AN CLO-MOR

le Iain Moireach

Air an àrd-ùrlar, caileagan òga cuimir gun mhóran chudthrom aodaich orra—Elaine NicDhòmhnaill, Olwyn Atkinson, Gwendoline Edmonds, Marian St. Claire agus Ruth Prior—ri luadhadh a’ chlò. Màiri Moireasdan le còmhlan gasda de bhoireannaich eile á Barraidh ri seinn air clàr . . .

Bho dhòrn gu dòrn, clò nan gillean,
Iomair o hó, clò nan gillean . . .

Chithinn ’nam cheann iad, ’s mo shùil air na caileagan. Dh’ fhairichinn dealbh ga reubadh ’nam mhac-meanma.

Ach ’se annas agus ìomhagh ùr a bh’ann air fad; ballet ga dhanns ri òrain Ghaidhlig.

’Se Dolìna Niclllinnein a tha a’ gabhail nan òran. Sia air fad, cho eadar-dhealaichte ri Calum Sgàire agus Dheidhinn dhan a’

Ghealaich Leat, agus ’se cuis-iongantais a th’ann mar a tha i fhéin agus na dannsairean (aig nach eil smid Gàidhlig) ri cumail an gleus ri chéile. Le pìosan clò agus modh-dannsa nach ro a riamh sa’ Ghaidhealtachd, tha na nìghneagan agus aon fhear, Gernot Petzold, ri deilbh air beairt nan òran seann sgeul a fhreagradh air ionad sam bith a tha ri uchd agus an taing a’ chuain . . . “muir mór nan tonn ’s e ri trom cur eadrainn.”

Am fear a chur am ballet air dòigh, Stiùbhart Hoops á Lunnainn, thainig gu mór fo bhuaidh òrain luaidh a chuala e ann an Dartington Hall, Devon. Chuidich Seòras Reid, a tha ag obair aig STV e, agus thagh Dolìna na h-òrain. Nach math gu bheil an leithidean ann, a sheallas gu bheil beòths gu leòr anns a’ Ghàidhlig fhathast . . . saoil an e na Gaidheil a tha ri fannachadh?