Lisa Storey (Ban-deas). Bha Siod ann Reimhid. Sgeulachdan o Bheul-aithris. (Club Leabhar. 1975. 90 sg.)
Fionnlagh MacLeòid. Sioba (Club Leabhar. 1975. 45 sg.)
Fionnlagh MacLeòid. Tòthan (Club Leabhar. 1975. 45 sg.)

Is gann gum b’urrainn dà sheòrsa leabhair cho eadar-dhealaichte a thighinn thugainn còmhla ’s a tha anns a’ phasgan seo. Tha dhà de’n aon sheòrsa ann le Fionnlagh MacLeòid, agus fear de’n t-seòrsa eile le Lisa Storey, agus ged a thigeadh breitheanas orm, feumaidh mi ceann-teagaisg a thoirt asda.

Anns a’ chiad àite, ’se leabhraichean cloinne a th’annta air fad. Co-dhiù, ’se sin tha fo-near dhaibh. Anns an dà leabhar Sioba agus Tothan, chan eil ach dealbh air gach dàrnacha duilleig, agus is dòcha dà fhacal, no trì, no cóig, no ’s dòcha ochd, air an duilleig ma choinneamh an deilbh. Chì thu Tòthan, each gu math sùbailte, a’ seasamh air a cheann, agus tha thu a’ leughadh gun do choinnich e ri “Rudan man . . . coin”, air aon duilleig, “. . . agus cait” air an ath té, “. . . agus uisge” an ath thrup, ’s mar sin air adhart. ’Se cearc a th’ann a Sioba, agus ’s ioma rud a chì a’ chearc bhogach bhàn nach do shaoil a seanmhair. Anns an leabhar eile, tha naoi sgeulachdan bho bhial-aithris, is abair aithris. Tha bleith anabarrach air na teangannan seo, leithid:

Chaidh Cìgein agus Cùigein latha a’ bhuain an arain ùir. “Buain fhéin e,” arsa Cìgein. “Buain fhéin e,” arsa Cùigein. “Buaineamaid le chéile,” ars Cìgein. “Mar sin fhéin e,” arsa Cùigein.

Dh’fhalbh iad ’s bhuain iad e. “Ceangail fhéin e,” arsa Cìgein. “Ceangail fhéin e,” arsa Cùigein. “Ceanglamaid le chéile,” arsa Cìgein. “Mar sin fhéin e,” arsa Cùigein.

Chan eil sin ach toiseach tòisich, ach is dòcha gun tuig fear-leughaidh leth-fhacal.

Anns an dara h-àite, ’se leabhraichean sgoile tha seo. Ach tha caochladh sheòrsachan sgoile ann: sgoil-dhubh, sgoil a’ chruadail 7c. Feumaidh nach ann dha’n aon sgoil a tha iad uile.

Anns an trìtheamh àite, tha an saoghal air atharrachadh gu mór bho bha siod ann reimhid.

Anns an àite mu dheireadh, tha na deilbh ann an Sioba ’s ann an Tothan air an stéidheachadh air obair Criosabel NicLeòid aois deich, agus ’se rud inntinneach a th’ann an inntinn an leanaibh.

Agus anns a’ cho-dhunadh, far a bheil beatha agus bàs air an cur nar tairgse, bu mhath gun deanadh sinn roghainn air beatha.

R. McT