A’ TASGADH ANNS AN UINE ROMHAINN
A’ Cruthachadh Luchd-Obrach Cothromaichte air Ghaidhealtachd is sna h-Eileanan
Leabhran-Treòrachaidh Luchd-Fasdaidh
TREINEADH 2000
CLANN ANN AN ALBA
FORUM NA DUTHCHA
TRAINING (Scotland) Ltd
’S e buidheann-carthannais a th’ ann an TREINEADH 2000 (Alba) Earranta, a tha an urra ri trèineadh airson nam boireannach ann an Alba. ’S e eagrachadh-ballrachd a th’ ann, le buill às gach ceàrnaidh de dh’ Alba agus à àiteachan eile. Bidh TREINEADH 2000 ag obair còmhla ri luchd-fasdaidh gus aire tharraing agus gus sùil a chumail air mar a tha dol dha na boireannaich ann an trèineadh is leasachaidh.
Ann an 1994 chur TREINEADH 2000 Ròs Màiri NicFhioghain ann an dreuchd mar Oibriche-Leasachaidh airson na Gaidhealtachd, suidhichte ann an Inbhir Nis.
Children IN SCOTLAND
CLANN AN ALBA
working for children and their families
’S e Clann na h-Alba an guth a th’ aig os cionn 300 de dh’ eagrachaidhean is de luchd-dreuchdail a tha ag obair le cloinn ’s le an teaghlaichean air feadh na h-Alba. ’S e buidheann gun cheangal a th’ ann a tha a’ toirt fios is ullachaidh is a tha an sàs ann an rannsachadh air tomhais farsaing de ghnothaichean polasaidh.
Rural Forum Scotland
’S e Forum na Dùcha eagrachadh gun cheangal a tha feuchainn ri gnè dòigh-bheatha a-muigh air an dùthaich ann an Alba a chur am feabhas.
Tha Clann an Alba agus Forum na Dùthcha ag obair còmhla air tionnsgain-leasachaidh ann an cùram-cloinne air an dùthaich. Tha an tè stiùiridh Sìle NicNèill air a suidheachadh ann an Inbhir Nis.
Faodaidh Buidhnean-Iomairt comhairle a thoirt air luchd-fasaidh mu thrèineadh. Faodaidh buidhnean eile comhairle thoirt air cothrom ionannachd agus cùram-cloinne. Tha cairt a tha pàighte roimh làimh air a cur an cois an leabhrain seo ma tha sibh ag iarraidh tuilleadh fiosrachadh air cuspairean sònaraichte. Tha cuid a seòlaidhean feumail air ainmeachadh air an duilleig-chùil.
“Cha chuir sinn feabhas slàn air an eaconamaidh againn mura leig sinn le barrachd bhoireannach èirigh dhan ire as àirde. Tha tàlant is neart aca a tha luachmhor.”
Roy Perman, Scottish Business Insider, An t-Sultain 1994
“Chan e obair gun toireadh a th’ ann an cùram-cloinne ach innleachd dhan luchd-obrach a bhios againn sna làithean air thoiseach.”
Business Blueprint for Childcare, Employers for Childcare 1995
CLAR-INNSE
Am Màrt 1996
FACAL-TOISEACHAIDH
The e mar amas aig Iomairt na Gaidhealtachd gun tèid aig muinntir na Gaidhealtachd ’s na Eilean air na comas an gu lèir aca thoirt gu buil. Bidh sinn a’ feuchainn ri ruigsinn air seo ann an trì dòighean:
– a’ leudachadh ghnìomhachasan
– ag oideachadh dhaoine
– a’ neartachadh na coimhearsnachdan
Tha e na chùis-thoileachais dhomh gu bheil na trì ceumannan seo a’ dol a rèir nan ceann-crìche a tha air an nochdadh san sgrìobhainn seo. Bha pàirt nach bu bheag aig na boireannaich riamh ann an dòigh-bheatha na Gaidhealtachd. Tha na th’ againn de dh’ fhios mun obair chruaidh a rinn na mnathan ann an teaghlaichean a bha tighinn beò air an iasgach ’s air croitearachd a leigeil fhaicinn na rinn iad de dh’ oidhirp, a bharrachd air a bhith a’ togail cloinne agus a bhith an sàs ann an gnothaichean eile mun dachaigh.
Tha mòran bhoirreanach ag iarraidh gum bi obair-chosnaidh aca, agus feum aca oirre–bidh an fheadhainn aig a bheil teaghlaichean ag iarraidh cur ris an teachd a-steach aca agus tha feum air leth aig pàrantan aonair air obair-chosnaidh. Ach e tha e gu math cudthromach gum bi saoghal an teaghlaich, cùram-cloinne agus cùram nan sean a’ dol a rèir saoghal a’ chosnaidh. Faodaidh cion cùram-cloinne a bhith na chnap-starra mòr do phàrantan, agus gu sònraichte do na boireannaich, nuair a tha iad a’ gabhail brath air cothroman ullachaidh is cosnaidh.
Tha Iomairt na Gaidhealtachd gu mòr airson taic a chur ri gnìomhachasan ach an leudaich iad. Faodaidh iad seo a bhith nan gnìomhachasan ùra, agus feadhainn aca a’ toirt seachad cùram-cloinne a rèir feuman nan coimhearsnachdan, no feadhainn a th’ ann mar-thà.
Anns an t-saoghal mhòr gu farsaing, tha a’ Mhargaid Shingilte Eòrpach, a thàinig gu bith ann an 1992, agus fuasgladh nan dùthchannan ann an taobh an-ear na Roinn-Eòrpa a’ sealltainn an fheum a th’ ann airson luchd-obrach teòma, rud nach urrainear a ruigsinn gun ullachadh is foghalm aig ìre gu math àrd.
Tha farpais air thoirt air cuid a luchd-fasdaidh dòighean às ùr a lorg sam fàs an luchd-obrach aca nas fheàrr. ’S e ’n rud a tha follaiseach, ma tha luchd-fasdaidh ag iarraidh a bhith san fharpais fhathast san ath linn, gum fheum iad an fheadhainn as fheàrr a lorg ’s a chumail airson na dreuchdan a tha dhìth agus, gun teagamh, bidh seo a’ bualadh air na boireannaich a bharrachd air a bhith bualadh air na fireannaich.
Tha togail agam ri caidreachas a thogail ris an fheadhainn a leughas a’ bhileag seo ach am faod sinn am feum as motha a chur air comas an nan daoine san àit’ againn fhìn.
