Na Boireannaich

Boireannaich nan Eilean

Tha boireannaich nan eileanan annasach. Tha dòigh aca air a bhi togail an cuid chloinne a tha làidir susbainteach, agus gu math duilich meur a chur air. Tha faireachdainean aca aig ámannan cho geur ri losgadh, agus chan eil feagal orra an fheadhainn as nimheile a leigeil ris, ’se sin an fheadhainn a dh’fhaireas a h-uile duine againn aig ámannan, ach nach aidich sinn dhuinn fhìn.

“Ge be té a thog a’ naidheachd
Na b’ann falainn nì i ’n gàire
’S na biodh aon neach air a banais
Gus a leig a leanabh ràn ás.”

Bha iad math dha rìreabh air bàrdachd, air seinn, air obair chruaidh, air dibhearsain. Cuideachd, bha rud nach canadh iad a’ cunntadh a’ cheart uimhir: gad lìonadh le ciont le bhi toirt aon osann, no toirt do chasan bhuat le dà fhacal mas fhìor neo-chiontach. Mar sin bha smàb air leth aca air an teaghlaichean, agus nach iomadh balach fhathast tha cho sona ri bròg còmhla ri mhàthair an tac an teine, ’s ged a b’e fineach a bhiodh ann, thig e an deidh sin dhachaigh ás a’ bhothan aig cairteal gu dà reug oidhche Shathuirn. Am broinn na dachaigh mar sin tha a facal tric a’ riaghladh, agus nuair a bhiodh a fear air falbh air son mìosan móra ri seòladh, bha dol aice air an teaghlach a cheangal rithe fhéin gu math daingeann. Dheanadh i obair sam bith bho bhith bleoghan na bà gu bhi buain mhònach, ach ma bha i air taobh a-muigh a dachaigh fhéin dh’fheumadh i bhi sàmhach. Cha robhas idir a’ sireadh a beachd air fearann, air tìde, no air rotaichean. Bha aice ri bhi gu math umhail a thaobh a cainnt agus a giùlan a-muigh, agus ’s dòcha gur ann air sgàth sin a dheadh aice air casg a chur air a teaghlach a-staigh gun mhóran a ràdh.

’Sann mar sin a tha i gus a’ là an diugh, agus a-staigh an àiteigin air cùl a claiginn tha mi cinnteach g’eil fhios aic’ air. Tha a h-aodach an diugh eadar-dhealaicht’, tha a taigh còmhdaicht ann an carpets, tha càr aice, faodaidh joba a bhi aice a-muigh cuideachd, faodaidh cothrom a bhi aice air airgead, faodaidh i bhi fuireach anns a’ bhaile mhór. ’Se tha sin uachdar na cùise.

Tha i suathadh glé mhór ri eaglais, bhon chan eil móran ann a nì i an cuideachd dhaoine air falbh bhon taigh ach sin fhéin. Chan eil uallach na cloinne a’ tuiteam air an duine ann, agus tha e gabhail air fhéin gun téid e chéilidh barrachd, agus gun téid e dhan a’ bhothan gu uairean beaga na maidne.

Ach fuirich thusa, ille, tha an dòigh a ghabh thu air a cumail shìos a’ deanamh cinnteach gur i as làidire tha am broinn do

Có chanas nach eil i làidir agus nach aithne dhi a gnothaich?

Norma Nic Leòid.