An Sgeilp Leabhraichean

Arctic Living le Robert Jack. Clo-bhuailte le Hodder & Stoughton. 12/6.

Rugadh Robert Jack ann an Glaschu, mac do chlachair. Ged a bha e na bu mheasaile air ball-coise na bha e air sgoileireachd, chaidh e do’n Oilthigh le ministearalachd na h-Eaglais Albannaich fa-near dha. Ach bha ’n diogladh anns na casan fhathast, agus an uair a fhuair e cuireadh a dhol amach a dh’Iceland a theagasg ball-coise do dh’òigridh an eilein, cha bu ruith leis ach leum. Agus sin a dh’aindeoin ochanaich a mhàthar.

Fhad ’s a bha e ann an Iceland ghabh e ùidh mhór ann an cànan an eilein, agus, gu h-àraidh, ann am beul-aithris an t-sluaigh. Ged a thainig e dhachaidh, cha b’ urrainn dha tarraing Iceland a leigeil dheth, agus thill e ann. An turus sin dh’ fhuirich e, agus, an ceann greise, chaidh e ’na oileanach do dh’ Oilthigh Reykjavik. Bha sin ann an 1939. Bha an cogadh air tòiseachadh agus chan fhaigheadh e air falbh ged a dh’ fhiachadh e.

B’ e bun a bh’ ann gun do dh’ ionnsaich e Icelandic, agus chaidh a phòsadh mar mhinistear ris an Eaglais Lùtaranaich. An uair a fhuair e coimhthional, cha b’ ann air mórthir Iceland a fhuair e e, ach air Eilean Ghriomasaidh a tha a tuath air a’ Chearcal Deighe, agus a tha air aonaranachadh bho’n chòrr de’n t-saoghal le gaoith ’s le gaillinn fad leth na bliadhna. Is ann mu na bliadhnaichean a chuir e seachad ann an Griomasaidh a tha a leabhar. Chan eil ach aon leabhar eile mu’n àite.

Tha Jack a’ sgrìobhadh le peann coibhneil, tuigseach. Tha gaol a chridhe aige air na Griomasaich, ach chan eil sin a’ ciallachadh nach eil e a’ faicinn nam faoineasan beaga a tha annta mar shluagh.

Chan eil ach trì fichead duine air an eilean, agus tha iad uile a’ tighinn beò air croitearachd ’s air iasgach. Is e am ministear am maighstir-sgoile cuideachd, agus, gu tric is e an dotair. Tha mansa agus fearann aige, agus ged a tha na h-eileanaich math dha, feumaidh e a chuid tuathanachais fhéin a dheanamh, agus àite a ghabhail ’nam measg mar fhear aca fhéin. Cha robh sin furasda, an toiseach, do dh’ fhear a thogadh ann an Glaschu, ach bha e ’na chuideachadh dha gun do phòs e caileag Icelandach a thug dha eòlas air an àite ’s air gnathasan an t-sluaigh.

Is e an rud as iongantaiche mu’n leabhar gum mionnaicheadh sibh, mura robh fios agaibh, gur ann mu aon de na h-eileanan beaga Gaidhealach a tha e. Mu Ghriomasaidh againn fhéin ’s dòcha. Uair an déidh uair, an uair a bhithinn ’ga leughadh, thug e air ais thugam

cuimhne air làithean anns na Hearadh mar a bha iad ’nam oige. Gu h-àraidh na h-oidhcheanan céilidh. Tha blas na fìrinne air a h-uile facal—an fhìrinn a tha a’ buileachadh fìor thuigse air an àite air an leughadair.

Chan eil duine air an t-saoghal a chanas gur litreachas mór a tha ann an“Arctic Living. ”Ach is fhiach ùnnsa sìmplidheachd pùnnd móralachd. Is e tha so leabhar nach leig mise far mo sgeilpe, oir tillidh mi ris an uair a bhios am baile ’ga mo mhùchadh agus a bhios balgam de àile na beatha nàdurraich a dhìth air m’anam. F. McD.