“Casual Columns. ”Clò-bhuailte, an“Glasgow Hearald. ”12/6.

Bho chionn suas ri bliadhna, chuir an“Glasgow Herald”amach leabhrachan— “My Uncle George” le Alastair Phillips—a’ chiad leabhar a chuireadh amach fo ainm a’ phaipeir riamh. Reiceadh còrr agus cóig mìle deug leth-bhreac dheth, agus bhrosnaich so an “Glasgow Herald” gus leabhar eile a chur ri chéile—an turus so, co-chruinneachadh de sgrìobhaidhean a nochd anns a’ phaipear bho àm gu àm feadh nam bliadhnachan. Tha e cus nas tomadaiche anns a h-uile dòigh na bha “My Uncle George,” agus seulaichidh an àireamh a reicear dheth co-dhiùbh a thàtar a’ dol a chlò-bhualadh an còrr leabhraichean no nach eil. ’Se sin a tha sinn an dùil co-dhiùbh.

Anns na làithean a th’ann, is e an“Glasgow Herald”an aon phaipear maidne ann an Alba a tha a’ toirt dad as fhiach de urram do shaor-sgrìobhadh—sgrìobhadh nach eil uile gu léir ceangailte ri tachartasan an latha, no ri tachartasan na h-oidhche ann an Hollywood. Fo’n ainm“The Week End Page”thàtar a’ clò-bhualadh ceithir no cóig de sgeulachdan ’s de iomraidhean de gach seòrsa a h-uile Di-Sathurna, mar is trice, deagh sgrìobhadh, agus sgrìobhadh inntinneach.

Is ann bhon duilleig Di-Sathurna so a tharruingeadh a’ chuid as motha de’n leabhar ùr—“Casual Columns”—ged a tha miosgachadh math ann de rudan eile a duilleagan a’ phaipeir.

Tha còrr agus dusan pìos fo ainm Alastair Phillips fhéin—pìosan mar“Discretions of Aunt Maggie”a bheir gàire ge be àite an leughar e, agus“Lilac Time”—an sgeulachd ainmeil mu’n turus a chaidh an làraidh ghuail fodha anns a’ ghàrradh aige ann an Glaschu.

B’ann anns an“Week End Page”cuideachd, a rinn Alastair Mac’ Illeathain (mac do’n Urr. Alasdair MacIlleathain ’s do Mhairi NicLaomainn) ainm an toiseach leis an sgeulachd “An Dìleas” a choisinn duais ceud not dha. Bhon uair sin, chuir Alasdair amach leabhar a tha air beag fhortan a dheanamh dha mar thà— “H .M. S. Ulysses.” Uill, tha “An Dìleas” clò-bhuailte ann an“Casual Columns”cuideachd, agus bithidh móran toilichte an sgeulachd so fhaicinn ann an riochd maireannach de’ n t-seòrsa so.

Tha móran ainmean anns na duilleagan so air am bheil sinn eòlach ann an litreachas na h-Albann—tha suas ri leth-cheud ainm ann uile gu léir, gu ruigeas air pìosan a thogadh as gach oisean de’ n “Herald.”

Tha sinn an dòchas gun ceannaichear an leabhar so, oir tha sinn an dòchas gun lean am paipear iomraiteach so air leabhraichean a chur an clò. Tha feum an diugh air deagh sgrìobhadh, agus so aon dòigh anns an tig e fa chomhair an t-sluaigh, agus an aon dòigh anns am misnichear sgrìobhadairean ùra.

F. McD.

[Sanas]