Mrs. Perrins—anns an deise de chlò Ceemo.

Tha i tighinn gach là do a h-oifis an Steòrnabhagh á Gearraidh na h-Aibhne anns a’ bhan bheag Fiat a tha cho freagarrach air na rathaidean cumhang.

Da Leodhasach Ur

Le MAIRI IS DOMHNULL MACAMHLAIDH

AIR turas dhachaidh chaidh sinn air chuairt suas a Ghearraidh na h-Aibhne a bhruidhinn ri bana-Leódhusach ùr—ach te air an deach iomradh fad is farsaing anns an dà bhliadhna a chaidh seachad. Is e so Mrs Perrins a rinn a dachaidh a nis an Lodge Ghearraidh na h-Aibhne agus air a bheil iomradh tric sna pàipearan le h-obair sna clòitean “Ceemo”.

Bha an seòmar anns na choinnich sinn dìreach mar dhealbh á leabhar—le gorm srianach air a’ bhalla agus cùrtairean troma (a dhealbh i fhéin) air dhath ghlas-bhuidhe. Is e boireannach àrd a th’ innte—thug i greis de latha ’na bhana-pholasman is greis eile a’ sealltainn aodaich— ’naMannequin. Tha coltas tuigse agus èasgaidheachd cuirp agus inntinn oirre a thaobh nithean anns an cuir i ùidh.

Sàri de chlò Ceemo—có theireadh gun deachaidh so fhighe an Leódhus?

Ach ciamar a chaidh a leithid so de bhean uasal air nach robh feum airgid agus aig nach robh ceangal ri obair de ’n t-seòrsa so a riamh an sàs anns na clòitean? Bha ùidh aice a riamh, tha e coltach, an dathan ’s an dealbhan—gu h-àraid anceramicsair na rinn i mion-sgrùdadh agus i fhéin oileanachadh fad sia bliadhna gus a bheil i a nise aig ìre is gun aithnich i ùghdar nì de ’n ghnè air aon sealladh—co-dhiù mas ann de ’n 18mh linn deug a tha e.

O chionn 22 mìos air ais ghabh i os làimh seann mhuileann a bha dol an Steòrnabhagh o 1908 agus is ann o an t-seann ainm Cailean M. Orrock (nach tric a chluinnte uaireigin an Leódhus mu “chlò le Orag” ?) a thug i an t-ainm Ceemo . . . . Cee . . . . Em . . . . O . . . . Bha an t-ainm so, mar a thubhairt i, na b’ fhasa do Eadailtich agus Seapanaich a radh agus cuideachd cha bhiodh e cho ceangailte ri Albainn neo ris a’ chlò mhór ’s a bhiodh an t-ainm a tha air an obair fhéin an diugh—MacIllinnean is MacIllinnean. Tha so a’ nochdadh gu robh sùil aig Mrs Perrins air margaidhean an t-saoghail o ’n toiseach.

A thaobh dhealbhadair a chuireadh snàthan is dathan ri chéile sna dòighean bu taitniche—có a b’ fheàrr na i fhéin le a h-eòlas air dathan? Chan eil duine aice gus an so a sàs anns an taobh sin de ’n obair ach i fhéin, agus chan eil i de ’n bheachd gun còrdadh e rithe nam bitheadh. Sheall i dhuinn na ceithir pìosan a choisinn an duais dhi aig Féis Sacramento an California—gorm peucagach agus trì dathan bàn-dhearg, gu léir an aodach nas aotroma na an clò mór. Fhuair i an duais a b’ àirde airson measgachadh snàthan ás ùr—agus

Tha am muileann a thòisich le triùir a nis le àireamh 46 de luchd obrach agus tha còrr is trì cheud breabadair a’ fighe nan clòitean Ceemo air feadh Leódhuis. Tha beagan eadar-dhealachadh ri dheanamh chum gun gabh na beairtean na clòitean so—na tha slinn nas mìne—ach tha e coltach gu bheil an àireamh sin de ’n bheachd gur fhiach e an t-saothair. Chan eil gearan idir aig Mrs Perrins a thaobh luchd obrach an eilein.

