Seacaid De Shnath Na Muilleadh

(An dealbh le DOMHNALL B. MACLEOID)

AIR an t-samhradh-sa nuair a bha sinn ann an Uibhist, thug Uilleam bràthair mo mhàthar sinn air chuairt do Mhuileann Loch Euphort. Chunnaic sinn ann a sin de dh’ innealan is de rudan neònach a’ dèanamh, ’na thorran, an obair a b’ àbhaist a bhith maireachdainn fad a’ gheamhraidh do bhoireannaich nan eileanan—a’ càrdadh, ’s a’ snìomh ’s a’ toinneamh. Ach ’se thog mo shùil-sa ach na corran snàth a bh’ air an cruinneachadh ann an oisein dhe ’n àite—iteachain a bh’ air ropladh is mar sin. Bhatar a’ reic so air cho beag ri trì tasdain am punnd. Bha dathan bòidheach ann agus nan togradh tu dh’ fhaodadh tu fhéin measgadh a dheanamh orra no obrachadh le aon dath. ’S ainneamh té agaibh nach fhaigh greiseag de chuibheal eadhon anns a’ bhaile mhór. Tha mi tuigsinn gum bheil corran mar so gan reic ann am móran dhe na muillean, caran mu ’n aon phrìs agus postaidh iad cuideachd e ma chuireas tu ga iarraidh.

Faodaidh tu seacaid a dheanamh leis, no deise, cho briagha ri gin a dheanadh tu le snàth gallda. Sin agaibh seacaid air Annag anns an dealbh a dh’ fhigh i le snàth buidhe a fhuair i á té de mhuillean Steòrnabhaigh. Lean i pàtaran ALVA 109 airson Grampian Tweed na Ben More Knit Quik ach dheanadh pàtaran sam bith airson snàth garbh an gnothach. Chuir i snàth na muilleadh cóig fillte agus ghabh an t-seacaid so dà phunnd snàth—sin agad seacaid bhriagha air sia tasdain far an cosgadh i na notaichean air a fighe le snàth gallda. Agus tha i annasach.

C.C.D.