Maise Gnuis

Le EALASAID NIC A’ ROTHAICH

BLIADHNA Mhath Ur dhuibh uile.

Bhon a tha 1965 fhathast ’na leanaban shaoil mi gum biodh so ’na dheagh àm gus facal na dhà a sgrìobhadh mu ’n aire dh’ fheumas clann bheaga.

’S mór as urrainn do mhàthraichean a dhèanamh gus gum fàs a’ chlann suas le craiceann fallainn is falt grinn.

Tòisichidh sinn ma thà leis a’ chraiceann; tha chuid as motha de phàisdean air am breth le craiceann glan agus a chum is gu fan e mar so feumaidh e deagh aire. So agaibh riaghailt no dhà a dh’ fhaodas sibh a leantainn:

1. Chan eil feum sam bith air siaban a nighe aodainn leanaibh òg. Cleachd clùd-aodainn mìn (chan e idir an aon fhear ’s a bhios agaibh ris a’ chòrr dheth) agus nighibh gu math e.

2. Le searadair mìn, bog, tiormaichibh an craiceann gu math. Tha so uabhasach feumail oir chan eil nì ann as mì-chomhartaile do leanaibh na craiceann tioram goirt.

3. Nuair a bhitheas sibh a’ cur an leanaibh a-mach anns a’ phram suathaibh rud beag cungaidh-leanaban air aodann; glé thric ’se cion aire ’nan òige a tha ag aobharachadh craiceann ruiteach nuair a dh’ fhàsas iad suas. Tha ghaoth a’ tiormachadh an ola nàdurra a tha as a’ chraiceann agus tha so a’ toirt na féithean ro fhaisg air uachdar a’ chraicinn. Agus tha e gu math doirbh so fhalach.

A nis am falt:

Co-dhiù tha an leanabh air a bhreth le tòrr dhualagan air feadh a chinn no le ceann maol mìn feumar deagh aire a thoirt do chraiceann a chinn.

1. Chan eil feum sam bith air siaban a h-uile turas a tha sibh a’ nighean leanaibh. Suathaibh an ceann gu math le clùd na spong agus tiormaichibh gu cùramach e.

2. Thig sgrath air a cheann gu math bitheanta air cho faicealach ’s gum bi màthair, agus mur eil e uabhasach dona faodaidh sibh fhéin gabhail ris. Ma tha an leanabh beag bìodach suthaibh ola bhlàth air agus fàgaibh e cho fada ’s as urrainn dhuibh agus an sin bruisigibh dheth e le bruis-ìnean. Le clann, suathaibh an craiceann gu math le measgadh de aon chuid siaban-cinn-leanaibh agus aon chuid siaban-cinn-leigheis, glanaibh dheth e le uisge gu leòr agus an sin bruisigibh an craiceann tioram air falbh.

Far am bheil leanabh a’ faighinn deagh aire iarraidh e daonnan a bhith glan grinn is leanaibh e ris.

“ ’Se an t-ionnsachadh òg an t-ionnsachadh bòidheach.”