Maise Gnuis

LE EALASAID NIC A’ ROTHAICH.

THA mi a’ sgrìobhadh so airson cuideachadh a thoirt dhuibh a’ taghadh nan Cungaidhean-maise as freagarraiche airson bhur craicinn fhéin. Ach tha nithean eile ri coimhead riutha man dean mi sin. Mar a bi an craiceann air a dheagh choimhead ás a dhéidh cha chuir eadhon na Cungaidhean-maise as daoire tha ri’m faighinn dreach oirbh.

Coimheadadh gach té gu dùrachdach oirre fhéin as an sgàthan. Tha an craiceann ’na dhealbh do bhur faireachdainnean. Ma tha sibh sgìth bi e nochda; agus ma tha sibh ag ithe biadh mi-fhreagarrach bi sin nochda cuideachd. Mar sin ’se so a’ chiad rud a dh’ fheumas sibh coimhead ris—gum bheil sibh a’ faighinn cadal gu leòr agus chan eil mi idir a’ ciallachadh sibh a dh’ fhuireach anns a leabaidh nas fhaide anns na madainnean, fuar ’s gum bheil iad! Cha dean so ach ur deanamh marbhanta an còrr de ’n latha. A bharrachd air a sin na bithibh air ur buaireadh gus cus siotais agus aran milis ithe oir ’se sin na rudan a bhios ag aobharachadh guireanan air a’ chraiceann agus ma dh’ itheas sibh biadh freagarrach bi sin air a leasachadh.

Dìreach mar a tha sibh faiceallach gum bheil an t-aodach a bhios sibh a’ ceannach freagarrach agus briagha, agus ur gruaig air a cur air dòigh ann am fasan an latha, bu chòir dhuibh aig an aon àm feum a dheanamh dhe na Cungaidhean-maise a chuireas àilleachd ’nur gnùis. Chan eil e gu math sam bith a bhith ag éirigh anns a’ mhadainn ’s a’ cur oirbh crathadh de phùdar is suathadh le lipstick.Feumaidh an craiceann a bhith air a ghlanadh gu math agus air a bheathachadh;

Anns an ath àireamh innsidh mi dhuibh ciamar as còir an glanadh ’s am beathachadh so a bhith air a dhèanamh agus dé na Cungaidhean-nighe as freagarraiche dhuibh.

Bu mhath leam anns an dealachadh comhairle a thoirt oirbh. An do bheachdaich sibh riamh air snuadh ur gnùis? Am bi fiamh a’ ghàire air ur n-aodann nuair a thachras sibh ri neach? Chan eil deifir dé cho gann ’s a tha nighean de bhòichead ma tha i a’ coimhead toilichte agus a’ faireachdainn toilichte. ’S mór an t-atharrachadh a ni e. Bidh cus a bharrachd chàirdean aig a’ nighean a bheir toileachas do chàch ’s a bhitheas aig an té tha coma co-dhiù—gu brith dé cho àlainn ’s a tha i.