LXXVII “GAIRM”

Molaidh mise Fionnlagh MacDhòmhnaill, 8565
’S chan fhàg mi a chùlaibh MacThómais;
’S e ’n t-urras their mi dhaibh,
Chuidich iad ar cainnt,
’S chuir iad ann an làimh obair òirdhearc.
Gur mithich dhuinn mar bhàird 8570
Bruidhinn ann an àird,
’S mios thoirt air na h-àrmuinn a thòisich,
’S a thogairt gum biodh ann
Comas nach bu ghann,
Toileas dha ’r cuid rann agus òraidean. 8575
Chuir iad obair ghrinn ann an òrdugh
A mhaireas fad a thìm, tha mi’n dòchas,
Cho cantalach ’s cho dian
Mu ar cladaichean siar,
’S gum bi m’ogha ’s m’iar-ogha ’ga òrdachadh. 8580
Rinn iad obair gharbh,
Buidheachas dha’n t-sealbh;
’N àit ar leagadh marbh, thug iad beò sinn.
Gur truime sinn na tairbh
Le àibheachd am beirm 8585
Bho’n là chuir iad “Gairm” ann an clò dhuinn;
Gun dh’uidheamaich iad sinn,
’S gu ruigeadh ar ruinn,
Gach Cuimeineach, Duibhneach is Dòmhnallach,
’S gach fear a ni fuinn, 8590
’S gach teanga ni seinn—
Eadar Port na h-Aibhne is Steòrnabhagh.
Guidheam-sa gach buaidh air an òganach,
’S e bhith fada buan, fallain, feòraichte,
Farsuingeachd na cuairt 8595
Air tarsuinn a’ chuain,

Gu gineal an t-sluaigh a chaidh fhògairt bhuainn,
Gu deas-fhaclach, duanagach, òranach.
’S gur milis am fuaim aig gillean ’ga luaidh,
’S gach iomall a chuairticheas seòladair. 8600
Guma pailt an Dùthaich an Eòrna,
’S gus ruig e Port nan Giùran is Ròbhanais
Nall gus Leitir-Iùbh nuas gu Tom an Dùin
Gu Sgitheanaich, Mùideartaich, Cnòideartaich,
Gun ruig e sgial Loch Òdha ’s Loch Ial, 8605
Ceann Lochcillechiaranaich, Còmhalaich,
’S a leithid do dh’fhiach nach fhaca sinn riamh
Bho’n chaidh “Guth na Bliadhna” fo’n fhòid oirnn;
Sguir iad a chur ùidh ann an còmhradh,
’S an cuideachda luchd-ciùil agus òrain; 8610
Gun dh’ullaich iad an dùirn,
’S bhuilich iad an tùrn
Urramach air dùthaich an eòlais
Le teachdaire glan, ùr, stacaichte le tùr,
’S gasda leam ’nar cùis a’ tighinn òirnn e. 8615
’S e àilleagan mo rùin,
’S fheàrr leam e na ’n crùn,
A chuireadh le ùrnuigh aig Mòd orm.
Beannachdan air m’ùr-leannan glòirmhor
A chuireas m’fhuil a’ srùladh tromh m’ phòraibh 8620
’Na buillean ’s i ’na brùchd
Gus ruig i gach rùchd
Aig barraibh nan lùdag ’s nan òrdagan.
’S mionnaichte ’na dhùil,
Iomairteach le lùths. 8625
Innealach gus ùrachadh còmhstri e;
Adhartach le ’r cùis,
’S oidhirpeach ’na thùs,
Coileach air a dhùnan ’s e còmhragach;
Sud far a bheil an ràitheachan leòmach. 8630
Is taitneach leam bhith leughadh ’s a’ meòmhrachadh;
Socraicht’ air mo ghlùn
Dh’fhosglainn e air tùs

Na thigeadh a liùtha do leòbhraichean,
’S eagal gun téid smùr 8635
Seachad air mo shùil;
Dh’imlichinn, dhrùidhinn is dheòghlainn e;
Ruithinn air gach dùrd
Is ruighinn e gu ghrùnnd
Gus am bitheadh a shùghadh air òl agam. 8640