Iain A Robertson
Iain A. MacDhunnchaidh
Ceannard Iomairt na Gaidhealtachd
Iomairt na Gaidhealtachd
ROI-RADH
Tha na duilgheadasan a thig an lùib a bhith ’g obair is aig an aon àm a bhith feuchainn ri teaghlach a thogail cudthromach do dh’ fhireannaich is do bhoireannaich, luchd-fasdaidh is luchd-obrach. Ann an Alba tha barrachd is barrachd de bhoireannaich an sàs ann an obair-chosnaidh; tha an t-atharrachadh a thàinig air cleachdaidhean obrach; an t-àrdachadh de dh’ àireamh nan obraichean pàirt-ùine agus feum eaconaimigeach air buaidh fhàgail air àite nam ban san ionad-obrach.
Gus am feum as fheàrr a dhèanamh de dhaoine, a tha nas cudthromaiche do luchd-fasdaidh na goireas sam bith eile th’ aca, feumaidh luchd-fasdaidh boireannaich a thoirt a-steach.Cha leig iad leas tòrr a chosnadh air dòighean sam faodar boireannaich a bhrosnachadh gu obair–aig amannan chan eil a dhìth ach atharrachadh beag bìodach ann an dòigh-bheachdachaidh. Le bhith mothachail air na cnapan-starra agus le bhith beachdachadh air dòighean sam faodar faighinn thairis orra, faodaidh luchd-fasdaidh adhartas ann am farpais a dhèanamh.
Sheall aithisg a sgaoil TREANADH 2000 air Cothroman Cosnaidh is Ullachaidh do Bhoireannaich ann an Alba (1992):
– Cion cùraim, cùram-cloinne mar bu trice
– Bacaidhean airgid, mar thuarasdalan suarach
– Beachdan is cleachdaidhean-obrach claonte aig obair agus san t-saoghal air an taobh a-mach
mar na trì cnapan-starra bu mhotha a bhi cur air boireannaich a bha ’g iarraidh cosnadh fhaotainn.
Chaidh sùil a thoirt air duilgheadasan eile ceangailte ris an t-saoghal a-muigh air an dùthaich air Ghaidhealtachd ’s sna h-Eileanan ann an aithisg a dheasaich Buidheann Foghlaim nan Obraichean air Na Feuman tro Ullachadh a th’ aig Boireannaich air Ghailealtachd (1993). ’S iad seo:
– cosgaisean is dòighean-siubhail
– cùram-cloinne
– cothroman tearca
Sheall an rannsachadh ionadail a bha seo gun robh boireannaich gu mòr air an gluasad gus a dhol an sàs ann an ullachadh no ann am foghlam gus cosnadh a thoirt a-mach, gu h-àraid nuair a chaidh aghaidh a thoirt air na cnapan-starra.
Tha mòran de luchd-fasdaidh ag atharrachadh na dòighean-obrach aca mar-thà gus na cnapan-starra seo a leagail agus gus feum nas fheàrr a dhèanamh de sgilean nam boireannach. Tha barrachd is barrachd aca air fàs mothachail gu bheil e na bhuannachd do luchd-fasdaidh is luchd-obrach le chèile innlachdan a thoirt a-steach a tha freagairt air feumlachdan an teaghlaich, mar uaireannan sùbailte, roinneadh-obrach agus taic ri cùram-cloinne.
Tha àite gu math cudthromach aig na boireannaich anns an obair seo, rud a bheir soirbheachadh dhan an roinn againn. Cuiridh iad ris an dòigh-leasachaidh againn ma gheibh iad cothroman gus obraichean ceart a dhèanamh agus air tuarasdalan nas àirde. Gus seo a dhèanamh, feumar barrachd trèinidh agus trèineadh nas fheàrr, cùram-cloinne a tha fosgailte dhan a h-uile duine, agus innleachdan a tha mothachail air feumlachdan an teaghlaich.
Tha e mar amas san leabhran seo na cùisean seo a chur air adhart ann an suidheachadh a dh’aithnicheas luchd-fasdaidh air Ghaidhealtachd ’sna h-Eileanan agus eisimpleiran a thoirt seachad de dh’ innleachdan leis an do shoirbhich.
COSNADH
The àrdachadh mòr air tighinn air àireamh nam boireannach a tha ri obair-chosnaidh anns an roinn againn anns na bliadhnaichean mu dheireadh, mar a thachair ann an àiteachan eile san Roinn-Eòrpa, a bharrachd air atharrachaidhean ann an nàdar agus ann an gnè na h-obrach. Ach fhathast gheibhear boireannaich anns an dreuchdan “traidiseanta”, gu math tric pàirt-ùineach, sealach agus gun tuarasdal àrd nan cois, agus fhathast gun a bhith air an riochdachadh gu ceart aig an ìre as àirde de rianachd.
Air feadh na dùthcha gu lèir, tha àireamh nam boireannach a tha ri obair-chosnaidh ag èirigh agus cumaidh i oirre ’g èirigh. Tha còrr is 45% de luchd-obrach na Gaidhealtachd ’s nan Eilean nam boireannaich agus cha mhòr nach eil 25% den fheadhainn san roinn a tha ’g obair air an ceann fhèin nam boireannaich cuideachd. Ged a dh’fhuirich àireamh nan daoine ri obair-chosnaidh fad na tìde an ìre mhath aig an aon ìre eadar 1981 agus 1991, thàinig leudachadh dà uiread cha mhòr air àireamh nan daoine a tha toirt seachad sheirbheisean, far a bheil obair phàirt-ùineach agus shealach bitheanta, air tachairt aig an aon àm ri àrdachadh ann an àireamh nam boireannach a th’ air a dhol air ais a dh’ obair.
Tha cuid a luchd-fasdaidh air prògraman co-ionannachd chothroman a thoirt a-steach mar mheadhan agus aghaidh a thoirt air an ana-cheartas a dh’fhuiling boireannaich ann an obair-chosnaidh, a bharrachd air a bhith na mheadhan gus aire tharraing air laghan san raon seo. Tha na prògraman seo a’ toirt leotha sgrùdadh air mar a dh’ fhasdaichear luchd-obrach is mar a dhèanar an taghadh, na cothroman a th’ ann airson leasachadh luchd-obrach agus bidh iad a’ cur taic ri rudan leithid obair aig uaireannan sùbailte.
Faodar Gnìomhadh Dearbhach fon Achd mu Dhealachadh a-thaobh Gnè (1975), tro ullachadh is bhrosnachadh leis an luchd-fhasdaidh, gus crìoch a chur air a’ bhuaidh a dh’fhàg dealachadh roimhe seo. Faodaidh seo èirigh air a bheil boireannaich no fireannaich gun a bhith air an riochdachadh gu ceart, air neo mar thoradh air a bhith a falbh bho obair air sàilleabh gnothaichean an teaghlaich.
Chan eil e ceadaichte fon lagh do luchd-fhasdaidh dealachadh dearbhach a dhèanamh, nuair a tha iad a’ sireadh agus a’ taghadh luchd-obrach, mar eisimpleir.
