BITH-EOLAS

A’ Chealla, Gintinneachd is Mean-fhàs

le Raghnall MacLeòid

Roinn an Lus-eòlais, Oilthigh a’ Chaisteil Nuaidh

eadar-theangaichte le Ruaraidh MacThómais

Roinn nan Cànanan Ceilteach, Oilthigh Ghlaschu

GAIRM Glaschu 1976

Roimh-ràdh

Nuair a chuir Raghnall MacLeòid na ciad chaibideilean thugam de na sgrìobh e air a’ chuspair Bith-eòlas, gu an eadar-theangachadh gu Gàidhlig, is gann gu robh sgrìobhadh sam bith againn nar cànain fhìn air a’ chuspair. Ach bha mi riamh gu làidir de’n bheachd gu bheil a’ Ghàidhlig glé chomasach air rudan ùra a thoirt a-steach thuice fhéin, agus gur h-e eachdraidh thruagh nan trì ceud bliadhna chaidh seachad a bha gar bacadh anns an dòigh seo, ’s gar stiùireadh cho tric gu beachdan is modhan seann-fhasanta. Mar sin cha bu ruith ach leum gu dhol an sàs anns an obair seo.

Is dòcha gun deach an ruith gu dabhdail an ceann greise. Chan e obair fhurasda a tha ann an eadar-theangachadh de’n t-seòrsa seo, ged a tha i inntinneach. Tha deagh fhios agam gum bi pàirt de’n eadar-theangachadh doirbh, is gum bi grunn de na facail ùra a dheilbh mi trom no mì-fhreagarrach an dòigh eile. Thig atharrachadh an sud ’s an seo mar a thig luchd-sgrìobhaidh eile chun a’ chuspair seo, agus gu cuspairean eile tha an dlùth-cheangal ris. Ach tha mi’n dòchas gu bheil toiseach fàis againn an seo, agus gum faic sinn iomadh cuspair eile ris nach robh dùil, air a làimhseachadh tre Ghàidhlig. Oir tha làn chòir aig luchd na Gàidhlig air seilbh a bhi aca anns a’ bheatha ’s anns an eòlas ris a bheil an leabhar seo a’ déiligeadh.

RUARAIDH MACTHÓMAIS