Mìosan na Bliadhna

AM FAOILTEACH

Stoirm is gailleann ’s deilge shìontan,
Frasan sneachda ’s càblaid fhiadhaich,
Reodh-ghaoth snaidheadh feadh nan crìochan,
Aimsir ùdlaidh;
Aingealtachd air fiamh nan speuran,
Splèachdach neòil air aodann gréine,
Connspaid iargailleach ag eirigh
Air na dùilean;
Mìos an fhaoiltich rinn a dhranndail,
Toirt gu chrìch an ràidhe geamhraidh,
Géilleachdainn do thìm ’na deann-ruith
Triall a chùrsa.