A’ coimhead air a’ chùis tro shùilean an luchd-fhasdaidh, thoiribh fa-near:
– gu bheil na boireannaich air an cumail ri raon cumhang de dh’ obraichean
– gu bheil còrr ’s leth de luchd-obrach nam boireannach ann an Alba an sàs ann an solar-bidhe, obair chlèireach na obraichean ceangailte
– nach eil mòran bhoireannach an sàs ann an eòlas, innleadaireachd, teicneolas no rianachd
– gu bheil bruthadh air a chur air luchd-fasdaidh, ach an tig iad beò ann am margaidhean far a bheil barrachd is barrachd farpais, gus an neach as fheàrr a thaghadh airson dreuchd, gun diofar co dhiubh ’s e boireannach no fireannach a th’ ann
– feumaidh luchd-fasdaidh am feum as fheàrr a chur air na goireasan a tha ri fhaotainn dhaibh, nam measg siud an sgilean gun aithneachadh a th’ aig boireannaich
– tha trèineadh is brosnachadh nam boireannach, a bharrachd air fireannaich, na bhuannachd do dh’ eagrachadh sam bith le bhith cur ri misneachd a barrachd air eòlas
Faodaidh luchd-fasdaidh cur ris an eòlas-obrach aca le bhith mothachail gu bheil:
– beachdan ùra aig boireannaich a-thaobh mar a nì iad obair-chosnaidh is obair an teaghlaich còmhla
– boireannaich a’ feitheamh nas fhaide gus am bi clann aca na boireannaich air falbh bho obair airson ùine nas giorra gus clann a thogail
– dleasdanasan aig boireannaich aig an taigh gach cuid a-thaobh cùram dhan chloinn ’s do sheann daoine a tha an eisimeil orra
– boireannaich a’ gabhail ri obraichean aig ìre a tha fada nas isle na na comas an is an t-eòlas aca, gus am bi an ùine a’ fregairt air dleasdanasan an teaghlaich, agus leis sin gun a bhith ag obair aig ìre nan comas an aca
– boireannaich gu math tric ag obair gu pàirt-ùineach bho oir ’s e seo an aon chothrom a tha ri fhaotainn no seach gu bheil e a’ dol a rèir dleasdanasan an teaghlaich.
Cosnadh air Ghaidhealtachd is san h-Eileanan 1981 gu 1991
Lochd-Obrach
Thòisich mu 14,000 a bharrachd de bhoireannaich air obair eadar na bliadhanaichean seo, aig an aon àm ri lùghdachadh de mu 2,500 ann an àireamh nam fireannach ri cosnadh.
TREINEADH
’S e trèineadh aon dòigh san cuir boireannaich ris an cuid èolais agus san cuir luchd-fasdaidh ris an èifeachdachd aca. Faodaidh trèineadh an comas a thoirt do bhoireannaich cur a-steach airson dreuchdan aig an ìre as àirde no a dhol an sàs ann an obraichean anns nach robh na mnathan bho shean.
Seo cuid a rudan anns an fharsaingeachd a tha ceangailte ri trèineadh nam boireannach:
– feumaidh an fheadhainn a th’ air a bhith gun obair-chosnaidh o chionn ùine cur às ùr ris an eòlas aca
– tha atharrachaidhean ann an teicneolas agus iarrtasan bho obraichean ùra a’ fàghail gu bheil feum air trèineadh an còmhnaidh
– ann an obair-chosnaidh bidh trèineadh gu tric a’ dol a rèir ìre dreuchd. Seach gu bheil boireannaich nas trice na chaochladh aig an ìre as ìsle chan eil na h-aon chothroman a dh’ ionnsaigh trèinidh, agus tha an trèineadh a gheibh iad buailteach air a bhith nas giorra ann an ùine na an trèineadh a gheibh na fireannaich
– tha àireamh nam boireannach ri obair-chosnaidh buailteach air a bhith nas àirde ann an eagrachaidhean beaga nach eil cho buailteach ri eagrachidhean mòra air trèineadh a thoirt dhan luchd-obrach aca
– gu tric cha bhithear a’ tabhann nan aon chothroman trèinidh do na boireannaich agus a bhithear do na fireannaich is leis sin cha bhi na h-aon chothroman a-thaobh dhreuchdan aig boireannaich.
Faodaidh cnapan-starra sònraichte a thighinn air boireannaich cuideachd a-thaobh trèinidh is tighinn air adhart ann an dreuchdan. Fear dhe na rudan as bitheanta bhios a’ bualadh air boireannaich, co dhiubh tha iad a’ tilleadh no ag ullachadh gu obair no a’ sireadh adhartais sna dreuchdan aca, ’s e togail misneachd anns an comas a th’ aca. Tha caochladh dhòighean sam faodar trèineadh seo fhuasgladh, gu tric ann an co-bhoinn ri uallachadh de sheòrsaichean eile.
Chaidh an Springboard Development Programme a chur air bhonn a dh’ aon ghnothach airson bhoireannaich, mothachail gu bheil cuid a dhuilgheadasan ris an gabh dèiligeadh nas èifeachdaiche mar phàirt de thrèineadh airson nam boireannach a-mhàin. ’S e tionnsgain gu math sùbailte tha seo aig a bheil e mar amas cur ri misneachd nam boireannach agus sgrùdadh a dhèanamh air an h-amansan ’s na comasan a th’ aca.
Thug BP an tionnsgainn a-steach airson cuid dhen luchd-obrach aca ann an Sealtainn. Ag èirigh à seo tha neach-trèinidh de mhuinntir an àite air a chumail air leis an obair seo ann an Sealtainn ’s ann an Arcaibh, a tha ri fhaotainn gach cuid de bhoireannaich a tha ’g iarraidh dol air ais ag obair agus do luchd-fasdaidh airson an luchd-obrach aca.
Thuirt Fergie Norris bho BP gun robh an companaidh dhen bheachd gun robh Springboard na thionnsgain gu math taiceil agus gun robh i mar phàirt luachmhor dhe na dòighean uallachaidh agus na cothroman co-ionnanachd aca.
Mhìnich Linda Riddell bho Ceann-Ola Sullom Voe, mar a fhuair an t-eagrachadh buannachd bho “togair ris an ghabhadh Springboard; ghabh an dàrna cuid de luchd-obrach nam boireannach pàirt ann.
Tha dùil gun tig “barrachd misneachd” mar bhuil às - faodaidh boireannaich a bhith smaoineachadh gun tèid aice air pàirt luachmhor a ghabhail agus bidh i deònach sin a shealltainn.
