Air An Spiris

O chionn ghoirid chuir Siorrachd Rois duine an sàs anns an obair a ghabhadh os làimh an Siorrachd Inbhir Nis o chionn grunn bhliadhnachan: ’se sin, an cothrom as fheàrr a thaobh cainnte a dhealbh do chloinn Ghàidhlige ann an sgoiltean na siorrachd. Bu mhath leinn meal-an-naidheachd a chur air Mairead NicAsgaill, a ghabh an obair so os làimh.

A bheil e fìor, mar a chualas, nach eil na Leódhusaich cho déidheil ’s a tha na h-Uibhistich air Gàidhlig a thoirt do ’n chloinn anns an sgoil. Ma tha so fìor, tha dà cheist ann a bu chòir a bhith air an cur ’s air am freagairt. ’Se a’ chiad cheist, Carson nach eil iad cho déidheil? A bheil eagal orra fhathast gum bi a’ Ghàidhlig ’na cnap-starra; gun ionnsaich a’ chlann nas fheàrr ás a h-aonais? Tha e coltach nach e so idir a tha iad a’ lorg an Siorrachd Inbhir Nis, no anns a’ Chuimrigh, no an Switzerland.

’Se an dara ceist, Có tha an aghaidh nan dòighean ùra ann a bhith teagasg na Gàidhlig? An e Comhairle an Fhoghluim, no coimitidh no fear-dreuchd anns an t-siorrachd? An e an luchd-teagaisg fhéin, ’s mas e, an e an fheadhainn òga no an fheadhainn aosda?

Tha e ceart gum biodh na ceistean sin air an cur ’s air am freagairt. Tha cuireadh ga thoirt do dhuine sam bith á Siorrachd Rois a bheachdan air na gnothaichean so a chur an céill ann an Gairm. Mas e duine gun Ghàidhlig a th’ ann, ni sinn eadar-theangachadh air a’ Bheurla aige.

Ach tha dòighean ann nas feumaile na so. Tha móran eòlais agus fiosrachaidh aig muinntir Siorrachd Inbhir Nis mu ’n chuspair so. An teid Comhairle an Fhoghluim an Siorrachd Rois a shealltainn air na sgoiltean Gàidhlig an Uibhist ’s anns na Hearadh? An toir iad cuireadh do Shiorrachd Inbhir Nis feadhainn de ’n luchd-teagaisg Ghàidhlig aca a chur greis a Leódhus, agus feadhainn de na Leódhusaich a chur greis a dh’ Uibhist? Agus an sìn an dà shiorrachd làmh a’ chàirdeis gu muinntir Earraghaidheil is Chataibh? Tha a’ Ghaidhealtachd air fàs cho beag a nis ’s gum bu chòir dhi bhith aonaichte. Có ghabhas a’ chiad cheum air an t-slighe so?