CAIB. XLVI.

AGUS dh’imich Israel maille ris gach ni a bh’aige, agus thàinig e gu Beer-seba, agus thug e suas ìobairtean do Dhia athar Isaaic.

2 Agus labhair Dia re h-Israel ann an taisbeanaibh ^{[seallaibh, aislingibh. ]} na h-oidhche, agus thubhairt e, A Iacoib, a Iacoib: Agus thubhairt esan, Tha mi ’n so.

3 Agus thubhairt e, Is mise Dia, Dia t’athar: na biodh eagal ort dol sìos do’n Eiphit; oir ni mis’ a’d’ chinneach mòr thu ’an sin.

4 Théid mise maille riut sìos do’n Eiphit; agus bheir mi mar an ceudna gu cinnteach a nìos thu rìs: agus cuiridh Ioseph a làmh air do shùilibh.

5 Agus dh’éirich Iacob suas o Bheer-seba: agus thug mic Israeil leo Iacob an athair, agus an clann bheag, agus am mnài, anns na carbadaibh a chuir Pharaoh g’a ghiùlan.

6 Agus ghabh iad an spréidh, agus am maoin, a fhuair iad ann an tìr Chanaain, agus thàinig iad do’n Eiphit, Iacob, agus a shliochd uile maille ris;

7 A mhic, agus mic a mhac maille ris, a nigheana, agus nigheanan a mhac, agus a shliochd uile thug e maille ris do’n Eiphit.

8 Agus is iad so ainmeanna chloinn Israeil, a thàinig do’n Eiphit, Iacob agus a mhic: Reuben, ceud-ghin Iacoib.

9 Agus mic Reubein; Hanoch, agus Phallu, agus Hesron, agus Carmi.

10 Agus mic Shimeoin; Iemuel, agus Iamin, agus Ohad, agus Iachin, agus Sohar, agus Saul mac Ban-chanaanaich.

11 Agus mic Lebhi; Gerson, Cohat, agus Merari.

12 Agus mic Iudaih; Er, agus Onan, agus Selah, agus Phareds, agus Serah: ach fhuair Er agus Onan bàs ann an tìr Chanaain. Agus b’iad mic Phareds, Hesron, agus Hamul.

13 Agus mic Isachair; Tola, agus Phubhah, agus Iob, agus Simron.

14 Agus mic Shebuluin; Sered agus Elon, agus Iahleel.

15 Is iad sin mic Leaih, a rug i do Iacob ’am Padan-aram, maille r’a nighinn Dinah: b’iad uile anman a mhac agus a nigheana tri-deug ’ar fhichead.

16 Agus mic Ghaid; Siphion, agus Hagai, Suni, agus Esbon, Heri agus Arodi, agus Areli.

17 Agus mic Aseir; Imnah, agus Isuah, agus Isui, agus Beriah, agus Serah am piuthar. Agus mic Bheriaih; Heber, agus Malchiel.

18 Is iad sin mic Shilpaih, a thug Laban d’a nighinn Leah; agus rug i iad sin do Iacob, eadhon sè anmanna deug.

19 Mic Racheil mnà Iacoib; Ioseph, agus Beniamin.

20 Agus rugadh do Ioseph ann an tìr na h-Eiphit, Manaseh agus Ephraim, a rug Asenat nighean Photipheraih sagairt Oin dha.

21 Agus b’iad mic Bheniamin; Belah agus Becher, agus Asbel, Gera, agus Naaman, Ehi, agus Ros, Mupim, agus Hupim, agus Ard.

22 Is iad sin mic Racheil, a rugadh do Iacob: na h-anman uile, ceithir-deug.

23 Agus mic Dhain; Husim.

24 Agus mic Naphtali; Iahseel, agus Guni, agus Iedser, agus Sillem.

25 Is iad sin mic Bhilhaih, a thug Laban d’a nighinn Rachel, a rug i do Iacob: na h-anman uile, seachdnar.

26 Na h-anman uile a thàinig le Iacob do’n Eiphit, a thàinig a mach as a leasruidh, a thuilleadh air mnaibh mhac Iacoib; b’iad na h-anmanna so uile tri fichead ’s a sè.

27 Agus mic Ioseiph a rugadh dha ’san Eiphit, bu dhà anam iad: uile anmanna thighe Iacoib, a thàinig do’n Eiphit, bu tri fichead ’s a deich iad.

28 Agus chuir e Iudah roimhe gu Ioseph, chum as gu’n d’thugadh e fios dha teachd ’na làthair ann an Gosen ^{[chum gu’n seòladh e air aghaidh e gu Gosen. ]} ; agus thàinig iad gu fearann Ghosein.

29 Agus bheartaich Ioseph a charbad, agus chaidh e suas ’an coinneamh Israeil athar gu Gosen; agus nochd se e féin da, agus thuit e air a mhuineal, agus ghuil e air a mhuineal rè tamuill.

30 Agus thubhairt Israel re Ioseph, Faigheams’ a nis bàs, o chunnaic mi do ghnùis, do bhrìgh gu bheil thu fathast beo.

31 Agus thubhairt Ioseph r’a bhràithribh, agus re teaghlach athar, Thèid mise suas, agus cuiridh mi ’n céill do Pharaoh, agus their mi ris, Tha mo bhràithrean, agus teaghlach m’ athar, a bha ann an tìr Chanaain, air teachd a’m’ ionnsuidh:

32 Agus is buachaillean ^{[aodhairean. ]} na daoine, oir bu luchd-spréidhe ^{[àirich. ]} iad; agus thug iad leo an treudan

33 Agus tarlaidh ’nuair a ghairmeas Pharaoh oirbh, agus a their e, Ciod is ceird duibh?

34 Gu’n abair sibhse, Bu luchd-spréidhe do sheirbhisich o’r n-òige eadhon gus a nis, sinn féin agus mar an ceudna ar n-aithreacha; chum as gu’n gabh sibh còmhnuidh ann am fearann Ghosein, oir is gràineileachd do na h-Eiphitich gach buachaille spréidhe.