“The Ghost Book, ”le Alasdair Alpin MacGriogair.
Clo-bhuailte, le Raibeart Hale. 18/ -.

Cha chuala sinn móran mu Alasdair Alpin MacGriogair bhon a bhàth e a chliù ann am peileachan liùnn Steòrnabhaigh bho chionn beagan bhliadhnachan. Ach cha robh e ’na thàmh. Gu dearbha, chan eil móran sgrìobhadairean ann am Breatainn an diugh aig am bheil an coimeas labhairt a tha aige, agus, bhon a chuir e amach a leabhar mu na h-Eileanan a Siar, chuir e co-dhiùbh dà leabhar eile chun na beairt-bhualaidh.

Tha e duilich a thuigsinn dé a thachair do MhacGriogair. An uair a b’aithne dhuinn an toiseach e, bha e ealanta leis a’ pheann agus leis a’ chamara, agus bha móran de na ciad leabhraichean a sgrìobh e ’nan tlachd an leughadh. Ach, bho chionn greise, tha gob a phinn air maoladh, agus tha na leabhraichean a tha e a’ cur amach a’ dol bhuaithe ’s a’ dol bhuaithe. A nise, tha e air tionndadh ri cuspair air an do rinneadh luadh tana fada mun do rugadh e. Na taibhsean.

Eadhon an diugh, tha feadhainn—agus daoine glice ’nam measg—a’ deanamh leth chreidsinn air taibhseireachd ’s air dà shealladh, ach, mar is trice, tha eadhon an fheadhainn as dìorrasaiche caran sàmhach mu’n chùis, agus tha leisg orra móran a ràdha gun fhios nach deanar amadain dhiùbh. Ach chan e sin do MhacGriogair e. Theid esan, mar a their am facal Beurla, an comhair a chinn far an

teid na h-ainglean air an corra-biod, agus, anns an leabhar so, tha e a’ cur fo’r comhair eachdraidhean mhanaidhean agus thaibhsean cho dàna ’s a chuireas Ollamhan eachdraidh Chuil-fhodair.

Tha an leabhar a’ déiligeadh ris an rìoghachd, gu léir—bho Mhaighdean Ghlinn Dùrair (air an do chuir e fhéin eòlas tràth aon mhadainn) gu seann tigh Hampton Court far an robhas a’ faicinn taibhs gille frithealaidh bho linn nan creach. Sgrìob thall ’s a bhos, ach ’se an rud as iongantaiche, nach eil e uair sam bith a’ cur teagaimh ann an dad. Chan eil. Tha a h-uile dad cho fìor ris a’ Bhìobull, agus, mar as trice, fóghnaidh e do’ n leughadair gum bheil MacGriogair ’gan ràdha.

Their sinn so as leth an leabhair. Tha e a’ toirt leis cuid de na sgeulachdan thaibhsean as fheàrr a th’againn, agus bithidh feadhainn againn toilichte iad a bhith cruinn còmhla air ar sgeilpidh eadar clàran aon leabhair. Tha taibhs Loch-Buidhe an so. Tha sgeul ann air làraich spògan a’ choin shìth air tràigh Loisg-an-tìr anns na Hearadh. Tha iomradh ann air comhart a’ choin shìdh air cladach Haoineis ann an Tiridhe. Mas toigh leibh sgeulachdan de’n t-seòrsa sin, gheibh sibh an so iad. Agus chan e sin uile e. Ma tha sgeulachdan matha agaibh fhéin, tha MacGriogair a’ toirt cuiridh dhuibh an cur thuige, agus faodaidh sibh am fàgail aige-san gus an cur ann an leabhar. Tha e math air sin a dheanamh.

[Sanas]