Meadhonag, Cile agus Flagellum

Gheibhear na meadhonagan, ann an ceallan ainmhidhean agus lusan àrsaidh leithid seòrsachan feamad agus rainich. Cha d’fhuaireadh lorg orra fhathast ann an ceallan nan lusan adhartach, leithid an darach, an leamhan, an neòinean agus am beàrnan-brìde. Tha gnothaich aca ri roinn nan ceallan sin anns am faighear iad. Tha structair na meadhonaig coltach ri structair flagellum, a’ chuip a tha a’ toirt air cuid de cheallan, leithid ceallan-sìl, gluasad. Tha seòrsa nas lugha de flagellum, air a bheil cile, ri lorg gu tric ann am pailteas, ann am móran sheòrsachan de cheallan, agus cuid de cheallan an duine ’nam measg. Gheibhear iad, mar eisimpleir, air na ceallan a tha a’ lìnigeadh slighean na h-analach, is iad a’ toirt air falbh bloighean dust is smùir a thàinig a-steach air an anail. Tha smocaigeadh a’ milleadh nan cile sin, no gan cur fo phairilis, air chor ’s nach eil dust agus nithean fuadain eile air an toirt air falbh. Tha seo a’ dèanamh dragh do dhuine, ’s a’ toirt air a bhith casdaich.