Bithidh i fhéin a’ frithealadh nan tighean fasain am Paris ’s an Lunnain. Am bliadhna cha robh ach dà shalon san Fhraing nach do chleachd pìos de ’n chlò Ceemo ’nan cuid aodaich. Bha aon lainnireach liathghlas ann a bha cho cumanta an deisichean is gun d’ fhuair e am farainm ansix o’clock uniform.

Le sin tha e coltach gu bheil Ceemo a’ ruighinn àirde an fhasain. Agus dé mu fharsaingeachd? Tha Mrs Perrins ag radh gu bheil na margaidhean as fheàrr a th’ aice fada air falbh—an Tokyo agus ann a Hong-Kong. Tha i cuideachd ag reic ris an Fhraing, a’ Ghearmailt agus dùthchannan eile.

Dh’ fheòraich sinn mu bheachd na mnà uasail mu ’n eilean agus thubhairt i gu sìmplidh gur e a nis bu dachaidh dhi. Tha i cruaidh orrasan—agus nach eil sinne mar Ghaidheil ro-eòlach orra—a ghabhas Lodge agus a thig son mìos neo sia seachdainean a ghabhail luach an airgid de dh’ iasgachd is de shealg ’s nach toir beachd neo oidhirp a thaobh cor an t-sluaigh. Chan eil an leithid ’na beachd a’ cur an talamh gu feum neo a’ deanamh na b’ urrainn dhaibh gus an àite a chumail beò. Chan eil so fìor mu an duine aice fhéin—an Caiptean Perrins a tha air tuath math a dhealbh an Gearraidh na h-Aibhne agus aig a bheil mìle othaisg an dràsda. Tha e cuideachd air móran de ath-chur fheuchainn agus tha e a nis an sàs ann an deuchainnean eile le feur agus arbhar—ann an còmhstri chàirdeil ri Gilleasbuig a’ Bhùird.

[Dealbh]
An Caiptean Perrins, a tha air móran a dhèanamh an Gearraidh na h-Aibhne a thaobh fearann ath-chur. Tha mìle othaisg air a thuath.

Mrs. Perrins is Mgr. MacIlleathain aig beairt Ruairi MhicIomhair—am balach a dh’ fhigh aon de na pìosan a choisinn duais.

Tha a’ chàraid éibhinn a tha so de stoc eadar-dhealaichte. Is e theaghlach-san iadsan a tha a’ deanamh anLee and Perrins Saucean Sasuinn, ach tha buntanas aige thaobh a sheanmhar ri Cloinn Dòmhnaill Uibhist is Cloinn ’ic Nèill Bharraidh. Tha ise leth-Frangach agus fileanta anns a’ chànain sin—nì a tha i a’ faotainn feumail ’na h-obair a nis. Tha sgeulachd àraid aice mu’n chiad turas a bha i a’ falbh air itealan ás an eilean. Aig an àm bha faclair beag Gàidhlig aice ’na cois gus beagan eòlais a chur air a’ chànain. An àm dìreadh do ’n itealan dh’ iarr iad oirre balach òg tinn a leigeil a-steach roimhpe agus thubhairt iad nach robh smid Beurla aige. B’ e so a cothrom a Gàidhlig fheuchainn agus rinn i gu dìcheallach an àirde na chanadh i ris, le cuideachadh o ’n leabhran. Bhruidhinn i ris mar a b’ fheàrr a dheigheadh aice air sa’ Ghàidhlig. Bha am balach ga coimhead. Fhreagair e— “Pardonnez moi, Madam, je ne parle pas anglais.” Is e seòladair Frangach a bh’ ann, a dh’ fhàs tinn air bòrd bàta. Geall gu robh esan toilichte te a lorg a bhruidhneadh ris ’na chànain fhéin.

Tha eòlas Mrs. Perrins air Leódhus air meudachadh o ’n latha sin agus eòlas Leódhuis oirrese. Innsidh na bliadhnachan a tha air thoiseach mar a theid leis a’ chàraid uasail so a thanaig nar measg agus barrachd ’nan ceann air an cur-seachad agus an toil-inntinn féin fad cead-samhraidh. Tha aon nì cinnteach. B’ fheàirrde ar n-eileanan agus a’ Ghaidhealtachd air fad tuilleadh de’n seòrsa.