VII MOLADH NAM BÀRD UIBHISTEACH

Séisd:—

Ho ro ho ì, hó ro nan, 565
Ho ro chall éileadh,
Ho ro ho ì, hó ro nan.

’S an Uibhist an Eòrna
Gheibhte beòil an deagh-reumaidh.

Beòil gun uireasbhuidh cainnteadh, 570
Beòil nan teangannan geura;

Beòil nan teangannan sgaiteach,
Ullamh, acfhuinneach, gleusach;

Beòil labhairt na Gàidhlig,
Nach do ghànraich a’ Bheurla, 575

A chuireadh facail a’ freagairt
Ann an eagaibh a chéile.

Fhuair iad saor air bheag iomrall
Ioma iomradh is sgeula

Air an aiseag bho sìnnsreadh 580
Mar a dh’ìnnseadh le beul iad.

Fhuair iad eòlas nam bàrd
A bha romh Phàdruig an Éirinn;

Le beith, luis, agus Òghum
Fhuair iad eòlas a leughadh. 585

Thug sibh mionnan is bòidean
Aig a’ Mhòd an Dun Eideann,

Gum biodh urram a’ chrùin leibh
Air a ghiùlan gu h-eutrom;

Air a ghiùlan leibh dhachaigh, 590
Olc air mhath le luchd-eud ribh;

Eadar Leódhas is na h-Earradh,
Tuath no ’n ear air Caol Shléibhte.