Moch Di-Sathuirne

sgeul le CAIRISTIONA CHAMSHRON

dealbh le GILLEASBUIG MACMHUIRICH

Moch sa’ mhadainn Di-Sathuirne chuir mi orm mo chlogad.

Bha sinn fo imcheist oir cha robh an“clutch”agus na“gears”aig ar sgùdair Vespa a’ dol an gréim mar bu chòir dhaibh. B’ fheudar do dh’ Earrtsaidh ruith ’na dheann gu beatha thoirt do ’n inneal. Chùm e gréim air a’ chlutch gu faighinn-sa dìreadh air an t-suidheachan liath.

Bha sinn air ar cuairt sheachdaineil do ’n bhaile-mhór as fhaisg oirnn, Ciorcaldai. Dh’ aindeoin ar strì aig toiseach na cùrsa chaidh an t-inneal air adhart gu rèidh socrach gus an d’ràinig sinn bruthach, meadhoin a’ bhaile. Ann an sin dh’ aidich Earrtsaidh nach robh càil air ach an sgùdair a lìobhraigeadh gu osbadal leigheas nan sgùdair (a’ gharaids). Dh’fhuirich mise far an robh mi.

Cha do shéid gaoth riamh nach robh an seòl cuideigin. Sheas mi aig uinneig bùth fhlùraichean agus an sin laigh mo shùil air bocsa crèadhadh a bha air a dheanamh suas mar ghàrradh Sheapanach.

’Na bhroinn bha lus bheag ris an can iad“cactus”a’ fàs ann an gàrradh cho àghmhor ’s a chunna sibh riamh. Bha an abhainn a bha ruith troimh ’n ghàrradh air a dèanamh suas le clachan beag gorma, dhrochaid bheag ghrinn phige air dathan geal agus dearg agus bàta beag snasail, le aon fhireannach ’na bhroinn a’ seòladh gu h-aighearach bho thè dhiubh. Dà chraoibh chumadail dhe ’n t-seòrsa Sheapanach a’ fàs gu stàtail air bruachan na h-aibhne. Bruachan na h-aibhne cho briagha ’s cho uaine, an àite clachan beaga gorm air an turas so, ’se clachan beaga uaine a’ samhlachadh feur a bha aca.

Thar gach nì eireachdail eile a bha sa’ ghàrradh is e ghabh mo shùil ach am bodach a bha ’na shuidhe mu choinneimh an tighe aige. Bha e ’na shuidhe cho foighidneach gun tug e ’na mo chuimhne seann bhodach a bha san ath bhaile rium fhéin an uair bha mi ’na mo nighinn bhig. Cha b’ ann a’ coimhead bhàtaichean air an abhainn a bhiodh esan ach a’ buachailleachd a’ chruidh mun rachadh iad ro fhaisg air na h-easachan móra. ’Sann dìreach mar so a shuidheadh e ach gum biodh e an còmhnaidh a’ smogadh.

Gu dé a chuir stad air mo smuain ach an guth aig Earrtsaidh agus e ag ràdh nach robh air ach am bus a ghabhail dhachaidh, nach robh an sgùdair fo uidheam aca fhathast. Co-dhiù mar a thuigeas sibh tha e nas soirbhe gàrradh Seapanach a ghiùlan ann am bus na air cùlaibh sgùdair.