Air An Spiris

THA sinn eòlach air gliog-glag nan teangannan aig Mòdan a’ Chomuinn Ghaidhealaich. Mar is trice ’s e Beurla a tha anns an spàl, ged a bhios fuidheagan de Ghàidhlig a’ tuiteam as a’ bheairt an dràsda ’s a rithist. Ach gabhaidh rud ciallach a ràdh am Beurla cho math ri ann an Gàidhlig.

Chaidh sin a ràdh aig Mòd na bliadhna so—le muinntir Inbhirnis, gu h-àraidh le Pròbhaist a’ bhaile, agus le luchd-sgrìobhaidh anInverness Courier.Is fhada bho bha e so-fhaicsinn nach eil earbsa aig Gaidheil na Gaidhealtachd á Comunn Gaidhealach a tha de’n bharail gu bheil a’ ghrian ag éirigh ’s a’ laighe ann an Abhainn Chluaidh. Thuirt am Pròbhaist Wotherspoon, agus anInverness Courier,gu bheil a làn thìde aig a’ Chomunn dachaidh a lorg nas fhaisge air a’ Ghaidhealtachd. Tha sinn a’ cur ar làn aonta ris a sin, ach cha bhiodh ann ach a’ chiad cheum. Cha chumar a’ Ghàidhlig beò glé fhada le bhith cracaireachd m’a deidhinn timcheall air bòrd ann an Glaschu na an Inbhirnis. ’S e gnìomharran a tha a dhìth oirnn.

Thuirt Fear-stiùiridh an Fhòghluim an Siorrachd Inbhirnis (aig àm a’ Mhòid) gu robhas a’ tòiseachadh a’ teagasg na cloinne ann an Gàidhlig ann an àireamh de sgoilean na Gaidhealtachd. Tha sinn an dòchas gun tòisichear air an obair so am bliadhna.

Tha suas ri ceithir bliadhna bho ghabh An Comunn os làimh leabhraichean Gàidhlig freagarrach do chloinn òga (le dealbhannan dathte annta) a chur ’nar seilbh. Tha iad trì bliadhna ro fhada gun sin a thoirt gu buil, is leth-cheud bliadhna air dheireadh ann a bhith ’ga chur rompa mar dhleasdanas. Chan fhuirich am bàs idir ri là math. Ma tha iad a’ feitheamh ri carachadh nan uisgeachan, thoireadh iad an aire gur h-ann air caochan nan Garbh-chrìoch a tha an sùil, is nach ann air ruaimle a’ Chelbhin.