An Sgeilp Leabhraichean

“The Highlander. ”Le Raibeart Kemp. Clo-bhuailte Duckworth. 8/6.

Is ann do dh’Arcaibh a bhuineas Raibeart Kemp—mac ministeir. An uair a dh’fhàg e Oilthigh Obar-Dheadhain chaidh e dh’obair chuna a’ Mhanchester Guardian, am paipear as fheàrr am Breatuinn, ’s dòch airson dreuchd an sgrìobhaidh ionnsachadh. An uair a dh’fhàg e am paipear chaidh e chun a’ Bh. B. C. agus b’ann an sin a thòisich e a’ cur ùidh ann an nithean Gaidhealach, oir bha an seòrsa oibreach a bh’aige ’ga thoirt a tuath gu math tric.

Fhad ’s a bha e anns a’ Bh.B. C. rinn e ainm mór dha fhéin mar fhear sgrìobhaidh dhealbh-chluichean, agus, mu dheireadh thall, dh’fhàg e oifis a’ chraobh-sgaoilidh agus thòisich e a’ sgrìobhadh air a shiuc fhéin. An toiseach lean e ris na dealbh-chluichean, ach, bho chionn trì bliadhna, thionndaidh e ris an nobhal agus sgrìobh e“The Malacca Cane”a rinn uabhasach math. An uiridh sgrìobh e“The Maestro”air an tug sinn tarraing ann an Gairm. Agus a nise, tha e air am fear ùr so, “The Highlander, ”a chur an clò.

Tha na ceudan eòlach air an sgialachd—sgialachd mu nighinn òig a thainig a Dhùn-éideann mar shearbhanta as clachan Gaidhealach, agus, mu’n canadh i “sneachda” bha i ann an teas meadhon muirt. Eadar i fhéin agus am polasman Gaidhealach a bhiodh a’ tighinn do’n chidsin an tòir air barrachd is tea, thugadh am murtair gu lagh.

Their sinn gu bheil na ceudan, eadhon na mìltean eòlach air an sgialachd, a chionn agus gum facas Lennox Milne, leatha fhéin air a’ chlàr-cluiche, a’ deanamh dealbh-chluich air an robh“The Heart is Highland. ”So agaibh, cha mhór facal air an fhacal, sgeul na cluiche sin.

Tha an leabhar fìor shaor aig ochd is sia sgillinn. Is airidh e a h-uile bonn-a- sia de’n t-suim sin, agus cuiridh e seachad feasgar dhuibh cho math ’sa a chuir sgialachd muirt a leugh sibh riamh.

A nise, chan àbhaist dhuinn a bhi ag ràdha móran mu sgialachdan muirt anns na duilleagan so, ach tha sinn a’ toirt tarraing air an leabhar so, agus air Raibeart Kemp fhéin, a chionn agus gu bheil gearain againn.

Cha robh an nobhal ann an Alba ann an staid riamh cho dona ri staid an latha ’n diugh. Mar sin, is e mullach na truaighe e nach ei’ daoine, leithid Kemp, aig a bheil an eanchainn agus an t-alt, al deanamh oidhirp air nobhal as fhiach an t-saothair a thoirt dhuinn.

[Sanas]

Mar nobhal aotrom tha an leabhar so math. Ach dh’fhaodadh e a bhith suidhichte ann an Yugoslavia no ann an Cornwall airson na tha ann de rud fìor Albannach.

Càite a bheil Lewis Grassic Gibbon an latha ’n diugh? Càite eadhon a bheil Iain Mac a Phearsain, no Iain MacDhùghaill Hay, no Seòras Dùbhghlas Mac’IlleDhuinn? Carson air an t-saoghal nach toir an dùthaich so dhuinn aon eile dhiubh sin.

Dheanadh Kemp leabhar math agus leabhar a b’fhiach an t-saothair nam fiachadh e. Dé mu na làithean air a bheil cuimhne aige ann an Arcaibh? Bha brìgh annta, agus tha an t-alt aige gus a’ bhrìgh a thoirt am follais. Tha sinn an dòchas nach eil an so ach leabhar a chumas a’ phoit bhuntàta air an t-slabhraidh fhad ’s a tha e ag ullachadh an leabhair mhóir.

F. McD.