---

[73]

BUACHAILLEACHD A’ CHRUIDH.

A CHARAID SHUAIRCE,

’S gann a tha fath agam air peann a chur air paipear air an t-seachduin so le drip na h-obrach. Eadar faing is buachailleachd is strith ri lin-bheaga, thuilleadh air treallaich eile, ’s ann mi-shunndach a tha mi faireachadh an comhnuidh air cul a’ phinn, agus cha bu ghearan sin uile mur biodh gu bheil meirgeadh a’ tighinn air buadhan na h-inntinn agus sgleo air suilean mo mhac-meanmna. Tha fhios agam airson sin gu’n gabh sibh mo leth-sgial agus nach bi sibh an comhnuidh ag amharc ri litir shuspainneach bho bhodach sean bochd nach d’ fhuair cothrom air smior an fhoghluim bho oige.

’S ann anns na Sitheanan, agus mi a’ buachailleachd a tha mi sgriobhadh so—an aon fhath a fhuair mi air an t-seachduin so. Tha Murchadh

---

[74] Knocs is Mairi Mhurchaidh is Catriona Chaluim shios an Roulinis comhla rium, agus air creagan thall mu m’ choinneamh tha Bean Bhill ag ionaltradh a treud gu doigheil. Tha Catriona Roulinis a’ deanamh seanchais do Mhairi air na balaich a bha ceilidh oirre air an airigh am bliadhna, ach ’s beag diu Mairi dheth sin— ’s ann a theann i air bruidheann air an t-searmon ghasda a rinn an t-Urr. Ruairidh Mac Ghille Mhoire, ministear Steornabhaigh, latha na Sabaid so chaidh. Tha mi creidsinn gu’n cuala sibh fhein gu bheil an duine coir ’n ar measg bho chionn seachduin no dha, agus sinne tha ’n a chomain airson na firinnean mora chuir e fo ’r comhair ann an doigh cho simplidh solusach agus sgriobtuireil. ’S ealanta chuireas e a’ Ghaidhlig an eagaibh a cheile, agus mar a thuirt Mairi an latha roimhe, ’s buidhe dhoibh-san a tha fo ’n chrannaig aige ’n comhnuidh. Nach ann a ghabh mi miapadh mor latha na Sabaid an uair a thoisich e ri leughadh an dara caibidil an Leabhar an Taisbeanaidh—nach ann a smaoinich mi gur h-ann a’ dol a theagasg air a’ chloich ghil a bha e, ’s nach robh e riaraichte leis a’ mhineachadh a bha mi-fhein agus Scottie a’ toirt oirre, ach cha d’ thuirt an duine gasda facal mu’n chuis idir. Nach iongantach leibh-se cho buailteach agus a tha an inntinn nadurra air seadh cam a thoirt eadhon a searmonachadh an Sgriobtuir fhein agus a chur gu mi-bhuil. Bha bodach as na Hearadh comhla rium

---

[75] aig an iasgach ann a’ Finatie (Findochty) bliadhna, agus thuirt e rium gu’n d’ fhag e an eaglais do ’m b’ abhaist dha bhi dol a chionn gu’n d’ rinn am ministear searmon cumhachdach aon latha air Iudas Iscariot mac Shimoin, agus cha robh duine beo a bheireadh am bodach ud as a bheachd nach ann air fhein a rinn am ministear an searmon. Fhearaibh, nach mor am beachd a tha aig cuid de dhaoine orra fhein.

Tha mi creidsinn gu’n d’ eirich mi fichead uair bho ’n thoisich mi air so a sgriobhadh, a thilleadh a’ mhairt odhair. Tha spealg mhor de’n donas innte ma dh’ fhoghnas a bhi falbhanach e. Nach ann a theab mi-fhein agus Mairi a dhol a mach air a cheile ’n diugh air a son, agus ise ’g radh gu robh bhó gle choltach rium fhein—ach ged bhios dubh-fhaclan agam fhein ’s aig Mairi iomadh uair, chan’eil dithis eadar da cheann Bhearnaraidh cho coirdte ruinn, a chionn gu’n tuig sinn a cheile, agus nach-eil an dithis mall ann a’ sgaitearachd.

Bithidh orduighean Steornabhaigh ann latha na Sabaid so tighinn, agus bithidh duil agam ri sgriob eile thoirt bho’n tigh. Tha mi ’n dochas gu’m bi Padruig Iain Ruairidh air cheann cuid de na seirbhisean.

Mar sin leibh an drasda,

’S mise agaibh,

ALASDAIR MOR.