Truailleadh Edein

’S cuimhne leam làithean
Bha bàigh a’ Chuain Sgìth
Fìorghlan is sàbhailt’,
Gun sgàig orm ro nì.

Nis tha fuar-dhealt gu h-àrd
Ann an àile gach tìr
A’ tuiteam gu làr
Mar phlàigh uisge-mìn

Air maoth-mheasan àlainn,
A’ mhil tha sa chìr,
Air lusan a’ ghàrraidh
Is àiteach gach glìob;

An gràn thig thar sàile,
Buntàta san sgrìob,
Feòil chaoraich bhàna,
Bainne bà agus ìm;

An t-iasg a tha snàmh
Sna bàigh againn fhìn -
Tha ’m puinnsean ’s gach àit’
Agus pàighear a’ phrìs.

Tro dhìmeas air nàdar
Tro thàir’ air ar dìleab,
Thruaill sinn uisg’ agus àile
Agus ghànraich sinn Eden.

Cha bhi ’n tìr sàbhailt’
Gu ’m bi nàmhaid fo chìs -
Sannt dhaoine gu h-àraidh,
Tha e ’n nàdar ar sìl.

Chogais nì e sàmhach,
’S e Sàtan a rìgh,
Dall far ’eil àmhghar,
Agus sàsaicht’ cha bhi.