V GÉIDEABHAL

A Ghéideabhal chreagach!
Gur lìonmhor sgòrr agus eag tha
’nad aodann. 395
’S lìonmhor sgoltadh is beàrna,
Sgailc is sgapadh is sgàineadh
ri fhaotainn,
’S nach e do choltas tha beannach,
Tha gruamach, gnù-shùileach, greannach, 400
neo-aoidheil.
’S mi nach iarradh do choibhneas
Nam bithinn seachran oidhche
’s mi m’ aonar.

Ar leam gur sgoinneil a màm thu! 405
B’e bean na buan’ air a’ bhlàr thu
ri d’fhaicinn;
Cho leathann, cruachanach, màsach,
Cho balgach, bàghanach, màgach,
trom, taiceil, 410
Agus t’aghaidh neo-sgàthach,
Gu lusach, bathaiseach, blàrasach,
bàn, bailceach,
’S ged tha thu ann bho linn Àdhaimh,—
Cha dean thu d’fhaosaid air àireamh 415
nan lapach.

Cha chuir aois unnad gaiseadh,
Cha toir tiormachd no taiseach
a-nuas thu,
Ged ’s ioma Faoilteach a bhlais ort 420
Agus caochan thug claise
’nad ghruaidhean,

Agus beithir thug allt ort,
Agus tuil thug tràth as
do bhruachan, 425
Agus fairge mhór bhaobhail
Bhrist a bathais mu d’ ladhran
a’ bualadh.

Ach ged tha neart ann ad bhodhaig
Chan eil taom tighinn fodhad 430
gu tuasaid;
Ris na dh’iarradh do chobhair
B’e do bhriathran-sa “Trobhad
a thruaghain!”
Chan eil diùchairt air creutair 435
A tha fo chùrsa na gréine
a’ gluasad;
Tha iad ionnan dhut càirdeach
Ann an duslach an làir as
do ghluais ’ad. 440

Chan eil sgeula ri luaidh ort
Gun do nochd thu cion truais no
cion tròcair,
Nuair a dh’éireadh Clann Ruairidh
A chumail reubairean-cuain thar 445
an còrsa.
’S tric mu dheireadh an tuasaid,
Ge b’e bhristeadh an cruaidhchàs
na còmhraig,
Thug thu fasgadh bho’n ruaig 450
Is deoch dhe t’uisg’ as an fhuaran
ri òl dhaibh.

Chan eil foill ann ad nàdur,
Chan eil cruinneachadh no càrnadh
air t’aire; 455
Tha thu ’n diugh air an làrach,
’S chan eil guth air am màireach,
no ’n earar.

Chuir thu t’earbsa gu làidir,
Masa h-iomchuidh le nàdur 460
gu mair thu.
Dh’fhàg a’ chreud sin gun fhiamh thu—
Ge b’e thig bho’n iar no
bho’n ear ort.

’S math a dh’innseadh tu dhòmh-sa 465
Nam faighinn fios bhuat le feòraid
no farraid
Am facas riamh fearann àitich
Eadar h-Irt agus Beàrnaraidh
’m Barraidh? 470
Am facas raontan fo eòrna
Le corrain bhuan’ aig fir òga
’gan gearradh;
Far nach fhaicear ’s an àm so
Ach cìrein-mullaich nan tonn tha 475
’gam falach.

Ach ma dh’éirich na cuantan,
Ma bha tìr air a buain as
a h-ionad;
An ann le sgiorradh a bhuail oirre 480
Thuit na bunaitean bhuaipe
mu’n mhionaid?
Neo ’n e marannan gorma
Tromh na linntean a’ corbadh
’s a’ criomadh 485
Le ’n teanga deoghal mu’n cirbean
A thug a-mach e le imlich
mu h-iomall?

Ach thus’ a Ghéideabhal chalma,
Chum thu gleac ris gach gailbheinn 490
a thàinig
Nach robh a’ dol gun bhith mairbhteach.
Innseadh mol agus gainmheachd
do thràghad,

Ach bho’n iar no bho’n ear-dheas, 495
Ge b’e sìon a ghabh failmse
no fàth ort,
Tha thu fhathast gun ghluasad
Anns a’ bhad ’s na bhuail thu
do shàiltean. 500