O chionn beagan bhliadhnaichean thàinig atharrachadh mòr air Sullom Voe. ’S coltach gu bheil leudachadh mòr air tighinn air an fhèin-spèis a tha aig a’ chuid mhòir dhen fheadhainn a ghabh pàirt ann an Springboard.
Tha iad air seo a thoirt gu suidheachadh na h-obrach agus fhuair iad a-mach gun do ghabh iad ris na dùlain ann an dòigh nas fheàrr na bha iad ’s dòcha roimhe seo.”
Thuirt aon neach dhen luchd-obrach ann an Sealtainn mu Springboard gur h-e bh’ ann “innleachd mhath dha-rìribh a bu chòir a bhith ann airson a h-uile boireannach. Bidh e toirt orra iad fhèin a mheas agus amasan a thoirt dhaibh... ’s e chothrom air leth a th’ ann gus smachd a ghabhail air do bheatha fhèin, seach a bhith a’ leigeil le gnothaichean smachd a ghabhail ort is a bhith air d’ fhàgail ann an suidheachadh far a bheil thu ’g ràdh “B’ fheàrr leam gun robh me air sin a dhèanamh... ” Bidh an tionnsgain a’ cur ris an spèis a bhios neach a’ gabhail dha fhèin agus fhàgail nas fheàrr san obair aige.”
Tha United Distillers air an tionnsgain a chur an gnìomh cuideachd, airson luchd-obrach air Ghaidhealtachd eadar Eilginn agus an t-Eilean Sgitheanach.
Chunnaic an luchd-pàirteachaidh cuid a chinn-chrìche a tha bualadh air mar a leasaich iad iad fhèin mar dhaoine.
A bharrachd air cinn-chrìche, tha Esther Waters bho United Distillers ag ràdh gun do dh’aithnich a’ chuid mhòr dhen luchd-rianachd, agus an luchd-pàirteachaidh air fad, atharrachaidhean a bha nam buannachdan.
Nam measg seo bha:
– barrachd fèin-mhisneachd
– a bhith nas deònaiche pàirt agus uallach a ghabhail
– a bhith nas deònaiche ceist a chur air fiosrachadh
– beachdan nas deimhinne
Ged a tha clann-nighean ann an Alba a’ fàgail na sgoile le barrachd uidheamachaidh mar as trice na na gillean, cha bhi iad a’ dol air adhart gus na comas an aca a chur an sàs anns an ionad-obrach.
Mothachail air an luach a th’ air brosnachadh aig àm tràth, tha Roinn an Fhoghlaim san h-Eileanan an Iar air cùrsaichean Boireannaich ann an Rianachd a chur air dòigh airson sgoilearan inbheach gus na cothroman a th’ ann a shealltainn dhaibh.
Bidh boireannaich a tha ri rianachd a’ toirt comhairle air an fheadhainn a bhios a’ frithealadh orra seo, ’s iad a’ gabhail pàirt ann an leithid obair-sgioba, dealbhachadh-dreuchd agus sgilean-taisbeanaidh.
Bidh seo a’ toirt a’ chothruim do na sgoilearan “a bhith faireachdainn nas misneachaile nuair a tha iad a’ cur eòlais air daoine ’s nuair a a tha iad ag obair ann am buidhean” agus “a bhith tuigsinn barrachd mu rianachd agus na tha dhìth air a son.”
Fhathast chan eil gu leòr de bhoireannaich an sàs ann an rianachd.
Tha Comhairle Roinn na Gaidhealtachd air ceumannan a ghabhail gus seo fhuasgladh ann an Roinn an Fhoghlaim aca le bhith cur sreath de chùrsaichean uallachaidh Boireannaich ann an Rianachd Fhoghlaim air bhonn, le program-gnìomhachaidh dearbhach na chois.
Rinn Ainsley James bho Acadamaidh Inbhir Nàrann frithealadh air cùrsa dà là Boireannaich ann an Rianachd Fhoghlaim agus thuirt i gun robh e “air aon dhe na cùrsaichean a b’ fheàrr agus a bu bhuntaiche a rinn mi riamh. Thug e leis measgachadh rèidh de ghìomhan practaigeach, luchd-labhairt, deasbad agus obair air do cheann fhèin.
Seach nach robh an sàs ann ach boireannaich bha e comasach do na bha làthair a bhith na b’ fhosgailte na bha iad nan robh fireannaich ann cuideachd. Seach gun do chuir an cùrsa cuideam air na bha comasach dhuinn agus mar a dhèanamaid meas air an eòlas a bh’ againn, chuir e ris a’ mhisneachd againn ’s ris an spèis a ghabh sinn dhuinn fhìn a bharrachd air a bhith nas mionaidiche mu na dreuchdan romhainn.”
Faodaidh trèineadh boireannaich a tha tilleadh gu obair a chuideachadh cuideachd le bhith ùrachadh an cuid eòlais a’ cur ris a’ mhisneachd aca nuair a thèid iad a’ lorg obrach. Tha cuid a chùrsaichean soirbheachail air a bhith air an cumail air Ghaidhealtachd is sna h-Eileanan.
Nam measg seo tha tionnsgain air an robh Enterprising Women a chuir Buidheann-Foghlaim nan Obraichean air chois o chionn ghoirid. Bha sia cùrsaichean ann, ann an caochladh àitean, agus iad ag amas air na feumalachdan ullachdain a th’ aig boireannaich a-muigh air an dùthaich a ruigsinn. Tharraing na cùrsaichean boireannaich gun obair ach aig an robh sgilean agus eòlas.
Chaidh trèineadh ann an gnothaichean practaigeach a thoirt seachad cuideachd taobh a-staigh nan naoi seachdainean a mhair an cùrsa agus seachdain air an deach iad ag obair, rud anns an deach tlachd mhòr a ghabhail.
Mar a thuirt aon tè, “thug an cùrsa misneachd air ais dhuinn agus chuir e air shùilean dhuinn gun tèid againn air a dhol air ais a dh’ obair a-rithist”.
Faodaidh a bhith na bhuannachd do luchd-fasdaidh cuideachd ma tha neach-cuideachaidh inbheach aca fad seachdain. Mar a’ thuirt a’ Bhean-phòsda Harris a tha na bean-taighe aig ionad-Ghoireasan Corsee (ionad airson nan sean ann an Inbhir Nàrann), “Chaidh gu math le Julie nuair a chuir i seachad seachdain ag obair còmhla ruin. Chuir i feum a b’ fheàrr air an ùine ghoirid a bh’ aice agus rinn i oidhirp mhòr. Bha an luchd-fuirich agus an luchd-obrach duilich nuair a dh’fhalbh i.”
