XXVI MO MHAIGHDEAN ÒG

’S a’ mhadainn mhoich mu’n éirich grian,
Mu’n liath i air na neòil,
Mu’n cluinn mi ceilearadh nan ian, 2700
Mu’n crom iad bial gu òl;
Bidh mis’ a’ falbh gu socair balbh
A shealbhachadh ar lòin;
Gur gann gun dùin mi’n dorus lium
Mu’n dùisg mo mhaighdean òg. 2705

Nuair bhios mi coiseachd sìos an t-sràid
Air madainn shàmhach reòt,
Nuair bhios mi deas gu dol an sàs,
A gheibh mi’n spàinn ’s an t-òrd,
Nuair bhios mi shuas gu h-àrd ’s an stuaidh 2710
’S am breige ruadh ’nam dhòrn,
’S e fàth mo shunnd, mo chuspair ciùil,
Mo rùn, mo mhaighdean òg.

Cha téid mi’n cainnt na ’n cuideachd chàich,
Gur beag mo chàil dha ’n glòir, 2715
’S cha bhi mi là gun chòmhradh gràidh,
Ged nach e mànran beòil;
Their clach is aol is bàrr nan craobh
Gu sàmhach, saor, dhomh ceòl,
’S e am facal cruinn bhios aca rium— 2720
“Mo rùn, mo mhaighdean òg.”

Nuair bhios a’ ghrian air cromadh sìos,
A’ tighinn gu crìoch an lò,
’S a théid an cipean thoirt á sàs
Cha lùbainn bàrr an fheòir. 2725
Bidh m’aigne luasganach le m’ smaoin,

’S e daonnan anns na neòil;
Gun fhois gu’m faic mi miann mo shùl—
Mo rùn, mo mhaighdean òg.

Ged bhithinn sgìth ’s mi ’n déidh mo chlaoidh, 2730
Gun cuirinn ruinn air dòigh;
Ged bhithinn drùdhta chun a’ chuim,
’S an t-uisg’ am broinn mo bhròg;
Ged thiginn dhachaigh acrach, fann,
Gun togadh m’ fhonn gu ceòl 2735
Le bhi ’gad altrum air mo ghlùin—
Mo rùn, mo mhaighdean òg.

Ma chi thu cuailean camalach, dualach,
Snuadh dheth mar an t-òr;
Ma chi thu aodann ciùin gun ghruaim, 2740
Dà ghruaidh air dhreach nan ròs;
Ma chi thu fiamh a’ bhainne bhlàith’
Aig pearsa tha gun sgòd;
Mar ròs an coill as bòidhche loinn—
’S e sin mo mhaighdean òg. 2745

Mar shòbhrach bheag ri taobh an uillt
A-stigh fo chruim nan sgòrr,
Mar neòinean mìn-gheal, caoin-gheal grinn
A’ fàs an lùib an fheòir,
Mar ghucag uisg’ as gile lìth 2750
Tha muineal mìn na h-òigh’,
’S le fuil mo chuim gun sgrìobhainn ruinn
Air blàth mo mhaighdinn òig.

Nam biodh mo bhial air réir mo mhiann,
Gum feuchainn-sa mo mheòir 2755
Air ealaidh ghaoil a sgrìobhadh sìos
A b’fhiach a chur ri ceòl,
Ach c’àit eil teanga, clàr, no peann
A chuireadh rann air sheòl,
’S gun soillsicheadh e dh’inntinn chàich 2760
Mo ghràdh dha m’mhaighdean òig.