Anns An Fhasan

le ERIC NIC LEOID

THA an t-earrach air a thighinn ma dheireadh agus tha na h-aodaichean ùra a tha anns na bùithtean a’ cur ás ar cuimhne an Geamhradh a tha seachad.

Tha deise ghrinn anns an fhasan an dràsda a dh’ aon mhathadh airson caileagan òga. ’Se an “tabard suit” a th’ ac air. Tha an t-seacaid mar còta goirid air fhàgail fosgailte aig na taobhan le pìos beag aodaich aig gach taobh gan cumail còmhnard ’nan àit. Gheibhear so ann a “suedette,” an clò agus ann an iomadh aodach eile. Tha an deise so gu math blàth le geansaidh fodha.

Tha sgiortaichean le galaisean glé chumanta air caileagan òga a nis. Gheibhear iad anns a h-uile aodach air an smaoinich thu agus feadhainn aca le blous agus“tie. ”

Mas e dreasa a tha thu a’ lorg tha tè neo-chumanta air a thighinn gu Alba á Ameriga. Is e dreasa shìmplidh a th’ innte le sgiorta chòmhnard, ach tha dà sgòd aodaich a’ còmhdach na sgiorta gu léir a’ fàgail sgoilt aig gach taobh. Air feadhainn de na dreasaichean tha cnot beag air gach taobh aig a’ cheann tha shuas de na sgoiltean. ’Sann ainneamh a tha mi a’ faicinn dreasa cho brèagha ris an té so.

Tha na bùithtean bhròg air stoc ùr an earraich a chur a-steach cuideachd. Tha bàrr nas cruinne na ’s àbhaist air na brògan so agus chan eil móran cùlaibh annta. ’Se strap no dhà cho caol ri iallan bròig a bhios gan cumail ort agus tha sàil na cuid as motha dhiùbh nas leotha aig a’ bhonn na tha iad anns a’ mheadhon.

Bhoill, sin cuid de fhasanan an earraich agaibh agus ma cheannaich sibh feadhainn dhiubh tha mi an dòchas gum faigh sibh tìde mhath ach an toir sibh beag no mór de fheum asda.