Tha dòighean sònraichte sam faodar gnìomhadh dearbhach a ghabhail, cuideachd faodaidh luchd-fasdaidh a bhith:
– mothachail gur h-e tasgadh a th’ ann an trèineadh bhoireannach a tha dèanamh leasachaidh air goireas a tha gu tric air a leigeil an dearmad
– a’ cur ri àireamh nan cothroman ullachaidh a th’ ann airson nam boireannach
– a’ tairgse trèinidh
– a’ brosnachadh luchd-obrach pàirt-ùineach a bharrachd air làn ùineach gus uidheamachadh dreuchdail a thoirt a-mach
– a’ dèanamh cinnteach gu bheil na Buidhnean-iomairt mothachail air feumlachdan trèinidh an luchd-obrach
– a’ dol an sàs ann an tionnsgainean a nì sgrùdadh agus a chumas sùil air obair; ’s e dòigh shaor a tha seo a bheir buannachd do bhoireannaich le bhith toirt a’ chothruim dhaibh a chur ri fiorachadh a chèile, eisimplirean a leantail, fios a lorg agus comhairle a chur
– a’ cur feum air leasachadh luchd-obrach gus boireannaich san luchd-obrach aca ullachadh agus bhrosnachadh
– mothachail air na buannachdan a thig à gairm, taghadh agus oideachadh an neach as fheàrr airson dreuchd shònraichte
LUCHD-FASDAIDH AGUS CURAM-CLOINNE
– Ann an Raon Iomairt na Gaidhealtachd ’s nan Eilean tha còrr is 77,000 cloine eadar 0–15 bliadhna dh’ aois
– Tha còrr is 23,000 dhiubh seo fo aois 5 bliadhna
Roimhe seo, bhiodh pàrantan ag obair air Gaidhealtachd is san h-Eilean an eisimeil air na pàrantan is na caraidean aca gus aire a thoirt dhan cuid cloinne.
Tha an suidheachadh fosgailte seo a’ fàs nas duilghe chur air dòigh oir:
– tha atharrachadh a-thaobh àireamh-sluaigh a’ tighinn air coimhearsachdan far a bheil teaghlaichean gun a bhith cho buailteach air a bhith a’ còmhnaidh faisg air a chèile agus feadhainn eile ag imrich bho taobh a-muigh.
– chan eil seann phàrantan a’ fuireach faisg air làimh uimhir agus a chleachd iad a bhith gus cuideachadh le cùram-cloinne. Tha teaghlaichean nas bige na bha iad roimhe seo agus tha àireamh nam pàrantan-aonair ag èirigh.
– Tha cleachdaidhean obrach ag atharrachadh cuideachd, le barrachd mhàithrean ag iarraidh obair-chosnaidh air falbh bhon taigh, tro thaghadh no tro fheum. Thig air cuid a dh’ fhireannaich a bhith ag obair air falbh fad ùineachan fada, a’ fàgail nam boireannach an urra ri gnothaichean an teaghlaich agus obair a tharraing a-mach air an ceann fhèin.
Bidh na rudan seo a’ fàgail dhuilgheadasan aig pàrantan agus iad a’ feuchainn ri dleasdanasan an teaghalaich agus obair-chonsnaidh a tharraing a-mach aig an aon àm.
Tha caochladh sheòrsaichean de chùram-cloinne ann agus nam measg siud tha:
– cùram airson na cloinne roimh aois sgoile – àite ann an ionad-altraim là (ag amannan san ionad-obrach) no còmhla ri freiceadain-chloinne clàraichte, duine càirdeach no caraid.
Tha cuid a dh’ ionadan-altraim air Ghaidhealtachd is sna h-Eileanan a-nis ach, mar as trice taobh a-mach nam bailtean, ’s e freiceadain-chloinne a tha ’n urra ri cùram-cloinne mar as trice.
– Tha 780 uairean a thìde de dhiofar eadar bliadhna na sgoile agus a’ bhliadhna-obrach
– Cùram airson clann-sgoile – comann far am bi clann a’ fuireach gus a bheil am pàrantan ullamh de dh’ obair. Mas as trice bidh iad seo air an cumail rè làithean-saora na sgoile cuideachd, nuair a tha e gu sònraichte doirbh do phàrantan cùram-cloinne a chur air dòigh. Aig amannan bidh ionadan-altraim, luchd-faire cloinne, daoine càirdeach na caraidean a’ toirt aire dhan chloinn cuideachd.
Tha aon deug de chomainn mach-às-an-sgoil air nochdadh air Ghaidhealtachd is sna h-Eileanan bho 1994 agus thathar a’ cur deich eile dhiubh air dòigh.
Tha grunnd adhbharan airson luchd-fasdaidh a bhith a’ cuideachadh le cùram-cloinne. Tha cuid nam buannachdan dìreach dhan neach-fhasdaidh agus bheir feadhainn eile buannachdan eile leotha le bhith cur feabhais air cleachdaidhean fasdaidh agus le bhith cur sgioba-obrach èifeachdaiche ri chèile.
Am measg nam buannachdan tha:
– a’ neartachadh na h-ìomhaigh a th’ aig an eagrachadh ann an sùilean an t-sluaigh
– a’ fasdadh à tomhas nas fharsainge de luchd-tagraidh; faodaidh cùram-cloinne a bhith na tharraing mhòir do luchd-obrach
– a’ cur ri dìlseachd agus èifeachdadh luchd-obrach, le bhith ’g aideachadh gu follaiseach gu bheil dleasdanasan teaghlaich aig luchd-obrach agus le bhith ’g obair còmhla ri chèile gus gnothaichean fhuasgladh
– a’ neartachadh caidreachas luchd-obrach le bhith mothachail air na dleasdanasan a-thaobh an teaghlaich a th’ aig luchd-obrach
– a’ lùghdachadh àireamh nan làithean a chosgas luchd-obrach air falbh bho obair, oir faodaidh luchd-obrach a bhith onorach mu na dleasdanasan a th’ aca aig an taigh agus tighinn gu rèite ris an luchd-fhasdaidh aca a rèir sin
– a’ gleidheadh luchd-obrach às dèidh clann a bhreith, rud a tha caomhnach a-thaobh fasaidh, agus ullachadh luchd-obrach a thig às ùr nan àite.
Tha sgrùdadh air buannachd nan cosgaisean a’ leigeil fhaicinn an luach a tha ann an gleidheadh luchd-obrach teòma.
Mar eisimpleir, ’s iad na cosgaisean ann am bitheantas a dh’èireadh à bhith feuchainn ri cuideigin fhasdadh an àite rianadair a bha cosnadh £15,000 sa bhliadhna:
Cosgaisean fasdaidh £2500
Cosgaisean trèinidh £800
Neach-obrach sealach £300
Cion-teòmachd na neach ùir £3000
COSGAIS SHLAN GUS A’ BEARN A LIONADH £6600
Tha caochladh dhòighean sam faod luchd-fasdaidh cuideachadh a thoirt dhan luchd-obrach aca le cùram-cloinne. Tha cuid a dhòighean ’s a mholaidhean air an cur sìos gu h-ìosal, le eisimpleirean bhon a’ Ghaidhealtachd ’s bho na h-Eileanan.
