Air An Spiris

AN turus so tha Gairm còrr agus mìos air deireadh, rud nach do thachair riamh roimhe. Thachair so a chionn agus gu robh sinne cho trang le chéile ri ar n-obair làitheil agus nach robh rian againn coinneachadh gus an clò a dheilbh sinn fhighe.

Tha e duilich uaireannan do ar luchd-leughaidh a thuigsinn cho trom agus a tha an obair a tha co-cheangailte ri ràitheachan de’n t-seòrsa so. Chan e gu bheil sinn a’ gearain, oir tha an tlachd a tha sinn a’ faotainn gu tric nas motha na’n tàire. Ach tha aon dòigh anns bu toil leinn cuideachadh iarraidh air ar leughadairean… .

Mar a tha na bliadhnachan a’ dol seachad, tha e a’ fàs caran nas dlighe dhuinne luchd-sgrìobhaidh ùr a lorg, agus, mar a tha fios agaibh, riamh bho thòisich sinn, tha sinn air a bhi strì ri Gairm a chumail ùrair, beòthail.

Tha sinn daonnan a’ bleideachadh nan càirdean air am bheil sinn eòlach, gus am bheil iad buailteach fàs leamh dhinn—ged nach d’ thuirt duine sin rinn fhathast an clàr an aodainn. Agus tha sinn a’ dol rud-eigin ’nar bodaich—an cunnart lorg a chall air sgrìobhadairean òga a tha ag éirigh suas.

Sin far an urrainn dhuibh-se ar cuideachadh. Ma tha sibh fhéin de ’n ghinealaich sin mu dheireadh, cuiribh thugainn sgialachd no bàrdachd no eile bho àm gu àm. No mas aithne dhuibh duine de ’n ghinealaich sin cuiribh thugainn an t-ainm agus ni sinne an iarraidh.

Chan ìongnadh ged a bhitheamaid a’ dol ’nar bodaich! Tha an àireamh so a’ co-dhùnadh na naoidheamh bliadhna de Ghairm. Tha naoi bliadhna bhon a thuirt sinn ruibh— “Bheir sinn dhuibh co-dhiùbh dà bhliadhna de ràitheachan ùr Gàidhlig… .” A nise, air starsach na deicheamh bliadhna tha an aon fhonn againn.

Chan eil sinn a’ deanamh uaill as Gairm a chionn gun do mhair e na b’ fhaide na bha dùil aig móran. Is ann a tha sinn taingeil dhoibhsan a rinn so comasach. Iadsan a sgrìobh sgrìobhaidhean. Iadsan a reic na ceudan àireamh. Iadsan a cheannaich agus a leugh.

Aig deireadh aon bhliadhna agus aig toiseach t’ éile, tha sinn a’ toirt taing dhaibh sin uile, agus ’gan sparradh chun a’ bharrachd dìchill.