Leabaidh Fhearchair Mhic Iain Oig

Le DOMHNALL IAIN MACPHADRAIG (Africa-a- deas)

ANN a làithean m’ òige bha “Càrn Chlach” air lianaig ghuirm, air Achadh Innis-bhilteridh, a tha astar leth mhìle bho “Tigh na Morach,” ann a Sgìr Chinn-tàile, agus bha e ’na iongantas leam, ciod e air son a chaidh an “Càrn” a chur ann a sud.

Fhuair mi freagairt dha sin bho dhuine a bha còrr is ceud bliadhna a dh’ aois, agus a bha fad a bheatha anns an dùthaich sin. Thubhairt e gu robh e ’na chleachdadh ann a làithean òige, gu feumadh a h-uile teaghlach “Cìs” a phàidheadh, agus bha Maor a’ tighinn man cuairt a’ togail na “Cìs”, agus chaidh e gu tigh Fhearchair Mhic Iain Oig, agus dh’iarr e pàidheadh na “Cìs,” ach cha robh a-stigh ach a bhean, agus thubhairt i nach robh airgead aca.

Thubhairt am Maor gu feumadh e pàidheadh fhaotainn, agus rinn e gréim air coire copair a bha air an teine agus dh’fhalbh e leis ’na làimh. An déidh sin thainig fear an tighe a-steach agus thòisich a bhean ri argamaid ris airson nach robh e aig an tigh, agus gun cumadh e an coire bho ’n a’ Mhaor, agus rinn i e cho feargach is gun dh’ fhalbh e ás déidh a’ Mhaoir le bata math daraich, agus nuair a thàinig e far an robh am Maor, bhuail e leis a’ bhata e, agus mharbh e aig an àite anns a bheil an Càrn.

Anns na làithean sin cha robh “poilis” anns an dùthaich, ach bha eagal air gun tigeadh na Maoir ás a dhéidh, agus dh’ fhalbh e agus thug e leis aodaich leabaidh, agus fhuair e àite ann an aodainn creig, far an robh fraoch cho dlùth agus nach faiceadh sibh neach ’na laighe ann, agus bhiodh e dol dhachaidh air an oidhche airson biadh.

Dh’ fhalbh e ás an dùthaich an déidh sin, agus bha e air falbh airson móran bhliadhnachan, agus nuair a thàinig e air ais, cha robh móran dhaoine ann aig an robh cuimhne air, ach bha e aig Adhlaiceadh aig Clachan Dùthaich, agus nuair a bha iad ag òl air a’ Chnoc, thubhairt fear dhiubh ris gur e moirtear a bh’ ann, agus ghabh e feagal, agus fhuair e cothrom agus dh’ fhalbh e gu Canada, far an robh e gu latha a bhàis.