Faodaidh àireamh bhuidhnean no eagrachaidhean tighinn còmhla gus cùram-cloinne a chur air dòigh luchd-obrach, ’s iad a’ roinneadh nan cosgaisean eatorra fhèin. Tha ionadan-àraich, comainn mach-às-an-sgoil agus buidhnean fhreicheadan-cloinne uile freagarrach san t-seagh seo, na faodaidh luchd-fasdaidh seirbheis a thoirt seachd do luchd-obrach, luchd-còmhnaidh agus luchd-tadhail.
Tha sinn ag iarraidh muinntir an àite fhasdadh
Chaidh ionad-àraich Bhrìghde ann am Bail’ a’ Chaoilais a stèidheachadh ann an 1992 leis a’ bhuidheann thaighean-òsda Saorsa nan Gleann.
An-dràsda tha an t-ionad-àraich ann an taigh am Bail’ a’ Chaolais, ’s e air a chur gu feum le luchd-obrach is luchd-tadhail mar as trice.
Tha àiteachan an asgaidh aig luchd-obrach nan taighean-òsda ann. Bidh an t-ionad-àraich a’ gluasad dhan ionad luchd-tadhail Tir a’ Gheallaidh ann an 1996.
Tha a’ Bhean-phòsda Jessie Young, a tha na striùiriche air buidheann nan taighean-òsda, a’ mìneachadh mar a tha an t-ionad-àraich a’ dol a rèir nan amasan a th’ aca mar eagrachadh. “The sinn ag iarraidh muinntir an àite fhasdadh ach cha mhòr gun gabh e dhèanamh gun chùram-cloinne. Agus tha sinn a’ cumail an ionaid oir tha sinn dhen bheachd gu bheil uallach sònraichte againn dhan sgìre.”
Ann an car an aon dòigh, tha ionadan-àraich do dh’ oileanaich agus do luchd-obrach anns na colaisdean ann an Eilginn, Inbhir Nis agus Liùrabhaig.
Faodaidh luchd-fasdaidh àiteachan a cheannach ann an eagrachadh a th’ ann mar-thà, mar ionad-àraich, freiceadan-cloinne no comann às-dèidh-na-sgoile.
Bidh an neach-fasdaidh a’ ceannach no a’ pàigheadh airson àiteachan a bhios an uair sin air an cur a thaobh airson luchd-obrach. Faodaidh ceannachan cunbhalach mar seo a bhith nan cuideachadh mòr do bhuidhnean beaga a-muigh air an dùthaich.
Tasgadh airson na h-ùine romhainn
Nuair a thog Judane Knitwear an togalach ùr aca ann an Liùrabhaig ann an 1994, bha àite airson ionad-àraich mar phàirt dheth. Tha Kinder Kids air a chumail mar ghnìomhachas air leth le Annette Laurenson.
Tha Janice Cook, a tha na stiùiriche air Judane Knitwear, a’ mìneachadh, “ ’S e tasgadh airson na h-ùine romhainn a th’ ann. Bidh sinn a’ toirt trèinidh do bhoireannaich òga agus chan eil sinn airson an call nuair a bhios clann aca”.
Tha àite air thoiseach air càch aig luchd-obrach Judane ann agus bidh iad a’ pàigheadh air a shon le taic bhon luchd-fhasdaidh aca. Faodaidh pàrantan eile feum a chur air an àite le bhith pàigheadh air a shon aig an ìre shlàn.
A’ brosnachadh nam boireannach gus a bhith neo-eisimeileach
Dh’fhosgladh Comann As-Dèidh-Sgoile Bhail’ a’ Chaisteil sa Ghiblean 1995, a’ toirt seachad seirbheis faisg air Inbhir Theòrsa gach cuid às dèidh àm na sgoile agus tro na làithean-saora.
Tha am buidheann mòr, Norfrost, air taic a chur ris a’ chomann le tabhartas agus cumaidh iad le bhith leigeil le luchd-obrach àiteachan a ghabhail ann le taic-airgid bhuapa.
Tha Stiùiriche-Rianachd Norfrost,Pat Grant, ag ràdh
“Chuir mi romham taic a chur ri Comann As-Deidh-Sgoile Bhail’ a Chaisteil oir tha mi airson boireannaich a bhrosnachadh gus a bhith nas neo-eisimeiliche agus gus barrachd smachd a bhith aca air am beatha fhèin.
Tha e cudthromach cuideachd ged-tà san t-saoghal anns a bheil sinn beò, far a bheil àireamh nan teaghlaichean le pàrantan-aonair a’ dol am meud, gum bi luchd-fasdaidh mothachail do seo agus gun cuir iad innleachd air dòigh sam faod neach dol air ais a dh’ obair gus chan e a-mhàin a bheatha fhèin a dhèanamh nas fheàrr ach cuideachd beatha a chloinne.
Tha an tionnsgain seo a’ toirt a’ chothruim do phàrantan na dreuchdan a chuir iad rompa a leantail san eòlas gu bheil deagh aire air a toirt dhan cuid chloinne ann an àite sàbhailte ’s tèarainte.”
The èarlaisean cùram-cloinne nam meadhan sùbailte san cuidich luch-obrach le cosgaisean cùram-cloinne. Tha iag ag obair mar èarlaisean-lòin; faodaidh luchd-obrach an iomlaid airson àiteachan sna h-ionadan-àraich, le freiceadain-chloinne no comainn, mas e ’s gu bheil na buidhnean seo air an clàrachadh. Tha dòigh eile ann far am faod luchd-obrach cuibhreann-airgid fhaotainn mar chuid de chosgaisean cùram-cloinne, a ghabhas pàigheadh a rèir tuarasdal an neach-obrach – mar as ìsle tha an tuarasdal ’s ann as àirde bhios a’ chuibhreann.
Le bhith tairgse fiosrachaidh de luchd-obrach, tha luchd-fasdaidh a’ sealltainn na tuisge th’ aca air na nithean seo.
Faodaidh pasgan beag fiosrachaidh no bileag a bhith na chuideachadh do phàrantan nuair a tha iad a’ lorg cùram-cloinne, agus gabhaidh iad seo a chur ri chèile le bhith cur feum air clàran nam freiceadan-cloinne clàraichte a bhios air an cumail le Roinnean Sòisealta.
