FAIRE UR A’ NOCHDADH

(Earann air a bheil dreach na h-oige—fo iuil Cairistiona Dick)

An raithe so:—
(1) Bean-eiridnidh dhutchail, le Cairistiona NicDhomhnuill
(2) Fasanan Ura, le Diana
(3) Maise Gnuis, le Ealasaid Nic a’ Rothaich
(4) Claran Gaidhlige, le L.D.
(5) Obair Beatha, le Aonghas Iain MacDhomhnuill

Bean-Eiridnidh Dhuthchail
Le CAIRISTIONA NICDHOMHNUILL

(Bean-eiridnidh dhùthchail ann an Ceann-a- Bhàigh, Uibhist-a- Tuath)

MUN tòisich mi ri bruidhinn air obair bean-eiridnidh air dùthaich, innsidh mi dhuibh an toiseach dé an cùrsa dh’ fheumas sibh a leantainn mun ruig sibh an inbhe so. Femaidh sibh Teisteanas gum bheil an Stàit a’ gabhail ris gum bheil sibh ionnsaichte ann an eiridneachd choitcheann (Certificate of State Registration in General Nursing). Gheibh sibh an Teisteanas so ma chuireas sibh seachad trì bliadhna ann an Ospadal Ionnsachaidh agus gun teid sibh troimh Cheasnachadh a th’air a cur mu’r coinneamh le Comhairle Eiridneachd Choitcheann.

Nuair a gheibh sibh an Teisteanas so bithidh na litricean S.R. N. ás déidh ur n-ainm. Faodaibh sibh a nis fuireach ag obair ann an

Ospadal no tuilleadh ionnsachaidh a dhèanamh agus té sam bith tha ’na beachd bhith ’na bean-eiridnidh dhùthchail ’se banas-glùine as feumaile dhi. Bheir an t-ionnsachadh so bliadhna ann an Ospadail Màthaireachd—mar as trice ann an Glaschu, Dùn-Eideann na Obar-Dheadhain.

Tha a’ bhliadhna so air a roinn ’na dà earrann de shia mìosan. Agus nuair a nì sibh so gu dòigheil gheibh sibh Teisteanas o Chomhairle nam Ban-ghlùine.

A nis feumaidh sibh trì mìosan a chur seachad ag ionnsachadh eiridnidheachd dhùthchail anns a’ bhaile agus nuair a bhitheas so air ur cùlaibh bithidh sibh air ur gabhail air ‘The Queen’s Roll of Nurses’. Ma nì sibh an t-ionnsachadh so ann an Albainn feumaidh sibh bliadhna chur seachad anns an rìoghachd so nuair a bhitheas sibh deiseil, fo riaghladh an Queen’s Institute of District Nursing.

’S mór an t-eadar-dhealachadh a th’ann a bhith ri obair dhùthchail seach obair ospadail.

Tha a’ bhean-eiridnidh dhùthchail a’ coimhead ás deaghaidh luchd-tinneis—sean is òg, roimh-bhreith is deaghaidh-breith, banas-glùine, clann òga, sgoiltean, agus fallaineachd na h-inntinn.

Tha an obair tha so co-ionann a rèir dé seòrsa sgìre tha sibh a’ frithealadh—co-dhiù tha i anns a’ bhaile mhór no air an dùthaich. Ann am baile-obrach mar a tha Glaschu tha móran banas-glùine ri dheanamh ach chan eil cus dheth air an dùthaich idir far am bheil 70% dhe’n obair co-cheangailte ris an fheadhainn air am bheil tinneas leantalach no th’air tighinn gu seann aois.

Nuair a tha sibh ri obair dhùthchail faodaidh sibh a ràdh gum bheil sibh nar ban-eiridnidh is aig an aon àm nach eil. Tha cus a bharrachd a’tighinn fo ur làimh nach toireadh sibh sùil air ann an Ospadal. Feumaidh sibh a bhith deiseil le ur làmhan gus sealltainn ri fighe is fuaigheal, saoirsneachd, inneal càr, còcaireachd is mar sin air adhart. Agus glé thric thig sibh dhachaidh fuar is acrach is gun ghréim deiseil romhaibh. Aig amannan eile ’sann dìreach nuair a

Dé tha mi a’ ciallachadh le bhith a’ ràdh nach eil sibh nur ban-eiridnidh ann am beachd an fheadhainn a tha sibh a’ frithealadh? So mar a thuirt nighean bheag nuair a dh’fhoighneachdadh dhith an còrdadh e rithe bhith ’na ban-eiridnidh dhùthchail,

“Cha chòrdadh,” ars ise, “tha mi airson a bhith ’nam bhan-eiridnidh cheart!”

Chan eil an obair a tha sinne ris cho dealbhach ri obair ospadail far am bi na mnathan-eiridnidh cho briagha le’n aodach stalcanta geal. Tha h-uile nì deiseil ri’n làimh a tha obair-leigheas a’ feumachdainn. Chan ionann sin is sinne nach eil a’ tachairt ri deisealachd ach ainneamh is pana-bhrochain againn ’na sterilizer.

Ach is math as fhiach a bhith ri obair dhùthchail. Anns an ospadal far am bheil iad ’nan cabhaig a latha ’s a dh’ oidhche tha e gu tric air a ràdha mu’n deidhinn gum bheil iad a’ frithealadh an tinneis ’s nach e an duine; gum bheil iad a’ frithealadh do’n ‘chridhe fo’n uinneig’, no ‘na h-àirnean anns an dara leapa o’n dorus’. Air dùthaich tha sibh a’ frithealadh air ‘bean Thormaid Alasdair’ no ’Dòmhnall Dìchiollach’. Tha sibh a’ dol chun an luchd-éiginn ’nan dachaidhean agus tha sin fhéin gan toirt nas fhaisge oirbh. Tha sinn a’ faicinn ar n-euslain ’nam feum, a’ tighinn air adhart, aig fois agus a rithist slàn. Tha frithealadh nan seann daoine cuideachd làn-dìolach agus cha bu chòir a bhith ga mheas mar chosgais gun fheum. Bithidh sinn uile sean uaireigin ma bhitheas sinn beò fada gu leòr, agus ged nach toigh linn a bhith smaoineachadh air a sin, cha bu mhath linn bàsachadh òg.

Tha móran ùine ri chur seachad le peann is pàipear. Feumaidh sibh fios-mìosail a chur gu Oifis na siorrachd mu’n obair tha sibh a’ deanamh agus na h-uairean tha sibh a’ cur a-stigh. Tha obair tighe ri dhèanamh cuideachd agus innealan-cùirt ri coimhead ás an déidh.

Tha an t-siorrachd a’ toirt dhuinn càr agus garaids agus tigh-còmhnaidh air àirneiseachadh gu comhartail. Tha sinn a’ pàidheadh màl air an tigh ach tha an t-siorrachd a’ cosg ris a’ chàr.

’Se obair thlachdmhor inntinneach a th’ann an eiridinn-dùthchail. Ri nighinn sam bith a tha a’ smuaineachadh air an obair so chanainn, “Gabh romhad”. Còrdaidh an obair riut agus is tric a bheachdaicheas tu air na làithean toilichte a chuireas tu seachad ag ionnsachadh. Tachraidh duilgheadasan riut gun teagamh ach cùm an sean-fhacal mu’d choinneamh:

‘Dèan mar a bu mhath leat a bhith air a dhèanamh riut’.