Maise Gnuis

LE EALASAID NIC A’ ROTHAICH.

THA Samhradh a nis gu bhith seachad agus tha mi ’n dòchas gum bheil sibh uile air mór thoileachas fhaighinn á teas na gréine. Tha deàrrsadh na gréine, fhads nach gabh duine cus dheth, math dh’ an chraiceann ach far a bheil an craiceann tioram, feumar an aire thoirt dha. Ma tha craiceann olach oirbh, gabhaibh na gheibh sibh dhe ’n ghréin agus is còir gum bi sibh a’ coimhead nas fheàrr aig an àm so na aig àm sam bith eile dhe ’n bhliadhna.

Fhads a tha sibhse air a bheil craiceann tioram air a bhith cleachdadh an cungaidh-taiseachd agus an cungaidh-oidhche dh’ iarr mi oirbh anns an àireamh mu dheireadh cha chòir gum bi móran agaibh ri gearain air. Ach ma tha sibh air leigeil leis a’ chraiceann losgadh, bithidh an tiormad nas nochdte agus bithibh glé chinnteach nach cuir sibh uisge is siabunn ’na chòir. Glanaibh an craiceann le cungaidh-nighe air a dheasachadh airson craiceann tioram. Cuiribh cungaidh-taiseachd air ur n-aodann air feadh an latha agus cungaidh-biadhaidh (feuch nach ith sibh e!) nuair a tha sibh a’ dol do ’n leabaidh.

Tha Samhradh a’ toirt deagh chothrom dhuinn atharrachadh dath a thoirt air na cungaidhean-maise againn. Faodaidh sibh cungaidh-stéidh(foundation)nas duiriche a chleachdadh agus ma tha dùil agaibh fhathast làithean-saora a chur seachad air falbh o ’n tigh, thoiribh libh cnogan de chungaidh-stéidh agus phùdar còmhla. Caomhnaidh so dhuibh a bhith giùlan móran bhotail is chnogain agus a’ dòrtadh phùdar air feadh a’ bhaga.

Nuair a gheibh ur craiceann a’ ghrian, bithidh sibh airson atharrachadh a thoirt air ur dath-bhilean agus is e fear soilleir as fheàrr a choimheadas air craiceann a tha air òradh leis a’ ghréin. Tha dath-

Tha na h-oidhcheannan a nis a’ fàs fada agus bithidh na dannsaichean is na céilidhean a’ tòiseachadh a rithist. Air an aobhar sin innsidh mi dhuibh anns an ath àireamh mu na cungaidhean-maise as briagha is as freagarraiche airson sin.