Tha Seirbheis Fiosrachaidh Cùram-Cloinne ann an Ros is Crombaidh agus thathar air seòladh ionadail mu sheirbheisean a chur ri chèile anns an Eilean Sgitheanach agus Loch Aillse.
Chan e goireas cùram-cloinne an aon fhusgladh. Tha dòighean eile ann sam faod luchd-fasdaidh pàrantan a chuideachadh gus na dleasdanasan teaghlaich is obrach aca oibreachadh còmhla.
Bidh luchd cùram-cloinne taingeil airson taic dhìreach, agus cuideachadh le toglaichean no uidheam air neo comhairle ’s eòlas. Gu math tric bidh seirbheisean cùram-cloinne air an rianachd le buidhnean-rianachd a bha ’g obair gun duais ’s a chuireas fàilte air taic phractaigeach.
’S e ’s dòcha labhairt a-mach air innleachdan cùram-cloinne an dòigh as saoire th’ ann gus cuideachadh a thoirt seachad ach faodaidh e bhith gu math èifeachdach. Feumar a thoirt a chreidsinn air luchd-taice, leithid comhairlean nan roinnean no nam buidhnean-iomairt ionadail, gum faodadh taic a-thaobh cùram-cloinne a bhith na buannachd dhìreach do eaconomaidh an àite.
’S mòr as fhiach litrichean a sgrìobhadh a bheir taic, na labhairt aig coinneamhan gus gnothaichean cùram-cloinne a chuideachadh san sgìre agaibh fhèin.
BOGSA NAN DEIDEAGAN, Geàrrloch
’S e th’ ann am Bogsa nan Dèideagan ionad-àraich là nach eil a’ feuchainn ri prothaid a dhèanamh, a thàinig ann am bith ann an 1993, agus a chaidh a chur air chois le boireannaich bhon àite le taic bho ùghdarrasan ionadail agus roinneil mar Bhuidheann-Iomairt Rois is Chrombaidh.
Chuir luchd-fasdaidh an àite taic le bhith a’ sgrìobhadh litrichean agus le bhith frithealadh aig coinneamhan gum fuasgladh Bogsa nan Dèideagan na duilgheadasan a bh’ aca a-thaobh fasdaidh.
CIS AGUS CURAM-CLOINNE
– Faodaidh luchd-fasdaidh lùghdachadh fhaotainn air cìs mu choinneamh nan cosgaisean a dh’èireas às a bhith a’ cuideachadh le cùram-cloinne an cuid luchd-obrach.
– Gabhaidh cìs a chur air luchd-obrach fhèin, an crochadh air an t-seòrsa cuideachadh a th’ ann is air an tuarsdal aca.
– Tha Luchd-Fasdaidh airson Cùram-Cloinne, forum de dheich buidhnean mòra, air aon dhe na h-eagrachaidhean a tha ag agairt airson atharrachaidhean anns an lagh air cìsean.
INNLEACHDAN A THA MOTHACHAIL AIR TEAGHLAICHEAN
Thig buannachdan mòra às a bhith a’ cur innleachdan a tha mothachail air teaghlaichean agus cleachdaidhean-obrach sùbailte ann an gnìomh. Le bhith ’g atharrachadh cleachdaidhean na h-obrach gus am freagair iad air feumalachdan sònraichte, faodar cuid dhe na duilgheadasan fhuasgladh a dh’èireas à cùram luchd-eisimeile.
Chan eil rudan seo a’ bualadh air a’ Ghaidhealtachd is air na h-Eileanan a-mhàin; air feadh na Roinn-Eòrpa tha dòighean-obrach ùra fo dheasbad agus air an cur ann an gnìomh.
Anns a’ Mhàrt 1992, chaidh ghabhail ri Moladh Eòrpach air cùram-cloinne. Tha seo a’ toirt aghaidh air an fheum a th’ ann airson tòrr rudan ceangailte ri obair is ris an taigh gus taic a chur ri pàrantan a bhios ag obair.
Chaidh sealltainn air ceithir nithean gu sònraichte:
– seirbheisean airson na cloinne
– cead do phàrantan an obair aca fhàgail
– a’ bhith a’ cur suidheachadh, cruth agus eagrachadh na h-obrach an altaibh a chèile ann an dòigh a tha mothachail air na feumlachdan a th’ aig luchd-obrach aig a bheil clann
– a’ cur air adhart roinneadh nan dleasdanasan airson cloinne eadar boireannaich is fireannaich
Tha an tomhas farsaing de dhleasdanasan an urra ri caidreachas eadar riaghaltasan, ùghdarrasan-ionadail, aonaidhean luchd-obrach agus luchd-fasdaidh. Tha buidhnean mòra a’ dol an sàs anns na h-innleachdan seo agus gu math tric tha na buidhnean beaga gu math comasach air an cleachdaidhean sùbailte chur ann na gnìomh a tha freagairt orra fhèin is air an luchd-obrach aca.
Le bhith mothachail air na rudan seo is le bhith gan cur air adhart mar dheagh chleachdadh, faodaidh buidhnean barrachd luchd-obrach a tharraing agus luchd-obrach luachmhor a ghleidheadh. Aig a’ bhonn dhiubh uile tha am feum a th’ ann gun bithear mothachail air a’ chothrom a th’ ann eadar dleasdanasan an taighe agus na h-obrach do bhoireannaich is do dh’ fhireannaich.
Bheir atharrachaichean ann an cleachdaidhean na h-obrach fuasgladh air cuid dhe na duilgheadasn ceangailte ri cùram-cloinne. Dh’fhaodadh seo a bhith ciallachadh atharrachadh air àm-crìochnachaidh, le bhith gabhail barrachd feairt air làithean-saora nan sgoiltean ’s le bhith toirt a’ chomas do dhaoine a bhith ag obair aig an taigh. Tha roinneadh-obrach aig Comhairle Roinn na Gaidhealtachd ann an cuid a dhreuchdan, rud a bhios a’ gleidheadh luchd-obrach teòma nach eil ag iarraidh ach obair pàirt dhen tide.
Aig Buidheann-Iomairt an Eilean Sgitheanaich is Loch Aillse, tha Barbara Smith, a th’ ag obair ann mar an aon bhoireannach aig a bheil clann bheag, dhen bheachd gu bheil an dòigh sa bheil am buidheann ag obair na h-eisimpleir de dheagh chleachdadh.
Tha Barbara ag obair ann an suidheachadh gu math sùbailte, far am faod i na h-uairean-obrach aice atharrachadh a rèir feuman a cuid cloinne agus faodaidh i bhith ’g obair aig an taigh nuair a thig feum air.
Gun teagamh, faodaidh uairean-sùbailte a bhith nam buannachd do dh’ fhireannaich a bharrachd air boireannaich ag obair.
