Aobhar Coillteir

LE TOMAS QUEEN

ANN an Alba, tha am fearann a tha fo chraobh a’ meudachadh gach bliadhna. Mar sin feumar barrachd dhaoine fhaighinn gus na coilltean ùra a stéidheachadh agus coimhead ás an déidh—gan glanadh, gan gearradh, is gan tanachadh agus a’ cur nan craobhan òga. Tha sgoiltean aig Coimisean nan Coilltean far am faigh gillean òga stiùireadh anns an obair chudthromach so. Tha iad air an suidheachadh anns na coilltean móra agus tha na gillean a’ fuireach anns an sgoil fhads a tha iad ag ionnsachadh.

Mum bi gille air a ghabhail ann an té de na sgoiltean so, feumaidh e an toiseach dà bhliadhna chur seachad ag obair ann an coille-ionnsachaidh agus an sin ceasnachadh fhiachainn a dh’ fhaicinn am bheil e freagarrach gus a dhol air adhart. Feumaidh an gille a bhith eadar naoi bliadhna deug agus cóig bliadhna fichead a dh’ aois. Fad an dà bhliadhna a bhios an gille anns a’ choille ionnsachaidh, seallar dha ciamar a ni e feansadh, claisearachd, cur nan craobh, agus gnìomhan eile co-cheangailte ris an obair. Feumaidh e e fhéin a dheanamh fiosrachail mu na h-innealan a bhios e a’ cleachdadh agus a’ leigeil fhaicinn gum bheil ùidh aige anns an obair. Bidh am prìomh-choilltear a’ gabhail beachd air a’ ghille fad na h-ùine agus aig ceann an dàrna bliadhna, innsidh esan dhà ma tha e freagarrach airson a

Anns an sgoil, tha móran nithean air an teagaisg—mar a tha luibh-eòlais choilltean, deifir ùir, casgadh-teine, tomhais fearann, leughadh-cairt—agus aig an aon àm, tha an luchd-ionnsachaidh ri obair a-muigh anns a’ choille. Tha ceasnachaidhean aig an luchd-ionnsachaidh ri fhiachainn o àm gu àm agus aig crìoch na cùrsa, ma tha iad air sin a dhèanamh gu dòigheil agus ma tha iad sgileil anns an obair, tha iad a’ faighinn Teisteanas Coillteir. Aon uair ’s gum bheil so aige faodaidh an coilltear obair fhaighinn chan ann a-mhàin aig Coimisean nan Coilltean ach an coille prìmheadach no ann an coilltean thall thairis.

Ma tha an coilltear a’ tòiseachadh còmhla ris a’ Choimisean ’s àbhaist dha anns a’ chiad dhol a-mach a bhith ’na fhear-cuideachaidh maille ri prìomh-choilltear. Tha e a’ coimhead ás déidh earrann de ’n choille an toiseach agus mean air mhean tha e a’ gabhail os làimh beagan de riaghlas na h-obrach. Gheibh am fear-cuideachaidh gu bhith ’na choilltear agus an sin ’na phrìomh-choilltear mas fhiach e e, agus nuair a tha àite ann dha.

Ma tha sibh airson tuilleadh fios fhaighinn mu’n chùis, sgrìobhaibh gu“The Chief Education Officer”, Forestry Commission, 25 Saville Row, London, W.1.