Anns A’ Bheairt

THA Comunn Gàidhlig Ghlaschu air ceithir leabhraichean a chur an clò mar thà, a’ chiad fhear sa’ bhliadhna 1891 agus am fear mu dheireadh, The Active Gael,sa’ bhliadhna 1934. Tha sinn a’ cluinntinn gu bheil a nis an cóigeamh leabhar anns a’ bheairt, agus nach fhada gus am bi e anns na bùithtean. Dh’innis Rùnaire a’ Chomuinn, Iain A. MacDhòmhnaill, dhuinn gum biodh sia pàipearan air an toirt am follais anns an leabhar ùr so, agus ’s iad an luchd-sgrìobhaidh Aonghus MacMhathain, Alasdair MacFhraing (Ollamh namMathematicsan Oil-thigh Ghlaschu), Alasdair MacNeacail, Dòmhnall Patton, Tómas MacCalmain agus Ruaraidh MacThómais. Tha sinn an dòchas gu ruig am pasgan so sinn tràth air a’ bhliadhna ùir.

Thall an Canada, chan eil Calum Iain MacLeòid ’na thàmh. Tha e air clàr a chur amach le leasanan Gàidhlig airson luchd-ionnsachaidh. ’S e clàr mall tha so (nolong -player) ,agus anns an dà fhichead mionaid de chòmhradh a gheibhear air a’ chlàr tha Calum Iain (no Alasdair mar a theirear ris air a’ chlàr) a’ teagasg caob math de Ghàidhlig do a mhnaoi Seònaid. Tha dùil ri clàr eile de ’n t-seòrsa so fhoillseachadh. Faodar a cheannach, air $4 .95, bhoFrank McKnight, Music Store, P.O. Box 291, 357 Charlotte Street, Sydney, Nova Scotia.

Ann an ùine ghoirid tha dùil aig Gairm fhéin leabhar ùr a chur an clò—taghadh de rosg is de bhàrdachd a thainig am follais an toiseach anns an ràitheachan so. Rinn Iain A. MacDhòmhnaill an taghadh a chùm ’s gum biodh an leabhar gu feum do sgoilearan òga, gu h-àraidh bho’n chiad bhliadhna gus a’ cheathramh bliadhna anns an sgoil mhóir, agus tha e gu grinn air a chur ri chéile, le deilbh air fheadh, agus faclair goirid anns a bheil na h-uiread de fhacail neo-chumanta air am mìneachadh. Bu chòir gum biodh féill air an leabhar so anns na sgoiltean, ach bithidh cur-seachad ann do dh’iomadach duine a dh’fhàg làithean sgoile fada air chùl.

Tha sinn a’ toirt an aire gu bheil leabhar eile le Nils Holmer—The Gaelic of Arran—anns a’ bheairt aig Institiúid Ard-léinn Bhaile Atha Cliath. B’ann anns a’ bhliadhna 1938 a chuir Mgr. Holmer an clòStudies on Argyllshire Gaelic,ach bha e turus no dhà an Albainn bho’n uair sin, is cha b’ann dìomhain a bha e. Chan eil e a’ cur nàire no dorran sam bith oirnn gu bheil Lochlannaich ainmeil de ’n t-seòrsa so ag obair anns an dùthaich againn, ged a chuala sinn daoine a’ cumail amach gur h-e cùis-nàire bha ann. Chan eil crìochan no dùthchannan ann an saoghal na sgoilearachd, is tha sinn a’ cur fàilte is meal-an-naidheachd air Mgr. Holmer.

Anns an dealachadh, ma tha duine de ar luchd-leughaidh a tha an dùil leabhar Gàidhlig a chur an clò, no a chuala iomradh air a leithid, anns an dùthaich so no an Canada, bhiodh sinn fada ’na chomain nan cuireadh e brath thugainn.