Ann an dreuchd aon neach, faodar measgachadh de chleachaidhean-obrach sùbailte le aon neach-fasdaidh a chur ann an gnìomh.
Thòisich Audrey Parker air obair phàirt-thìdeach a dhèanamh aig an t-Seirbheis-Fhasdaidh ann an 1983 ann an Gallobha, sgìre a dùthchais, agus ghluais i gu dreuchd làn-thìdeach. Aig an aon àm ’s a rinn an duine aice imrich gu Dùn Dè, bha Audrey airidh air fòrladh màthaireil, agus às dèidh sin till i a dh’ obair agus fhuair i àrdachadh ann an dreuchd.
Chaidh Audrey dhan Eilean Sgitheanach ann an 1993 nuair a fhuair an duine aice obair ann an sin. Thug an t-Seirbheis-Fhasdadh Briseadh-Dreuchd fad còig bliadhna dhi ach chaidh i air ais a dh’ obair o chionn ghoirid mar neach-comhairle aig an Ionad-Obrach ann am Port Rìgh.
Mar a tha Audrey ag ràdh “Fhuair mi buannachd mhòr bhon bhriseadh seo, a thug an cothrom dhomh an dreuchd agam a chumail ach cuideachd an teaghlach againn a chumail còmhla agus an t-seasmhachd a bha dhìth a thoirt dhan a’ chloinn againn nuair a bha iad ag imrich gu àite ùr. Tha mi air pàirt a ghabhail ann am buidhnean-coimhearsnachd anns a bheil a’ chlann air a bhith an sàs, tha mi air cuideachadh a thoirt le togail-airgid agus tha mi air tlachd a ghabhail ann a bhith a’ fuireach ann an coimhearsnachd bheag.”
Rinn Audrey feum cuideachd dhen ùine a fhuair i air Briseadh-Dreuchd gus teisteanas rianachd a thoirt a-mach air a chur air dòigh leis a’ Bhuidheann-Iomairt Ionadail.
Tha roinneadh-obrach a’ fas nas bitheanta am measg dhaoine nach urrainn dhaibh a bhith ag obair gu làn-thìdeach. Ged a tha beagan meòrachaidh a dhìth gus roinneadh-obrach a chur air dòigh, seach a bhith ga fhaighinn duilich a thoirt gu buil, bidh luchd-fasdaidh gu tric ag ràdh gu bheil tòrr bhuannachdan na lùib, nam measg siud leudachadh air dèanadas agus èsagaidheachd nan daoine a bhios a’ roinneadh na h-obrach.
Am measg nan cleachdaidhean-obrach eile air am faod luchd-fasdaidh beachd a ghabhail tha oibreachadh a rèir teirm, a ruigeas air gach cuid feuman luchd-fasdaidh is luchd-obrach agus, leis na th’ ann de dh’ adhartas ann an teicneolas, a bhith ’g obair aig an taigh, an dàrna cuid gu pàirt-thìdeach no gu làn-thìdeach ach fhathast a’ cumail nan ceanglaichean ris an ionad-obrach. Leis cho sgapte agus tha an sluagh air Ghaidhealtachd is sna h-Eileanan, tha tòrr a’ cur earbsa ann an teicneolas ann an cosnadh airson na h-ùine ri thighinn.
GIORRACHADH
– Tha còrr is leth de shluagh na Gaidhealtachd ’s nan Eilean nam boireannaich. Tha àireamh nam boireannach a tha ri obair-chosnaidh ag èirigh, ach tha an àireamh dhiubh ìosal ann an cuid a dh’ obraichean.
– ’S e trèineadh am fuasgladh a th’ ann gus sgilean nam boireannach a leasachadh agus gus brosnachadh a thoirt dhaibh na tàlantan a th’ aca a thoirt gu ìre.
– Tha gnìomhachasan soirbheachail an crochadh air luchd-obrach a tha teòma agus sùbailte. Bu chòir do luchd-obrach am feum as fheàrr a chur air na goireasan a tha ri fhaotainn agus beachd a ghabhail air trèineadh agus cleachdaidhean-obrach a bhios a’ cur ris na comas an a th’ aig an luchd-obrach a th’ ann mar-thà agus a bhios a’ tarraing luchd-obrach às ùr.
– Tha cùram-cloinne a tha freagarrach riatanach ach am faod pàrantan air Ghaidhealtachd is sna h-Eileanan – gu sònraichte boireannaich – trèinedh a ghabhail agus brath a ghabhail air cothroman-cosnaidh
– Tha comhairle mu thrèineadh is mu chùram-chloinne ri fhaotainn – cuiribh air ais a’ chairt phàigte a tha an cois seo ma tha sibh ag iarraidh tuilleadh fiosrachaidh.
TREINEADH 2000 AGUS CLANN ANN AN ALBA / FORUM NA DUTHCHA LEABHRAN-TREORACHAIDH LUCHD-FASDAIDH
CLAR NAM BUIDHNEAN-TAIC A CHUIDICH LE FOILLSEACHADH AN LEABHRAIN SEO
Buidheann Fiosrachaidh do Ghnìomhachasan
Caidreachas nan Ughdarrasan-Ionadail ann an Alba
Buidheann-Iomairt Ghallaibh is Chataibh, Earr.
Seirbheisean-Fasdaidh, Sgìre Inbhir Nis is Mhoireibh
Ughdarras nan Cothroman Co-Ionnanachd
Buidheann-Iomairt na Gaidhealtachd is nan Eilean
Comhairle na Gaidhealtachd
Bòrd-Slàinte na Gaidhealtachd
Comhairle Roinn na Gaidhealtachd
Buidheann-Iomairt Inbhir Nis is Inbhir Nàrann, Earr.
Buidheann-Iomairt Loch Abair, Earr.
Buidheann-Iomairt Mhoireibh, Bhàideanach is Shrath Spè, Earr.
Buidheann-Iomairt Rois is Chrombaidh, Earr.
Buidheann-Iomairt an Eilein Sgitheanaich, Earr.
Buidheann-Iomairt Shealtainn, Earr.
Taigh-Grùdaidh Thom Aitinn, Earr.
UKAEA
Unison, Meur Slàinte na Gaidhealtachd
Aran-Cridhe Mhic an Fhùcadair, Earr.
Tha TREINEADH 2000 agus Clann ann an Alba / Forum na Dùthcha gu mòr an comain nan eagraicheadhean agus nan daoine a thug taic gus an leabhran-stiùridh seo a chur ri chèile tro thabhartsan, urrasachd agus chomhairle.
| title | A’ Tasgadh anns an Ùine Romhainn |
| internal date | 1996.0 |
| display date | 1996 |
| publication date | 1996 |
| level | |
| reference template | A’ Tasgadh anns an Ùine Romhainn %p |