Anns An Fhasan

LE EIRIC NIC LEOID

THA am fuachd air a thighinn oirnn agus tha cuid de chaileagan air na geansaidhean boban a chur orra airson aon gheamhradh eile. ’S iad sin na caileagan a bhios a’ feitheamh na tìde blàithe le fadachd, a chionn gum bheil fios aca nach eil iad a’ coimhead cho grinn ’s a dh’ fhaodadh iad le na còtaichean “plasdaig” agus na brògan trom. Ach tha feadhainn eile cho bòidheach agus cho sprogail anns a’ gheamhradh ’s a tha iad aig àm sam bith eile de ’n bhliadhna. Oir ’s iad sin na caileagan glic a cheannaich cuid de ’n aodach bhlàth a tha anns an fhasan an tìde so. Tha mise an dràsda a’ dol a dh’ innse dhuibh mu ’n aodach so.

[Dealbh]

Tha geansaidhean ann an dràsda a tha blàth agus sgiobalt. Ri coimhead riu shaoileadh tu an toiseach gur e geansaidh pólo fo geansaidh le amhaich “V” a bh’ ann. ’Sann a tha iad air pólo a chur am broinn “V” ann an aon gheansaidh. Gheibhear a fear so ann am móran dhathan agus gheibhear cuideachd amhaich pólo ’na aonar a dh’ fhaodadh tu cur am broinn amhaich geansaidh “V” sam bith a tha agad, gus nach bi a’ ghaoth a’ séideadh mu d’ amhaich.

Mas e briogais as trice a bhios ort troimh an tìde fhuair chunnaic mi, an là eile ann an uinneig bùtha, aodach còmhdachaidh a chòrdas riut gu cinnteach. B’ e cleòca blàth tartan ann a stuth tiugh clòimh a bh’ ann. Cuiridh mi ’n geall nach fhaic thu móran dhiùbhsan timcheall agus chan fhaca mi dad cho stoilleis riu.

Tha fios agad fhéin ma bhios do chasan blàth gun cùm sin an còrr dhiot blàth. Geallaidh mi dhut gum bi bootees suas gu na calpan air a h-uile nighean anns an fhasan am bliadhna—gu fìrinneach, cheannaich mi-fhéin paidhir dhiubh ann bho chionn ghoirid. Gheibh thu asuedeiad agus ann a leathair—feadhainn dhubh, feadhainn dhonn, feadhainn gheal agus feadhainn dhearg, a ruigeas suas gu do ghlùinean mas toil leat, le sàilean ma dhà òirleach a dh’ àird.

Bhiodh dreas clòimhe mar so feumail cuideachd. ’Se fasan a’ gheamhraidh so air dreasaichean, pìos dhe ’n aodach a bhith mu d’ amhaich mar scarf. Tha iad blàth agus aig an aon àm tha iomadh dòigh air am faod thu an ceangal no suaineadh gus atharrachadh beag a thoir air an aodach.

Bhoill, a chaileagan, ma ghabh sibh mo chomhairle-sa bha sibh blàth agus bòidheach fad a’ gheamhraidh agus an ath thìde bidh earrainn fasain eile ann ag innse dhuibh dé an t-aodach as fheàrr airson an earraich.