Air an Spiris

A bheil Ombudsman a dhìth oirnn air a’ Ghaidhealtachd? Chan eil sinn idir a’ ciallachadh an duine sin a tha Pàrlamaid Lunnainn an dùil a chur an sàs, ach Ombudsman dhuinn fhìn, fear a bheireadh am follais gach cànran a th’ againn an aghaidh ar luchd-riaghlaidh ’s ar luchd-stiùiridh air a’ Ghaidhealtachd agus ann an àite sam bith far a bheil caitheamh agus anacaitheamh gan dèanamh air a’ Ghàidhlig. Tha sinn an dùil gur h-e duine feumail a bhiodh ann.

Nach iomadh gearain a dh’ fhaodadh e dhèanamh. Dh’ fhaodadh e casaid a dheanamh air sgàth nam pìobairean an aghaidh an t-sluaigh a tha dol gu éigheachd is seanchas cho luath ’s a chì iad pìobaire air àrd-ùrlar ann an talla. Mar pheanas dh’ fhaodadh e na daoine sin a chur ann an rùm beag le dà accordion dheug a’ seirm ’nan cluasan a là ’s a dh’ oidhche. Chan eil teagamh cuideachd nach fheumadh e déiligeadh ris an fheadhainn a bhios a’ sgrìobhadh mu ghnothaichean eaglaise ann an Gasaid Steòrnabhaigh. Cha bhiodh leigheas orrasan ach an cur cola-deug do dh’ eaglais Easbuigeach a dhustadh ’s a ghlanadh nan ìomhaighean. Tha rithist ann na daoine nach cùm camara TV còmhnard air Oidhche Dhi-h- aoine a’ Mhòid. Dé ghabhas dèanamh riuthasan? Chan eil a’ cheist so duilich a fuasgladh. An cur fad mhìos do Sheòmar nan Naidheachdan anns a’ Bh.B. C., a leughadh nan naidheachdan Gàidhlig, fhads a bhios Cailein MacCoinnich agus Coinneach MacDhòmhnaill a’ leigeil an anail ann am Majorca. Bu mhath leinn cuideachd gun togadh an duine so gearain an aghaidh nan daoine nach bi a’ leughadh Gairm—agus gun cuireadh e orrasan mar pheanas Gairm a leughadh.

Ach có thaghadh an duine so, agus dé an t-ainm a bhiodh air? Nam b’ e an Comunn Gaidhealach a thaghadh e có dheanadh casaid an aghaidh a’ Chomuinn? A thaobh ainm, cha bhiodh sin duilich a lorg. Gheibheadh e ainmeannan gu leòr aon uair ’s gu rachadh e an sàs anns an obair so air Ghaidhealtachd.