Beul na h-Oidhche

Am beul na h-oidhche
Le gealach chruinn ann,
Tha ’n dràst’ nam inntinn
O chuimhne m’ òige.

Mo mhàthair ghràdhach
A’ dol dhan bhàthaich
A bhleoghan na bà ann,
’S am bàrd le lòchran.

Bhiodh naosg an uair sin
Air sgèith mun cuairt oirnn,
’S a’ siubhal luath
Dèanamh fuaim mar òran.

Bhiodh traon gu h-ìosal
Sna claisean feurach
Le torghan cianail
Taobh shìos an eòrna.

Bha m’ inntinn riaraicht’
San oidhche dhìomhair,
Mo shaoghal grianach,
Gun sgeul’ air dòrainn.

Tha beul na h-oidhche
A-nis gam chlaoidh-sa,
Ach na feasgair ghrinn ud
Bidh chaoidh nan sòlas.