COMHAIRLE DHOMHNAILL RUAIDH DO’N MHISGEIR

Seachainn an taigh-òsda
’S an còmhlan ud bhios ’ga thathaich;
Cuir do thaigh an òrdan,
Is sòlas gum bi ’nad dhachaidh;
Gabh comhairle Dhòmhnaill
’S do phòcaid cha bhi i falamh,
Bidh barraill ’nad bhrògan
’S tu còmhdaichte mar as math leat.
Seachainn air do chrògan,
A’ sgòrnaich, ’s ag iarraidh sabaid,
’Mionnachadh ’s a’ bòilich,
Di-Dòmhnaich gun dèan thu cadal.
Ach seachainn taigh an diabhuil,
’S e m’iarratas dhut gu h-alamh,
Mus cuir e as do rian thu,
Is ’s an t-sìorrachd gun caill thu d’anam
Siod agad a’ chrìoch dhut;
Cha bhriagan tha mise canail;
Ghealladh dhut le Dia e
’S gu sìorruidh cha téid a mhealladh.