Anns A’ Bheairt

CHAN EIL glé fhada bho chuir anScottish Gaelic Texts Societya-mach an leabhar de sgrìobhaidhean Dhòmhnaill MhicLaomainn, air a dheasachadh leis an Urr. Tómas MacCalmain, ach tha iad air adhartas math a dheanamh le clo-bhualadh de ’n Leabhar-cheist aig Calvin, air a dheasachadh le Raibeart MacThómais, á Oilthigh Leeds, agus tha leabhar eile aca ullamh airson a’ chlò cuideachd: ’se sin a’ bhàrdachd aig Iain Lom, air a deasachadh le Anna NicCoinnich, á Oilthigh Obair-Dheadhain. Bu chòir do gach neach aig a bheil ùidh anns a’ Ghàidhlig an comunn so a bhrosnachadh, agus cìs bhliadhnail a chur chun an Rùnaire (An Ridire Uisdean Watson, 16 St. Andrew Square, Dun-éideann).

Tha dùil a nis gun nochd an irisScottish Gaelic Studiesuair sa’ bhliadhna, agus gum bi an ath àireamh anns na bùithtean mu Chàisg, 1962. Gheibhear sgrìobhaidhean anns an àireamh so bho sgoilearan Ceilteach an Albainn, an Eirinn, an Sasuinn agus an Lochlainn. Cuiribh g’ a iarraidh chun An Leabharlann, Oilthigh Obair-Dheadhain. Tha an iris a’ cosg 15/- airson gach dà àireamh.

Tha Comunn Gàidhlig Inbhirnis fo riaghladh ùr, agus tha e coltach gum faod dùil a bhith againn gun tòisich na leabhraichean prìseil aca a’ tighinn am follais a rithist. ’Se nì mór a bhiodh an sin, agus tha fadachd oirnn gus a nochd a’ chiad fhear dhiubh. Tha e dhìth orrasan cuideachd cìs bhliadhnail fhaighinn bhuaibh (10/6, gu 28 Queensgate, Inbhirnis).

Leis mar a tha a’ Ghàidhlig a’ soirbheachadh anns na sgoiltean anns na bliadhnachan so, tha leabhraichean ùra a dhìth air na sgoilearan. Tha fear dhiùbh sin anns a’ bheairt—Làithean Geala, le Murchadh MacLeòid, Fear na Gàidhlige an Siorrachd Inbhirnis, agus chan fhada gus an cluinn sibh tuilleadh m’ a dheighinn. Chan fhada cuideachd gus am bi an leabhar de rannan ’s de chleasan Gaidhealach a tha anScottish Council for Research in Educationa’ cur air aghaidh, anns a’ bheairt, agus tha dùil là sam bith tuilleadh ris an leabhar eile a tha iad so a’ cur a-mach: Gaelic -speaking Children in Highland Schools.

Chì sinn mar sin nach eil beart na Gàidhlig idir falamh. ’Se an rud as motha a chuireas dragh air luchd-leughaidh Gàidhlig cho beag ’s a th’ innte de fhìor obair a’ mhic-mheanmain: bàrdachd is sgeulachdan is dealbh-chluichean is a leithid sin. Chan eil fada bho chuala sinn gu bheil seann eòlach, a tha a’ fuireach faisg air Dun-éideann, trang a’ sgrìobhadh cunntas a bheatha fhéin, anns a’ Ghàidhlig. Ma ghabhas so a chur an clò ’s fheàirrde sinn uile an cagnadh a bheir e dhuinn. An Canaidh cuideachd, tha an Caimbeulach trang, mar a gheibh e cothrom, a’ deasachadh eachdraidh-beatha Aonghais Bhig.