CAIB. IV.

AGUS dh’aithnich Adhamh a bhean Eubha, agus dh’fhàs i torrach ^{[thorraicheadh i; dh’fhàs i leatromach. ]} , agus rug i Cain, agus thubhairt i, Fhuair mi duine o’n Tighearna.

2 Agus a rìs rug i a bhràthair Abel: agus bha Abel ’na bhuachaille chaorach, ach bha Cain ’na threabhaiche fearainn ^{[talmhainn. ]} .

3 Agus tharladh ^{[thachair; bha e. Eabh.]} ’an ceann lài àraidh ^{[àraid. ]} , gu’n d’ thug Cain do thoradh an fhearainn tabhartas ^{[tiodhlac, ofrail. ]} do’n Tighearna.

4 Agus thug Abel mar an ceudna do cheud-ghinibh a thréid, agus d’an saill: agus bha meas aig an Tighearn air Abel agus air a thabhartas:

5 Ach air Cain, agus air a thabhartas, cha robh meas aige. Agus bha Cain fuidh throm fheirg ^{[làn feirge. ]} , agus thuit a ghnùis ^{[luidh gruaim air. ]} .

6 Agus thubhairt an Tighearna re Cain, C’ar son a tha fearg ort? agus c’ar son a thuit do ghnùis?

7 Ma ni thu gu math, nach gabhar riut? agus mur dean thu gu math, aig an dorus tha peacadh ’na luidhe. Agus riutsa bithidh a thogradh, agus bithidh uachdranachd agad air.

8 Agus labhair Cain re h-Abel ^{[bha focail eadar Cain agus Abel. ]} a bhràthair: agus ’nuair a bha iad ’sa’ mhachair ^{[’san fhaiche, ’sa’ mhagh. ]} , dh’éirich Cain suas ’an aghaidh Abeil a bhràthar, agus mharbh se e.

9 Agus thubhairt an Tighearna re Cain, C’àit’ am bheil Abel do bhràthair? agus thubhairt esan, Cha’n ’eil fhios agam ^{[Cha’n aithne dhamh, cha’n fhiosrach mi. ]} . Am mise fear-gleidhidh mo bhràthar?

10 Agus thubhairt esan, Ciod a rinn thu? Tha guth fola do bhràthar ag éigheach riumsa o’n talamh.

11 Agus a nis tha thu mallaichte o’n talamh, a dh’fhosgail a bheul a ghabhail fola do bhràthar o d’ làimh.

12 ’Nuair a shaoithricheas tu ’n talamh, cha toir ^{[cha doir, cho tabhair. ]} e dhuit a so suas a neart. A’t’ fhògarach agus a’ t’fhear-fuadain bithidh ^{[biaidh. Eir.]} tu air an talamh.

13 Agus thubhairt Cain ris an Tighearna, Is mò mo pheanas na gur urrainn mi ghiùlan ^{[’Smò mo choire na gu’m feudar a laghadh dhamh. ]} .

14. Feuch, dh’ fhògair thu mi mach an diugh bhàrr aghaidh na talmhainn: agus o d’ ghnùis-sa folaichear mi, agus bithidh mi m’fhògarach agus a’m’ fhear-fuadain air an talamh; agus tarlaidh gach neach a gheibh mi ^{[dh’amaiseas orm. ]} gu marbh e mi.

15 Agus thubhairt an Tighearna ris, Uime sin ge b’e air bith a mharbhas Cain, nìthear a sheachd uiread do dhioghaltas air ^{[nithear dioghaltas seachd-fhillte air. ]} . Agus chuir an Tighearna comhar’ air Càin, a chum ge b’ e neach a gheibheadh e nach marbhadh se e.

16 Agus chaidh Cain a mach a làthair an Tighearna, agus ghabh e còmhnuidh ann an tìr Nod an taobh an ear do Eden ^{[’san aird an ear o Eden. ]} .

17 Agus dh’aithnich Càin a bhean, agus dh’fhàs i torrach, agus rug i Enoch: agus thog e baile ^{[cathair. ]} , agus ghoir e ainm a bhaile a réir ainme a mhic, Enoch.

18 Agus rugadh do Enoch Irad; agus ghin Irad Mehuiael; agus ghin Mehuiael Metusael; agus ghin Metusael Lamech.

19 Agus ghabh Lamech dha féin dà mhnaoi: b’e ainm a h-aon diubh Adah, agus ainm na mnà eile Sillah.

20 Agus ghin Adah Iabal: b’esan athair na droinge ^{[muintir, dream. ]} a ta gabhail còmhnuidh ’am bùthaibh ^{[bothagaibh, pàilliunaibh. ]} , agus na droinge aig am bheil spréidh.

21 Agus b’e ainm a bhràthar Iubal: b’esan athair nan uile a laimhsicheas clàrsach agus organ.

22 Agus Sillah, rug ise mar an ceudna Tubal-cain, fear-teagaisg gach uile fir-ceird ann an ùmhadh ^{[prais. ]} agus ’an iarun: agus b’i piuthar Thubal-cain, Naamah.

23 Agus thubhairt Lamech r’a mhnaibh, Adah agus Sillah, Cluinnibh mo ghuth, a mhnài Lameich, éisdibh rem’ chainnt: oir mharbh mi duine chum mo lotaidh, agus òganach a chum mo chiurraidh ^{[dhochair. ]} .

24 Ma dhìolar Càin a sheachd uiread, gu deimhin dìolar Lamech a sheachd-deug agus a thri fichead uiread.

25 Agus dh’aithnich Adhamh a rìs a bhean, agus rug i mac, agus thug i Set ^{[Seth. Eabh.]} mar ainm air; oir dh’òrduich Dia, thubhairt i, dhomhsa sliochd eile ’n àite Abeil, a mharbh Cain.

26 Agus do Shet féin mar an ceudna rugadh mac, agus thug e Enos mar ainm air: ’an sin thòisich daoine re gairm air ainm an Tighearna.