In Sechtmadh caibidil don aois ocus don coimplex. In aois ocus in coimplex is beag nach le neithibh cosmaili follamhnuighter iat. Gidhegh is mó dileaghaid na daoine óga na neithi remhra ocus na neithi cruaidi ocus na sen-daoine on tsendacht ocus na macaoimh na neithi flicha .i. na neithi maotha no boga maseadh dlighidh an diet beit athnuaighitech ocus dlighitt beagan docaitimh go minic. Et dlighear lucht an sduideir d’follamhnuighedh mar na sen-daoinibh oir tirmuighi an sduideir iad. Maseadh caithid neithi seimhe doréir fulaing noc[h] indtuighter go luath a fuil ro-maith. Lucht an tsaothair, umorro, caithid neithi róstaigthi remra oir is iat sin is mó cathaighius ris in saothar oir ge flichi na neithi róstuighthi naid na neithi beirbtur an uisghi o fhlichigecht tsubstainntigh go h’inmeadonach. Gidheagh bit tirim go forimillach ocus is daingne go huílidhi iad ocus is uime sin is decra an dealughadh on tes ocus trit sin is deacra an díleaghadh. Na neithi beirbtur

COLUMN XXV.

an aran bit fliuch ocus is maith iat. Gideadh is olc aran na pastae. Et is riaghail forlethon condlighear an biadh lenus do na méruibh intan taidhillter e do shecna oir is righin e. Et nimaith na neithi róstuighthi connaimhter tar oidchi ocus cumdach orra naid na neithi ro-meithi ar deiredh na coda. In taibstinens measurdha is ro-árd in leighes e ocus is uime sin a dubairt g[alen] Commedo ut uiuam non uiua ut commedam .i. is cum beith am bethaigh caithim ocus ni cum caithme bim am betaigh. Gidhedh adeirur sa cét partegul d’aforismorum Senes facilime ferunt ieunium .i. is ro-urusa lis na sen-daoinibh in tréiginus d’fhulang ocus is iad na sen-daoine on arrsuigecht sin ocus ainnsein na daoine óga ocus aindsein na macaoim ocus ainnsein na sen-daoine on tsendacht. Et mar in cétna is leór ansacht le lucht lenna fiond treighinus d’fulang ocus re lucht fola deirgi go hinmedonach ocus ni féduit lucht lenna ruaidh na lenna duibh a fulang. Gidhedh is ferr fuilngit lucht lenna duibh e na lucht lenna ruaigh oir is luigha in tes disgaoiles indtu ocus is mó caithaighius a ní ar an gnimuighend. Et do cuir in fersaightheoir fersadha ar follamnughadh na slainti Si uis incolumem si uis te redere sanum curas tolle graues irasci credere profanum .i. mad áil let beith fallain cuir imsnimh trom dít ocus creit gurub dimaoin duit ferg do denamh.

COLUMN XXVI.

Parce mero scenare caue nec sit tibi uanum pergere post epulas sompnum fuge meridianum .i. coigill fíon ocus sechain suiper ocus nar bu dímaoin let céimniughadh déis na coda ocus sechain codhladh in medoin-láe. Non teneas minctum nec cogas fortiter anum .i. na conaim ar th’fual ocus na héigingh go láidir do shuigi. Et ataid fersadha eili ar in fín Dat uinum purum tibi ter tria comoda primum .i. ataid naoi socamhuil do beir in fíon glan duit. Uires muiltiplicat et uiscera plena relaxata .i. imdaighi na brígha ocus lagaid na hinde línta. Confortat stomacum ceribrum cor dat tibi letum .i. nertaighi an gaili ocus in inchinn ocus do bir in croidhi subaltach ocus do ni dánacht ocus togairmigh an t’allus ocus geuraigi in t’indtlecht ocus do ni foirbhearteos do na cáirdib. Gidhedh bit misur mailli ris conach truaillter a oipriugh oir teid an dimaoinus gach ní dibh so an égmais an misuir. Et o ibter an fíon uair and go deighinech bit an fersa so agut Potus tarde datus multos facit cruciatus .i. dobeir in deoch ibter go deiginech piana imda. Item, gnathaighter cainel go minic oir do bir an bél go deghbalaidh ocus foghnuidh an aghaidh in remafhuar ocus coimheduigh ar truailledh na leanna anntu ocus is uime sin adeirur Non morietur homo commedens sepe

COLUMN XXVII.

de cinamomo .i. inté caithius cainel go minic ni recha d’ég do truailledh na lendann oir toirmisgid e dambia an follamhnughadh go maith osoin amach. Et dlighear afis gon dligheand an t’uisgi beith glan ocus glantur an t’aer go h’ealadhanach le teine maith muna faghtur glan gu nadurdha e. Et is lór so ge do fédfuighi moran eili do radh ann.

F–i– n–i– t.