DH’AN T-SEALGAIREACHD

Thug mi bòidean gun tillinn
’S gu seòlainn an linne,
’S nach robh ’n còrr ri mo thilleadh
Ach bilean na h-uaghach.

Far am b’òg mi le m’ ghunna
Toirt a’ gheòidh far a’ mhunaidh,
’S damh na cròice o shiubhal,
Le fuil air a’ ghualainn.

Toirt an ràcain ’s na tunnaig
Nall far Oban na Curra,
Feadh na làthcha an cuilean
A’ siubhal is buar roimh’.

’S ann mus fàsadh i soilleir,
Moch ’s an latha, bu toigh leam
Bhith aig sàil Beinn na Coille,
’S na coilich ag gluasad.

Fear ’gam fàilteachadh uileadh,
Thall ’s an Aird chluinnte ghuth-san,
Fear air bhàrr Chnoca Dubha,
’S fear aig an t-Sruth Luachrach.

’S tric a dh’fhàg iad mi duilich,
’S gun e ’n dàn dhomh bhìth fuireach
Ris a’ chàrnan air m’uilinn,
’S an t-eun dubh ri duanaig.