagair, a bhan-oglaich Sharai, cia as a thàinig thu, agus c’àite tha thu dol? Agus thubhairt ise, Tha mi teicheadh o ghnùis Sharai mo bhan-mhaighstir.

9 Agus thubhairt aingeal an Tighearna ria, Pill a dh’ionnsuidh do bhan-mhaighstir, agus ùmhlaich thu féin f’a làimh.

10 Agus thubhairt aingeal an Tighearna ria, Meudaichidh mise gu mòr do shliochd, agus cha’n àirmhear e thaobh lìonmhoireachd.

11 Agus thubhairt aingeal an Tighearna ria, Feuch, tha thu torrach, agus beiridh tu mac, agus bheir thu Ismael mar ainm air, do bhrì’ gu’n d’éisd an Tighearna re t’an-shocair ^{[re d’ thriobloid. ]} .

12 Agus bithidh e ’na dhuine fiadhaich; bithidh a làmh ’an aghaidh gach duine, agus làmh gach duine ’na aghaidh-san: agus am fianais a bhràithrean uile gabhaidh se còmhnuidh.

13 Agus ghoir i ainm an Tighearn a labhair ria, Thusa Dhe a ta ’g am fhaicinn; oir thubhairt i, An e gu’n robh agams’

14. Uime sin ghoir i do’n tobar, Beer-la-hai-roi; feuch, a ta e eadar Cades agus Bered.

15 Agus rug Hàgar mac do Abram: agus thug Abram Ismael mar ainm air a mhac, a rug Hagar.

16 Agus bha Abram ceithir fichead agus sè bliadhna dh’aois, ’nuair a rug Hagar Ismael do Abram.