Aitreabh Nan Gaidheal

AN drochaid. Agus anuairsin Aitreabh nan Gaidheal air Sràid Elmbank. A nise Aitreabh ùr air Sràid Berkeley faisg air Talla an Naoimh Aindreis far am bheil na cuirmean móra Gàidhlig a h-uile Oidhche h-Aoine fad a’ Gheamhraidh.

Ach feumar a chuimhneachadh gu bheil feuman a’ Ghaidheil ag atharrachadh. Tha an Gaidheal òg a thig a Ghlaschu an diugh an tòir air goireasan air nach robh guth aig a’ ghinealaich roimhe. Chan e mhàin àite coinneachaidh a tha dhìth air. Chan e mhàin àite céilidh. Ach club tlachdmhor far an toir e a chaileag no a charaid airson feasgar taitneach—eadhoin airson gloinne liùnn. Mura faigh e comhartachd agus goireas anns an Aitreibh ùir theid e air an tòir a dh’ àiteigin eile.

Ach ge be dé a thachras chan urrainn dhuinn gun uaill a bhith againn ás an fheadhainn a shoirbhich ás leth na h-Aitreabh so. Bha uair a bha dùil aig móran nach gabhadh an t-airgiod mór a bha dhìth togail gu bràth. Ach chaidh a thogail. Agus a thaing sin dhoibhsan a shoirbhich gun dùil ri taing no duais—air an ceann Iain Moireach. An so shuas tha an taing as motha a gheibh iad—Aitreabh ùr Ghaidhealach a bhios ’na carragh-cuimhne dhoibhsan mar a bhios i ’na carragh-cuimhne do Ghaidheil eile a thug na bh’ aca ann an aobhar ciatach.

Anns an ath àireamh de Ghairm tha sinn an dòchas gun teid againn air làn iomradh (le deilbh de gach seòrsa) a thoirt air AITREABH NAN GAIDHEAL.